.jpg)
ចិនគ្រោងនឹងបំបាក់កម្មវិធី Alipay របស់ក្រុមហ៊ុន Ant ដោយកម្មវិធីប្រាក់កម្ចីថ្មីមួយទៀត។ រូបថត AFP
កាសែត Financial Times បានរាយការណ៍កាលពីថ្ងៃអាទិត្យ ថា ទីក្រុងប៉េកាំងចង់បំបាក់កម្មវិធី Alipay ដែលជាកម្មវិធីទូទាត់ប្រាក់ដ៏ពេញនិយមរបស់ក្រុមហ៊ុន Ant Group របស់ Jack Ma ដោយបង្កើតកម្មវិធីថ្មីដាច់ដោយឡែកមួយទៀត សម្រាប់ការធ្វើអាជីវកម្មប្រាក់កម្ចី ដែលជាសេវាកម្មទទួលបានផលចំណេញខ្ពស់របស់ក្រុមហ៊ុនបច្ចេកវិទ្យាយក្សនេះ។
មនុស្ស ២ នាក់ ដែលដឹងពីដំណើរការនេះ បានប្រាប់សារព័ត៌មានដដែលថា លទ្ធផលចេញពីផែនការនេះគឺ ក្រុមហ៊ុនរដ្ឋនឹងធ្វើកម្មសិទ្ធិលើដំណើរការនៃការសម្រេចចិត្តថា តើត្រូវផ្តល់ប្រាក់កម្ចីរបស់ខ្លួនទៅឱ្យអតិថិជន ឬយ៉ាងណា?
មនុស្ស ៣ នាក់ បានប្រាប់សារព័ត៌មាន Reuters កាលពីសប្តាហ៍មុនថា ក្រុមហ៊ុន ដែលគាំទ្រ ដោយរដ្ឋគ្រោងនឹងទទួលយកភាគហ៊ុន ដែលមានទំហំធំនៅក្នុងការបណ្តាក់ទុនរួមគ្នា សម្រាប់ការផ្តល់ពិន្ទុឥណទានរបស់ក្រុមហ៊ុន Ant។
ដៃគូទាំង ២ រួមមាន ក្រុមហ៊ុន Ant និងក្រុមហ៊ុនទេសចរណ៍ Zhejiang Tourism Investment Group Co Ltd (ZJGVTT.UL) ដែលមានគម្រោងបង្កើតក្រុមហ៊ុនផ្តល់ចំណាត់ថ្នាក់ឥណទានផ្ទាល់ខ្លួននេះ នឹងកាន់កាប់ភាគហ៊ុន ៣៥ ភាគរយ ខណៈក្រុមហ៊ុនដៃគូ ដែលគាំទ្រដោយរដ្ឋផ្សេងទៀតគឺ Hangzhou Finance and Investment Group និងក្រុមហ៊ុន Zhejiang Electronic Port អាចនឹងកាន់កាប់លើសពី ៥ភាគរយ។
យោងតាមរបាយការណ៍ របស់កាសែត Financial Times ក្រុមហ៊ុន Ant នឹងមិនមែនជាអ្នកផ្តល់ប្រាក់កម្ចីតាមអ៊ីនធឺណិតតែ១គត់របស់ចិន ដែលត្រូវរងផលប៉ះពាល់ ដោយច្បាប់ថ្មីនេះទេ។
គួរបញ្ជាក់ផងដែរថា នៅខែមេសា និយតករចិន បានស្នើសុំឱ្យក្រុមហ៊ុន Ant ធ្វើការផ្លាស់ប្តូរអាជីវកម្មយ៉ាងទូលំទូលាយ រួមទាំងក្រុមហ៊ុនគ្រប់គ្រងហិរញ្ញវត្ថុ និងអាជីវកម្មប្រាក់កម្ចីខ្នាតតូច ២ របស់ខ្លួន គឺក្រុមហ៊ុន Jiebei និង Huabei ឱ្យទៅជាក្រុមហ៊ុនហិរញ្ញវត្ថុអតិថិជនថ្មីទៀតផង។
អាជ្ញាធរបទប្បញ្ញត្តិចិន បាននិងកំពុងចាត់វិធានការរឿយៗលើក្រុមហ៊ុន Ant Group និងក្រុមហ៊ុនអ៊ីនធឺណិតយក្សនានា ដោយធ្វើការបង្ក្រាបយ៉ាងទូលំទូលាយ លើបញ្ហាប្រឆាំងនឹងការទុកចិត្ត និងឯកជនភាព ទិន្នន័យអ្នកប្រើប្រាស់ និងរូបិយប័ណ្ណសម្ងាត់ផងដែរ៕
