.jpg)
ប្រធានផ្នែកសិទ្ធិមនុស្ស UN លោកស្រី Michelle Bachelet ព្រមានអំពីការប្រែប្រួលអាកាសដែលបង្កឱ្យមានជម្លោះទូទាំងពិភពលោក និងជាបញ្ហាប្រឈមចំពោះសិទ្ធិមនុស្ស។ AFP
របាយការណ៍មួយរបស់ធនាគារពិភពលោកបានរកឃើញថា ការប្រែប្រួលអាកាសធាតុអាចបង្ខំឱ្យមនុស្សជាង ២០០ លាននាក់ ជម្លៀសទីលំនៅក្នុងរយៈ៣ទសវត្សរ៍ខាងមុខ និងបង្កើតចំណុចក្តៅនៃការធ្វើចំណាកស្រុក បើសិនគ្មានការចាត់វិធានការ ដើម្បីកាត់បន្ថយការបញ្ចេញឧស្ម័នផ្ទាំងកញ្ចក់របស់ពិភពលោក និងតភ្ជាប់គម្លាតនៃការអភិវឌ្ឍ។
ផ្នែកទី២ នៃរបាយការណ៍ហ្គ្រោនស្វែល (Groundswell) ដែលបានបោះពុម្ពផ្សាយកាលពីថ្ងៃចន្ទ ទី ១៣ កញ្ញា បានពិនិត្យមើលរបៀបដែលផលប៉ះពាល់នៃការប្រែប្រួលអាកាសធាតុ ដូចជាកង្វះខាតទឹក ការថយចុះផលិតភាពដំណាំ និងការកើនឡើងនូវកម្ពស់ទឹកសមុទ្រ អាចបង្កឱ្យមាន «ជនចំណាកស្រុកអាកាសធាតុ» រាប់លាននាក់នៅឆ្នាំ ២០៥០ ក្រោមសេណារីយោ៣ផ្សេងគ្នាដែលកម្រិតខុសៗគ្នានៃសកម្មភាពអាកាសធាតុ និងការអភិវឌ្ឍ។
ក្នុងសេណារីយោអាក្រក់បំផុត ដែលមានកម្រិតបញ្ចេញឧស្ម័នផ្ទាំងកញ្ចក់ខ្ពស់ និងមានការអភិវឌ្ឍមិនស្មើភាពគ្នា របាយការណ៍នេះព្យាករថា យ៉ាងហោចណាស់មនុស្សជាង ២១៦លាននាក់នឹងត្រូវបង្ខំឱ្យជម្លៀសចេញពីលំនៅរបស់ពួកគេ នៅតាមបណ្ដាប្រទេសនៃតំបន់ចំនួន ៦ ដែលត្រូវបានវិភាគ គឺតំបន់អាមេរិកឡាតាំង តំបន់អាហ្វ្រិកខាងជើង តំបន់អាហ្វ្រិកក្រោមសាហារ៉ា តំបន់អឺរ៉ុបខាងកើត-អាស៊ីកណ្ដាល តំបន់អាស៊ីខាងត្បូង និងតំបន់អាស៊ី-ប៉ាស៊ីហ្វិក។ ក្នុងសេណារីយោនេះ តំបន់អាហ្វ្រិកក្រោមសាហារ៉ានឹងមានជនចំណាកស្រុកអាកាសច្រើនជាងគេ ប្រមាណ ៨៦ លាននាក់ ខណៈពេលដែលតំបន់អាហ្វ្រិកខាងជើងនឹងមានសមាមាត្រជនចំណាកស្រុកអាកាសធាតុខ្ពស់ជាងគេ ដោយប្រមាណ ៩ ភាគរយនៃប្រជាជនសរុបនឹងក្លាយជាជនចំណាកស្រុកអាកាសធាតុ។
នៅក្នុងសេណារីយោ សុទិដ្ឋិនិយមបំផុត ដែលមានកម្រិតបញ្ចេញឧស្ម័នផ្ទាំងកញ្ចក់ទាប និងមានការអភិវឌ្ឍស្មើភាពគ្នាប្រកបដោយនិរន្តរភាព គេនៅតែព្យាករថាមនុស្ស ៤០ លាននាក់ នឹងត្រូវបង្ខំឱ្យចាកចេញពីលំនៅឋានរបស់ខ្លួន។
របាយការណ៍មិនបានពិនិត្យទៅផលប៉ះពាល់រយៈពេលខ្លីនៃការប្រែប្រួលអាកាសធាតុទេ ហើយក៏មិនបានពិនិត្យទៅលើការចំណាកស្រុកឆ្លងព្រំដែនអន្តរជាតិផងដែរ។
យ៉ាងណាមិញអ្នកនិពន្ធរបាយការណ៍ បានណែនាំឱ្យបណ្ដាប្រទេសជុំវិញចាត់វិធានការជាបន្ទាន់ ដើម្បីសម្រេច «ការបញ្ចេញឧស្ម័នស្មើសូន្យ នៅពាក់កណ្ដាលសតវត្សរ៍ដើម្បីមានឱកាសកំណត់ការកើនកម្ដៅផែនដីឱ្យនៅត្រឹម ១,៥ អង្សាសេ» និងធ្វើការវិនិយោគលើការអភិវឌ្ឍតាមគោលការណ៍របស់កិច្ចព្រមព្រៀងក្រុងប៉ារីស៕
