កាលពីថ្ងៃចន្ទ ទី ១៣ កញ្ញា ជំនួយជាង ១ ពាន់លានដុល្លារ ត្រូវបានសន្យាសម្រាប់ប្រទេសអាហ្វហ្គានីស្ថាន នៅក្នុងសន្និសីទមួយរបស់អង្គការសហប្រជាជាតិនៅទីក្រុងហ្សឺណែវ ប្រទេសស្វ៊ីស ខណៈពេលដែលប្រជាជនរាប់លាននាក់របស់ប្រទេសនេះប្រឈមនឹងភាពស្រេកឃ្លានក្នុង «វិបត្តិមនុស្សធម៌ដ៏អាក្រក់បំផុត»។
អង្គការសហប្រជាជាតិបានធ្វើសំណើជំនួយបន្ទាន់ប្រមាណ ៦០៦ លានដុល្លារ សម្រាប់ជួយដោះស្រាយបញ្ហាធំបំផុតក្នុងប្រទេសអាហ្វហ្គានីស្ថាន។
ថ្លែងនៅក្នុងសន្និសីទរៃអង្គាសប្រាក់ជំនួយអគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស បាននិយាយថា អត្រាភាពក្រីក្រនៅអាហ្វហ្គានីស្ថានបានកើនឡើងយ៉ាងខ្លាំងចាប់តាំងពីការចូលកាន់កាប់របស់តាលីបង់ កាលពីខែមុន ដោយប្រជាជនម្នាក់ ក្នុងចំណោម ៣ នាក់មិនមានម្ហូបអាហារជាទៀងទាត់ ហើយសេវាកម្មសាធារណៈមិនមានដំណើរការ។
«ប្រជាជនត្រូវការជំនួយចេញពីស្ថានភាពដ៏លំបាក។ បន្ទាប់ពីសង្គ្រាមជាច្រើនទសវត្សរ៍ការរងទុក្ខវេទនា និងអសន្តិសុខពួកគេកំពុងប្រឈមមុខនឹងពេលវេលាដ៏គ្រោះថ្នាក់បំផុត» លោក ហ្គុយតឺរេស និយាយបែបនេះ ហើយបន្តទៀតថា៖ «ប្រជាជនអាហ្វហ្គានីស្ថានកំពុងប្រឈមមុខនឹងការដួលរលំនៃប្រទេសទាំងមូលនៅពេលតែមួយ»។
លោកនិយាយថា អាហ្វហ្គានីស្ថានអាចអស់ស្បៀងអាហារត្រឹមដំណាច់ខែនេះ ហើយកម្មវិធីស្បៀងអាហារពិភពលោកបានព្យាករថា ប្រជាជនជាង ១៤ លាននាក់ នឹងប្រឈមមុខនឹងការស្រេកឃ្លាន។
ដោយមានសង្គ្រាមរ៉ាំរ៉ៃ គ្រោះរាំងស្ងួតជាបន្តបន្ទាប់ និងអត្រាភាពក្រីក្រខ្ពស់ អាហ្វហ្គានីស្ថានគឺក្នុងចំណោមប្រទេសដែលពឹងផ្អែកលើជំនួយច្រើនបំផុតក្នុងពិភពលោក។ ជំនួយពីបរទេស គឺស្មើនឹង ៤០ ភាគរយនៃផលិតផលក្នុងស្រុកសរុបរបស់អាហ្វហ្គានីស្ថាន និងផ្គត់ផ្គង់ ៣ ភាគ ៤ នៃចំណាយសរុបរបស់រដ្ឋាភិបាល។ ជាងពាក់កណ្ដាលនៃប្រជាជនអាហ្វហ្គានីស្ថាន គឺរំពឹងទៅលើជំនួយដោយផ្ទាល់ពីខាងក្រៅ។
ជាមួយនឹងការត្រឡប់មកកាន់អំណាចវិញរបស់ក្រុមតាលីបង់ និងការដកទ័ពរបស់អាមេរិកប្រាក់ជំនួយរាប់ពាន់លានដុល្លារជារាងរាល់ឆ្នាំ ត្រូវបានកាត់ផ្ដាច់ដោយសារការមិនទុកចិត្តក្រុមនេះដោយបណ្ដាប្រទេសលោកខាងលិច ក្នុងការគោរពសិទ្ធិមនុស្ស។
ការមិនទុកចិត្តរបស់លោកខាងលិច ត្រូវបានកត់សម្គាល់ដោយឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សលោកស្រី មីសែល បាសេលេត ដែលបានចោទប្រកាន់ក្រុមតាលីបង់ថា បានក្បត់ការសន្យា ដោយបានបញ្ជាឱ្យស្ត្រីចាកចេញពីកន្លែងធ្វើការហើយត្រឡប់ទៅផ្ទះវិញ ហើយរារាំងមិនឱ្យកុមារីមិនឱ្យចូលរៀន។
ប៉ុន្តែអ្នកខ្លះបាននិយាយថា លោកខាងលិចនៅមានកាតព្វកិច្ចជួយប្រជាជនអាហ្វហ្គានីស្ថាន បន្ទាប់ធ្វើសង្គ្រាមអស់រយៈពេល ២០ ឆ្នាំនៅក្នុងប្រទេសនេះ។
កាលសប្ដាហ៍មុនប្រទេសជិតខាង ចិន និងប៉ាគីស្ថាន បានប្ដេជ្ញាផ្ដល់ជំនួយឱ្យប្រទេសអាហ្វហ្គានីស្ថាន។
ក្រុងប៉េកាំងបានសន្យាផ្ដល់ជំនួយជាស្បៀង និងឱសថក្នុងតម្លៃ ៣១ លានដុល្លារ ហើយនឹងផ្ដល់ជំនួយវ៉ាក់សាំងជំងឺកូវីដ ១៩ ចំនួន ៣ លានដូស។ ក្រុងអ៊ីស្លាម៉ាបាដ បានផ្ដល់ជំនួយជាស្បៀង និងឱសថ ហើយបានទាមទារឱ្យដោះលែងទ្រព្យសម្បត្តិអាហ្វហ្គានីស្ថានជាប់កកនៅបរទេស។
ក្នុងសន្និសីទខាងលើចិន និងរុស្សីនិយាយថា បន្ទុកសំខាន់ក្នុងការជួយអាហ្វហ្គានីស្ថានចេញពីវិបត្តិគួរតែស្ថិតនៅជាមួយបណ្ដាប្រទេសលោកខាងលិច។
ឯកអគ្គរដ្ឋទូតចិនប្រចាំអង្គការសហប្រជាជាតិនៅក្រុងហ្សឺណែវ លោក ឈិន ស៊ូ បាននិយាយថា៖ «សហរដ្ឋអាមេរិក និងសម្ព័ន្ធមិត្តរបស់ខ្លួនមានកាតព្វកិច្ចធំជាងនេះ ដើម្បីពង្រីកជំនួយផ្នែកសេដ្ឋកិច្ច មនុស្សធម៌ និងការរស់នៅ»។
សហរដ្ឋអាមេរិកបានសន្យាផ្តល់ជំនួយមនុស្សធម៌ថ្មីចំនួន ៦៤ លានដុល្លារ នៅក្នុងសន្និសីទនេះ ខណៈដែលន័រវែសបានសន្យាបន្ថែម ១១,៥ លានដុល្លារ។
ប្រាក់ថ្មីប្រហែល ២០០ លានដុល្លារ ត្រូវបានកំណត់សម្រាប់កម្មវិធីស្បៀងអាហារពិភពលោករបស់អង្គការសហប្រជាជាតិ ដែលបានរកឃើញថា ៩៣ ភាគរយ នៃជនជាតិអាហ្វហ្គានីស្ថាន ១ ៦០០ នាក់ ដែលបានស្ទង់មតិនៅខែសីហា និងខែកញ្ញា មិនទទួលបានអាហារគ្រប់គ្រាន់ទេ៕