នៅថ្ងៃអង្គារសប្ដាហ៌នេះ ប្រធានរដ្ឋអាជ្ញាហៃទីកំពុងស្វែងរកការ-ចោទប្រកាន់នាយករដ្ឋមន្ត្រីហៃទី លោក Ariel Henry ទាក់ទងនឹងឃាតកម្មប្រធានាធិបតីហៃទី លោក Jovenel Moise។ ប្រធានរដ្ឋអាជ្ញាចោទនាយករដ្ឋមន្ត្រីរូបនោះថា បានទាក់ទងជាមួយជនសង្ស័យដែលធ្វើឃាតលោក Moise ដែលត្រូវបានសម្លាប់កាលពីខែកក្កដា ឆ្នាំនេះ។
លោក Bed-Ford Claude រដ្ឋអាជ្ញាសហព័ន្ធបានសុំឱ្យចៅក្រមស៊ើបអង្កេតករណីឃាតកម្មរបស់ លោក Moise ដើម្បីចោទប្រកាន់លោក Henry ដែលជាប់ពាក់ព័ន្ធក្នុងករណីនេះ ដោយលោក Henry បានធ្វើការទាក់ទងជាមួយជនសង្ស័យតាមរយៈការហៅទូរស័ព្ទ។ លោក Claude ក៏បានស្នើសុំការហាមឃាត់លោក Henry ក្នុងការធ្វើដំណើរចេញពីប្រទេសហៃទី ផងដែរ។
បន្ទាប់ពីលោក Henryទទួល-រងការប្រកាន់ទាក់ទងនឹងការជាប់ពាក់ព័ន្ធនឹងឃាតកម្មប្រធានាធិបតីខ្លួនលោកក៏បានធ្វើការបដិសេធការចោទប្រកាន់នេះ។ លោក Henry បាននិយាយផងដែរថា ការចោទប្រកាន់មកលើរូបលោក គឺជាយុទ្ធសាស្ត្របង្វែរទិសដៅក្នុងគោលបំណងបង្កើតការភាន់ច្រឡំ។ នេះបើយោងតាមការស្រង់សម្តីរបស់សារព័ត៌មាន Aljazeera។
តាមការស្រង់សម្តីរបស់ប្រភពដដែលលោក Henry កាលពីថ្ងៃទី ១១ កញ្ញា បានបន្តនិយាយថា៖ «ជនល្មើស មេគំនិត និងអ្នកផ្សំគំនិតទៅលើរឿងឃាតកម្មប្រធានាធិបតីហៃទីលោក Jovenel Moise នឹងត្រូវបានកំណត់អត្តសញ្ញាណក្នុងពេលឆាប់ៗនេះដើម្បីយកមកកាត់ទោស និងផ្តន្ទាទោសតាមច្បាប់»។
ការិយាល័យការពារពលរដ្ឋហៃទីបានទាមទារឱ្យនាយករដ្ឋមន្ត្រីរបស់ខ្លួនចុះចេញពីតំណែងបន្ទាប់ពីបានជាប់ពាក់ព័ន្ធនឹងករណីឃាតកម្មលោក Moise។ ការិយាល័យនេះក៏ជំរុញលោក Henry បង្ហាញខ្លួននៅក្នុងការិយាល័យរបស់ព្រះរាជអាជ្ញាតាមការស្នើសុំដើម្បីបំភ្លឺទៅលើការចោទប្រកាន់នេះ។
តាមការស្រង់សម្តីរបស់សារព័ត៌មាន New York Times លោក Pierre Esperance សកម្មជនសិទ្ធិមនុស្សហៃទីដែលកំពុងស៊ើបអង្កេតដោយឯករាជ្យអំពីឃាតកម្មរបស់លោក Moise បាននិយាយថា៖«ពួកគេកំពុងប្រយុទ្ធដើម្បីអំណាច ហើយសត្រូវរបស់ Henry កំពុងប្រើប្រព័ន្ធតុលាការប្រឆាំងនឹងលោក»។
លោក Henry និង Joseph Badioធ្លាប់បម្រើការនៅក្រសួងយុត្តិធម៌ហៃទី និងនៅអង្គភាពប្រឆាំងអំពើពុករលួយរបស់រដ្ឋាភិបាល។ លោក Badio ត្រូវបានបណ្តេញចេញពីកាងារកាលពីខែឧសភាក្រោយពីទទួលរងការចោទប្រកាន់ពីបទរំលោភលើក្រមសីលធម៌។
តាមការបញ្ជាក់របស់លោក Claude អតីតមន្ត្រីបម្រើការនៅក្រសួងយុត្តិធម៌ទាំង ២ លោក Henry និងលោក Badio បានធ្វើការទំនាក់ទំនងគ្នាតាមរយៈការហៅទូរស័ព្ទអំឡុងម៉ោង ៤:០៣ ដល់ ៤:២០ នាទីព្រឹកម៉ោងក្នុងស្រុកនៅថ្ងៃទី ៧ កក្កដា។ លោក Claude បាននិយាយថា នៅពេលនោះលោក Badio កំពុងស្ថិតក្នុងគេហដ្ឋានរបស់លោក Moise។
គួរបញ្ជាក់ផងដែរថា ប្រធានាធិបតីហៃទីត្រូវបានធ្វើឃាតនៅក្នុងគេហដ្ឋានរបស់លោកកាលពីព្រឹកថ្ងៃទី ៧ កក្កដា។
នៅក្នុងករណីឃាតកម្មនេះមានជនសង្ស័យជាង ៤០ នាក់ ដែលក្នុងចំណោមអ្នកទាំងនោះមានអតីតទាហានកូឡុំប៊ី ១៨ នាក់ និងជនជាតិអាមេរិក-ហៃទី ៣ នាក់ ត្រូវបានចាប់ខ្លួន។ អាជ្ញាធរនៅតែស្វែងរកជនសង្ស័យបន្ថែមទៀតរួមទាំងលោក Badio និងអតីតសមាជិកព្រឹទ្ធសភាហៃទី៕