.jpg)
លោកឧត្តមសេនីយ៍ ម៉ាក មីលលី។ AFP
កាលពីដើមខែមករា ឆ្នាំនេះ ឧត្ដមសេនីយ៍កំពូលរបស់អាមេរិក បានបង្ហាញការព្រួយបារម្ភថា លោកប្រធានាធិបតី ដូណាល់ ត្រាំ មានអស្ថិរភាពផ្លូវចិត្ត ហើយបានចាត់គ្រប់វិធានការ ដើម្បីបង្ការការផ្ទុះសង្គ្រាមជាមួយចិន។ នេះបើតាមការលើកឡើងនៅក្នុងសៀវភៅចេញថ្មីមួយដោយអ្នកសារព័ត៌មានស៊ើបអង្កេតប៊ប វូដវឺដ និងរ៉ូប៊ឺត កូស្តា។
សម្រង់នៃសៀវភៅ ដែលនៅមិនទាន់ចេញផ្សាយទាំងមូលមានចំណងជើងថា «គ្រោះថ្នាក់» (Peril) ត្រូវបានចុះផ្សាយដំបូងដោយកាសែតវ៉ាស៊ីនតោនប៉ុស្តិ៍ និងទូរទស្សន៍ CNN។ សៀវភៅនេះ បានបង្ហាញប្រធាននាយសេនាធិការចម្រុះនៃកងប្រដាប់អាវុធអាមេរិក លោកនាយឧត្ដមសេនីយ៍ ម៉ាក មីលលី ជាអ្នករៀបចំចលនាទប់ទល់នឹងសកម្មភាពរបស់លោកត្រាំ នៅក្រសួងការពារជាតិ និងសហគមន៍ចារកម្មអាមេរិក។
សៀវភៅនេះ លើកឡើងថា លោក មីលលី បានបញ្ជាឱ្យជំនួយការទាំងអស់ជូនដល់លោកផ្ទាល់ ហើយពន្យារគ្រប់សកម្មភាពរបស់ពួកគេ ប្រសិនបានលោក ត្រាំ ធ្វើការបញ្ជាឱ្យប្រើប្រាស់អាវុធនុយក្លេអ៊ែររបស់អាមេរិក។
ពួកគេលើកឡើងថា លោក មីលលី បានជួបជាមួយនឹងនាយក CIA លោកស្រី ជីណា ហាស្ពែល និងនាយកទីភ្នាក់ងារសន្តិសុខជាតិលោក ផល ណាកាសូនី ដើម្បីពិភាក្សាតម្រូវការនៃការប្រុងប្រយ័ត្ន ខណៈពេលដែលមានការព្រួយបារម្ភថា លោក ត្រាំ អាចធ្វើសកម្មភាពមិនសមហេតុផល។
លោក មីលលី បានធ្វើការហៅទូរស័ព្ទទៅកាន់នាយសេនាធិការកងទ័ពចិនលោកនាយឧត្ដមសេនីយ៍លី ហ្សូឆឹងចំនួន ២ លើក នៅថ្ងៃទី ៣០ ខែតុលា មុនពេលការបរាជ័យរបស់លោកត្រាំក្នុងការបោះឆ្នោត និងនៅថ្ងៃទី ៨ មករា ២ ថ្ងៃ បន្ទាប់ពីអ្នកគាំទ្ររបស់លោក ត្រាំ ធ្វើកុបកម្មវាយលុកចូលវិមានកាពីតូល។ ក្នុងការហៅទាំងនេះ លោកមីលលី បានធ្វើការធានាថា ជំហរប្រឆាំងចិនរបស់លោក ត្រាំ នឹងមិនបង្កឱ្យមានសកម្មភាពយោធាទេ។
«ឧត្ដមសេនីយ៍លី ខ្ញុំចង់ធានាដល់លោកថា រដ្ឋាភិបាលអាមេរិកមានស្ថិរភាព ហើយអ្វីៗគ្រប់យ៉ាងនឹងមិនអីទេ» លោក មីលលី ប្រាប់លោកលីកាលពីខែតុលា ហើយបន្តទៀតថា៖ «យើងនឹងមិនវាយប្រហារ ឬធ្វើប្រតិបត្តិការប្រឆាំងអ្នកឡើយ»។ ២ ខែក្រោយមកលោកមីលលី បានទាក់ទងទៅលោកលីម្ដងទៀតដោយនិយាយថា៖ «យើងមានស្ថិរភាព ១០០ ភាគរយ។ អ្វីៗមិនអីទេ។ ប៉ុន្តែលទ្ធិប្រជាធិបតេយ្យពេលខ្លះអាចមានភាពច្របូកច្របល់»។
ដើម្បីធ្វើការធានាបន្ថែមទៀតលោក មីលលី បានបញ្ជាឱ្យពន្យារពេលការធ្វើសមយុទ្ធនៅតំបន់ឥណ្ឌូ-ប៉ាស៊ីហ្វិក ដែលអាចធ្វើឱ្យក្រុងប៉េកាំងខឹងសម្បាបន្ថែមទៀត៕
