កាលពីថ្ងៃព្រហស្បតិ៍ ទី ១៦ កញ្ញា ក្រុមតាលីបង់ បានប្តូរក្រសួងកិច្ចការនារីទៅជាក្រសួងសូត្រធម៌ និងការផ្ដល់ឱវាទហើយនិងការលើកស្ទួយនៃគុណធម៌ និងការទប់ស្កាត់នៃអំពើអាក្រក់ ( Ministries of Prayer and Guidance and the Promotion of Virtue and Prevention of Vice)។
ក្រសួងថ្មីនេះ នឹងអនុវត្តទៅលើការបកស្រាយរបស់ក្រុមតាលីបង់ស្តីពីច្បាប់ Sharia ដែលផ្តោតលើសម្លៀកបំពាក់ ការប្រើអំពើហិង្សា និងការប្រហារជីវិតជាសាធារណៈ។ ថ្វីបើឥស្សរជនជាន់ខ្ពស់តាលីបង់ បាននិយាយកាលពីថ្ងៃទី ១៣ កញ្ញាថា ស្ត្រីនឹងមិនអាចធ្វើការជាមួយបុរសក៏ដោយ ប៉ុន្តែការបកស្រាយនេះនៅមិនទាន់ច្បាស់ពីលទ្ធភាពដែលស្ត្រីអាចធ្វើការនៅក្នុងកម្រិតណាមួយនៅឡើយ។
កាលពីដើមសប្តាហ៍មុន មន្រ្តីតាលីបង់បាននិយាយថា ស្ត្រីនឹងត្រូវបានអនុញ្ញាតឱ្យបន្តការសិក្សានៅសាកលវិទ្យាល័យដរាបណាពួកគេស្លៀកពាក់សម្លៀកបំពាក់អ៊ិស្លាម ហើយថ្នាក់រៀនត្រូវបានបែងចែកតាមភេទទៀត។ ប៉ុន្តែពួកគេ មិនបានបញ្ជាក់ពីថិរវេលាជាក់លាក់ណាមួយដែលក្មេងស្រីអាហ្វហ្គានីស្ថានអាចត្រឡប់ទៅរៀនវិញបាន។
សាលាបឋមសិក្សាត្រឹមថ្នាក់ទី៦ ក្មេងស្រីអាហ្វហ្គានីស្ថាន អាចបន្តការសិក្សារបស់ពួកគេ ហើយនិស្សិតស្រីបានចូលរៀនថ្នាក់សាកលវិទ្យាល័យ ប៉ុន្តែកម្រិតវិទ្យាល័យសម្រាប់សិស្សស្រីត្រូវបានបិទ។
តាលីបង់បានប្រកាសពីរដ្ឋបាលបណ្តោះអាសន្នរបស់ពួកគេកាលពីសប្តាហ៍មុន ហើយមន្រ្តីតាលីបង់បាននិយាយថា ពួកគេនឹងមិនអនុវត្តគោលនយោបាយរបស់រដ្ឋាភិបាលតាលីបង់មុនដែលហាមឃាត់ការផ្តល់ការអប់រំទៅក្មេងស្រីឡើយ។ ក្រុមតាលីបង់ ក៏បានសន្យាថា ក្មេងស្រីនឹងអាចបន្តការសិក្សារបស់ពួកគេនៅក្នុងថ្នាក់ដាច់ដោយឡែកពីក្មេងប្រុស៕