.jpg)
គ្រូពេទ្យយកសំណាកប្រជាជនរស់នៅទីក្រុង Xiamen កាលពីថ្ងៃសៅរ៍ ខណៈមានករណីរីករាលដាលជំងឺកូវីដ ១៩។ រូបថត AFP
ទីក្រុង Xiamen ស្ថិតនៅភាគអាគ្នេយ៍នៃប្រទេសចិន កំពុងរងផលប៉ះពាល់ដោយកូវីដ ១៩ បានប្រកាសប្រាប់អ្នកស្រុក កាលពីថ្ងៃសៅរ៍ ឱ្យស្នាក់នៅផ្ទះនិងបិទខ្ទប់កន្លែងផ្សេងៗ ព្រោះគេឃើញមានករណីឆ្លងរីករាលដាលក្នុងចំណុចក្តៅមួយនៅប្រទេសក្នុងអំឡុងរដូវវិស្សមកាលប្រចាំឆ្នាំ។
រដ្ឋាភិបាលនៃទីក្រុង Xiamen បានជូនដំណឹងជាបន្តបន្ទាប់ ដល់ប្រជាពលរដ្ឋកុំឱ្យចាកចេញពីផ្ទះ បើមិនមានករណីចាំបាច់ ហើយសម្រេចបិទខ្ទប់ឧទ្យាន កន្លែងទេសភាព និងកន្លែងកីឡានានា ព្រមទាំងបញ្ឈប់សកម្មភាពមហាជនរួមទាំងដំណើរកម្សាន្ត ការតាំងពិពរណ៍និងការសម្តែងជាដើម។
ទីក្រុង Xiemen មានប្រជាជនជាង ៥ លាននាក់ គឺជាទីក្រុង ១ ក្នុងចំណោមទីក្រុងចំនួន ៤ នៅក្នុងខេត្ត Fujian ដែលជាចំណុចក្តៅនៃការរីករាលដាលមេរោគកូវីដ ១៩ ចុងក្រោយបង្អស់របស់ប្រទេសចិន ដែលគេរកឃើញករណីឆ្លងថ្មីៗ ក្នុងរយៈពេលប៉ុន្មានថ្ងៃចុងក្រោយនេះ។
អ្នកទេសចរមិនត្រូវបានឱ្យទៅចេញពីបរិវេណលំនៅឋាន ដោយមិនមានការអនុញ្ញាតឡើយ ឯការធ្វើចរាចរណ៍យានយន្តដែលមិនចាំបាច់ចូលនិងចេញពីតំបន់លំនៅដ្ឋានត្រូវបានហាមឃាត់ហើយការទទួលទានអាហារនៅភោជនីយដ្ឋាន ហាងកាហ្វេនិងកន្លែងផ្សេងទៀត ក៏ត្រូវបានហាមឃាត់ដូចគ្នា។
គួរបញ្ជាក់ផងដែរថា ចាប់តាំងពីថ្ងៃទី ១០ ខែកញ្ញា ខេត្ត Fujian បានរកឃើញករណីឆ្លងសហគមន៍ចំនួន ២៩២ ករណីហើយ៕
