ក្រុមគ្រួសារមួយ ត្រូវបានសម្លាប់នៅក្នុងយុទ្ធនាការ «សង្គ្រាមគ្រឿងញៀន» របស់ប្រទេសហ្វីលីពីន ចាប់ផ្ដើមមានក្ដីសង្ឃឹមទទួលបានយុត្តិធម៌ ក្រោយមានការអនុញ្ញាតឱ្យបើកការស៊ើបអង្កេតជាផ្លូវការមួយអំពីឧក្រិដ្ឋកម្មប្រឆាំងមនុស្សជាតិដែលអាចអនុម័តបាន ដោយចៅក្រមពីតុលាការព្រហ្មទណ្ឌអន្តរជាតិនៅដើមសប្តាហ៍នេះ។
ក្រុមសិទ្ធិមនុស្សនិយាយថា ប្រធានាធិបតីហ្វីលីពីន លោក Rodrigo Duterte បានញុះញង់ឱ្យមានអំពើហិង្សា និងបានចោទប្រកាន់ប៉ូលិសពីបទសម្លាប់ជនសង្ស័យគ្មានអាវុធក្នុងទ្រង់ទ្រាយធំដែលជាផ្នែកមួយនៃយុទ្ធនាការប្រឆាំងគ្រឿងញៀនដែលបានចាប់ផ្តើមនៅឆ្នាំ ២០១៦ ។
លោកស្រី Mary Jane Gerangcoអាយុ ៤០ ឆ្នាំ បានប្រាប់សារព័ត៌មានរ៉យទ័រនៅទីក្រុងម៉ានីលថា៖ «ខ្ញុំពិតជាសប្បាយចិត្តណាស់ ដែលមានការបើកឱ្យស៊ើបអង្កេតលើករណីសម្លាប់បងប្អូនប្រុសខ្ញុំ។ ក្តីសង្ឃឹមរបស់យើងគឺថាគ្រួសាររបស់យើងទទួលបានយុត្តិធម៌ ហើយអ្នកដែលមានកំហុសត្រូវតែទទួលខុសត្រូវ»។
បងប្អូនប្រុសរបស់លោកស្រី Gerango ត្រូវបានប៉ូលិសសម្លាប់កាលពីខែកញ្ញា ឆ្នាំ ២០១៦ បន្ទាប់ពីគេបានចោទថាជាអ្នកជួញដូរគ្រឿងញៀន។
ប៉ូលិសជាតិហ្វីលីពីនបានចេញសេចក្តីថ្លែងការណ៍មួយដោយនិយាយថា ការចោទប្រកាន់ត្រូវបានបង្ហាញម្តងហើយម្តងទៀតថាមិនពិតទេ ហើយកងកម្លាំងរបស់ប៉ូលិសមិនបានលើកលែង ឬបិទបាំងករណីរំលោភបំពាន និងទម្រង់នៃការធ្វើខុសផ្សេងទៀតនៅក្នុងជួរខ្លួនទេ។
គួរបញ្ជាក់ផងដែរថា អាជ្ញាធរបានសម្លាប់ជនសង្ស័យជាង ៦ ១០០ នាក់ ដែលជាអ្នកជួញដូរនិងអ្នកប្រើប្រាស់គ្រឿងញៀន ចាប់តាំងពីលោក Duterte ចូលកាន់តំណែងនៅខែមិថុនាឆ្នាំ ២០១៦៕