កាលពីថ្ងៃចន្ទ ទី២០ កញ្ញា រដ្ឋមន្ត្រីការបរទេសនៃបណ្ដាប្រទេសសហភាពអឺរ៉ុប បានសម្ដែងការគាំទ្រ និងសាមគ្គីភាពជាមួយនឹងប្រទេសបារាំង នៅក្នុងអំឡុងពេលនៃកិច្ចប្រជុំមួយនៅទីក្រុងញូវយ៉កដើម្បីពិភាក្សាពីការសម្រេចចិត្តរបស់អូស្ត្រាលីលុបចោលការបញ្ជាទិញនាវាមុជទឹកក្នុងតម្លៃ ៤០ពាន់លានដុល្លារជាមួយក្រុងប៉ារីស ដើម្បីជ្រើសរើសជម្រើសអាមេរិក និងអង់គ្លេសវិញ។
ថ្លែងបន្ទាប់កិច្ចប្រជុំបិទទ្វារនៅខាងក្រៅមហាសន្និបាតអង្គការសហប្រជាជាតិ ប្រធានគោលនយោបាយការបរទេសសហភាពអឺរ៉ុបលោក ចូសេប បូរេល បាននិយាយថា៖ «កិច្ចសហប្រតិបត្តិការកាន់តែច្រើន ការសម្របសម្រួលកាន់តែច្រើន ការបែកខ្ញែកកាន់តែតិច គឺសំខាន់សម្រាប់ការសម្រេចបាននូវតំបន់ឥណ្ឌូ-ប៉ាស៊ីហ្វិកដែលមានស្ថិរភាព និងសន្តិភាព»។
កាលពីសប្ដាហ៍មុន អូស្ត្រាលីបានប្រកាសលុបចោលការបញ្ជាទិញនាវាមុជទឹកដើរដោយឥន្ធនៈម៉ាស៊ូតពីបារាំង ដើម្បីចាប់ផ្ដើមសាងសង់នាវាមុជទឹកខ្លួនឯងដោយប្រើប្រាស់បច្ចេកវិទ្យាថាមពលនុយក្លេអ៊ែរចែករំលែកដោយអាមេរិក និងអង់គ្លេស បន្ទាប់ពីបានធ្វើភាពជាដៃគូសន្តិសុខជាមួយប្រទេសទាំងនោះក្រោមឈ្មោះAUKUS។
ការសម្រេចចិត្តនេះ បានធ្វើឱ្យប្រទេសបារាំងខឹងសម្បា ហើយកាលពីថ្ងៃចន្ទ រដ្ឋមន្ត្រីការបរទេសបារាំងលោកហ្សង់-អ៊ីវ ឡឺ ដ្រីអង់ បានចោទប្រកាន់រដ្ឋបាលប្រធានាធិបតីអាមេរិកលោកចូ បៃដិនថា បន្តនិន្នាការនយោបាយរបស់អ្នកកាន់តំណែងលោកដូណាល់ ត្រាំ ដូចជា «ឯកតោភាគីនិយម មិនអាចទាយទុកជាមុនបាន ឃោរឃៅ និងមិនគោរពដៃគូ»។
«យើងជាសម្ព័ន្ធមិត្ត យើងនិយាយគ្នា ហើយកុំលាក់យុទ្ធសាស្ត្រលម្អិតផ្សេងៗ។ នោះហើយជាមូលហេតុដែលមានវិបត្តិទំនុកចិត្ត» លោកឡឺ ដ្រីអង់ និយាយបែបនេះ ហើយបន្តទៀតថា៖ «ដូច្នេះអ្វីៗទាំងអស់ ត្រូវការការបំភ្លឺ និងការពន្យល់ វាអាចត្រូវការពេលវេលា»។
ប្រធានក្រុមប្រឹក្សាអឺរ៉ុបលោកឆាល មីសែល បាននិយាយថា លោកពិបាកយល់ពីការសម្រេចចិត្តរបស់អូស្ត្រាលី អង់គ្លេស និងអាមេរិក។
លោកនិយាយនៅទីក្រុងញូវយ៉កថា៖ «ហេតុអ្វី? ពីព្រោះជាមួយរដ្ឋបាលថ្មីរបស់ចូ បៃដិន អាមេរិកត្រឡប់មកវិញហើយ។ នេះគឺជាសារប្រវត្តិសាស្ត្រដែលផ្ញើដោយរដ្ឋបាលថ្មីនេះ ហើយឥឡូវនេះយើងមានសំណួរ។ តើវាមានន័យយ៉ាងដូចម្ដេច – អាមេរិកត្រឡប់មកវិញហើយ តើអាមេរិកត្រឡប់មកវិញនៅអាមេរិក ឬនៅកន្លែងផ្សេងទៀត? យើងមិនដឹងទេ»។
លោកនិយាយថាប្រសិនបើចិនជាការផ្តោតសំខាន់សម្រាប់វ៉ាស៊ីនតោននោះវាពិតជា«ចម្លែកខ្លាំងណាស់» សម្រាប់សហរដ្ឋអាមេរិកក្នុងការសហការជាមួយអូស្ត្រាលី និងអង់គ្លេស ដោយនិយាយថា ការសម្រេចចិត្តនេះអាចធ្វើឱ្យសម្ព័ន្ធភាពអាត្លង់ទិកទន់ខ្សោយ។
មន្ត្រីជាន់ខ្ពស់ មកពីសហរដ្ឋអាមេរិក និងសហភាពអឺរ៉ុបនឹងត្រូវជួបប្រជុំគ្នានៅទីក្រុងភីតសបឺគរដ្ឋផេនស៊ីលវ៉ានីសហរដ្ឋអាមេរិកនៅចុងខែនេះ សម្រាប់កិច្ចប្រជុំបើកសម្ពោធក្រុមប្រឹក្សាពាណិជ្ជកម្មនិងបច្ចេកវិទ្យាអាមេរិក-សហភាពអឺរ៉ុប ដែលទើបបង្កើតថ្មី ប៉ុន្តែលោកមីសែលបាននិយាយថា សមាជិកសហភាពអឺរ៉ុបខ្លះ កំពុងជំរុញឱ្យមានការពន្យារពេលកិច្ចប្រជុំនេះ៕