ជនសកម្មប្រយុទ្ធប៉ាឡេស្ទីន ៦ នាក់ ដែលបានរត់គេចខ្លួនចេញពីគុកមានសន្តិសុខយាមកាមយ៉ាងតឹងរ៉ឹងរបស់អ៊ីស្រាអែលតាមផ្លូវរូងក្រោមដីដែលជីកនៅក្រោមអាងទឹកមួយ ត្រូវបានចាប់ឃុំខ្លួនយកមកវិញ បន្ទាប់ពីកងទ័ពបាននិយាយកាលពីថ្ងៃអាទិត្យថា ខ្លួនចាប់បានអ្នកទោស ២ នាក់ចុងក្រោយ។
អ្នកទោសដែលត្រូវបានឃុំខ្លួនពីបទការវាយប្រហារប្រឆាំងនឹងរដ្ឋជ្វីហ្វ បានក្លាយជាវីរបុរសក្នុងចំណោមប្រជាជនប៉ាឡេស្ទីនជាច្រើននៅពេលដែលរបាយការណ៍ជាច្រើនបានលេចចេញថា ពួកគេបានប្រើឧបករណ៍ជាមូលដ្ឋានមានដូចស្លាបព្រាជាដើម។
កងកម្លាំងសន្តិសុខរបស់អ៊ីស្រាអែល ត្រូវបានដាក់ពង្រាយដើម្បីចាប់ពួកគេរួមទាំងយន្តហោះដ្រូនបើកពីលើប៉ុស្តិ៍ត្រួតពិនិត្យតាមផ្លូវ និងបេសកកម្មកងទ័ពទៅកាន់ទីក្រុង Jenin នៅក្នុងតំបន់វេសប៊ែង ដែលកាន់កាប់ដោយអ៊ីស្រាអែល។
ការតាមចាប់ខ្លួនពួកគេមានរយៈពេល ១៤ ថ្ងៃ ដោយអ្នកលួចរត់ ៤ នាក់ដំបូង ត្រូវបានចាប់ខ្លួនមកវិញកាលពីសប្តាហ៍មុន។
កងកម្លាំងការពារអ៊ីស្រាអែលបាននិយាយកាលពីថ្ងៃអាទិត្យថា នៅសល់ ២ នាក់ចុងក្រោយបានប្រគល់ខ្លួនក្រោយពីត្រូវបានឡោមព័ទ្ធដោយកងសន្តិសុខដែលបានធ្វើសកម្មភាពភ្លាមៗ ដោយពឹងផ្អែកលើការស៊ើបអង្កេតយ៉ាងច្បាស់លាស់។
លោក Ayham Kamamji មានអាយុ ៣៥ ឆ្នាំ និងលោក Munadel Infeiat អាយុ ២៦ ឆ្នាំ គឺជាសមាជិកនៃក្រុមជីហាដអ៊ិស្លាម ជាចលនាអ៊ិស្លាមប៉ាឡេស្ទីនប្រដាប់អាវុធ។
ក្រុមជីហាដអ៊ិស្លាម បានស្វាគមន៍វីរបុរសរបស់ខ្លួន បន្ទាប់ពីត្រូវបានចាប់ខ្លួនជាថ្មី ដោយបានប្តេជ្ញាថា ប្រជាជនប៉ាឡេស្ទីនមិនប្រគល់ខ្លួនជាការឆ្លើយតបនឹងអំពើឧក្រិដ្ឋកម្ម និងការឈ្លានពានរបស់អ៊ីស្រាអែលនោះទេ។
សេចក្តីថ្លែងការណ៍របស់កងទ័ពបានឱ្យដឹងថា គេទាំង ២ នាក់ ត្រូវបានចាប់ខ្លួនក្នុងកិច្ចប្រតិបត្តិការរួមរបស់កងទ័ពជាមួយកងកម្លាំងប្រឆាំងភេរវកម្មនៅក្នុងទីក្រុង Jenin ហើយបច្ចុប្បន្ននេះ កំពុងត្រូវបានសួរចម្លើយ។
សេចក្តីថ្លែងការណ៍នោះបាន ឱ្យដឹងទៀតថា បុរស ២ នាក់ផ្សេងទៀត ដែលតាមការសង្ស័យ បានជួយអ្នកលួចរត់ជាច្រើននាក់ ក៏ត្រូវបានចាប់ឃុំខ្លួនមកវិញដែរ។
លោក Taleb Abo Jaafar ដែលមានផ្ទះនៅក្នុងទីក្រុង Jenin ជាទីដែលអ្នកលួចរត់ ២ នាក់ ត្រូវបានរកឃើញនោះ បាននិយាយថា លោកមានការភ្ញាក់ផ្អើលយ៉ាងខ្លាំង នៅពេលឃើញផ្ទះត្រូវបានគេដាក់ខ្សែព័ទ្ធទាំងកណ្តាលយប់នោះ។
លោកបានប្រាប់សារព័ត៌មាន AFP ថា៖ «មានការបាញ់នៅជុំវិញផ្ទះនោះ។ ខ្ញុំបានចេញមកក្រៅដើម្បីមើលថា តើអ្វីបានកើតឡើង? ខ្ញុំបានបើកទ្វារហើយសម្លឹងមើលទៅតាមផ្លូវមានកងកម្លាំងជាច្រើននៅខាងក្រៅ ហើយពួកគេបានប្រាប់ខ្ញុំឱ្យចូលទៅក្នុងផ្ទះវិញ»។
នៅក្នុងការសន្ទនាតាមទូរស័ព្ទជាមួយប្រធានសន្តិសុខអ៊ីស្រាអែលលោកនាយករដ្ឋមន្ត្រី ណាហ្វតាលី បេននិត បានចាត់ទុកការលួចរត់ចេញពីគុកថា ជាព្រឹត្តិការណ៍ដ៏អាក្រក់បំផុត។
លោកបានបន្ថែមថា៖ «អ្នកទាំងអស់គ្នា (ប្រធានសន្តិសុខ) ត្រូវនៅជាមួយកងកម្លាំងចម្រុះ រហូតដល់បេសកកម្មនេះចប់សព្វគ្រប់ ដោយបានប្តេជ្ញានៅក្នុងសេចក្តីថ្លែងការណ៍ដាច់ដោយឡែកមួយថា ស្ថាប័នសន្តិសុខនឹងកែតម្រូវអ្វីដែលចាំបាច់ ធ្វើយ៉ាងណាឱ្យបានល្អប្រសើរឡើង»។
អ្នកលួចរត់ទាំង ៦ នាក់នោះ គឺជាសមាជិកនៃក្រុមជនសកម្មប្រយុទ្ធប៉ាឡេស្ទីនដែលត្រូវបានផ្តន្ទាទោសដោយតុលាការអ៊ីស្រាអែលពីការរៀបចំផែន ឬវាយប្រហារប្រឆាំងអ៊ីស្រាអែល។
អ្នកស្រុកបាននិយាយថា ប៉ាឡេស្ទីននៅក្នុងទីក្រុង Jenin បានប៉ះទង្គិចជា-មួយកងទ័ពអ៊ីស្រាអែល ខណៈពួកគេបានវាយប្រហារទីក្រុងនេះ កាលពីព្រឹកថ្ងៃអាទិត្យ។ ចំណែកយោធាអ៊ីស្រាអែលបាននិយាយថា ការប៉ះទង្គិចបានកើតឡើង ខណៈកងកម្លាំងបានដកចេញ ដោយអ្នកស្រុកបានគប់ដុំថ្ម និងគ្រឿងផ្ទុះទៅលើកងទ័ព ដែលបានឆ្លើយតបវិញ ដោយការបាញ់គ្រាប់ពិត៕