ប្រទេសប៊ូរុនឌី កាលពីថ្ងៃអង្គារ បានប្តេជ្ញាធ្វើការស៊ើបអង្កេតឱ្យបានហ្មតចត់ទៅលើករណីបំផ្ទុះគ្រាប់បែកដៃ «ភេរវកម្ម» បណ្តាលឱ្យមនុស្សស្លាប់យ៉ាងច្រើនដែល បានធ្វើឱ្យប៉ះពាល់ដល់រដ្ឋធានីសេដ្ឋកិច្ច Bujumbura។
ការវាយប្រហារកាលពីល្ងាចថ្ងៃចន្ទ បានកើតឡើងបន្ទាប់ពីការបំផ្ទុះគ្រាប់បែកមួយនៅក្នុងបារ៍មួយនៅក្នុងរដ្ឋធានី Gitega កាលពីថ្ងៃអាទិត្យ និងគ្រាប់កាំភ្លើងត្បាល់ជាច្រើនគ្រាប់ ត្រូវបានគេបាញ់ទៅលើព្រលានយន្តហោះប៊ូរុនឌី កាលពីយប់ថ្ងៃសៅរ៍។
ក្រសួងមហាផ្ទៃបានឱ្យដឹងនៅក្នុងសេចក្តីថ្លែងការណ៍មួយថា មនុស្ស ២ នាក់បានស្លាប់ នៅពេលភេរវករមិនស្គាល់អត្តសញ្ញាណ បានគប់គ្រាប់បែកជាច្រើនគ្រាប់ទៅលើចំណតរថយន្តមួយនៅក្នុងទីក្រុង Bujumbura និងនៅក្បែរផ្សារមួយកាលពីយប់ថ្ងៃចន្ទ។
ប្រភពសុខាភិបាល និងសន្តិសុខបានប្រាប់សារព័ត៌មាន AFP ថា មនុស្ស ៣ នាក់បានស្លាប់ ខណៈដែលលោកនាយករដ្ឋមន្ត្រី Alain-Guillaume Bunyoni បាននិយាយថា មនុស្សជាង ១០០នាក់ បានរងរបួស។
ក្រសួងបានឱ្យដឹងថា ខ្លួនបានថ្កោលទោសការវាយប្រហារគ្រាប់បែកយ៉ាងសាហាវព្រៃផ្សៃនេះ បានសន្យាធ្វើការស៊ើបអង្កេតឱ្យបានហ្មត់ចត់ទៅលើសកម្មភាពភេរវកម្មដ៏កំសាកបែបនេះ។
មិនមានការអះអាងទទួលខុសត្រូវចំពោះការវាយប្រហារគ្រាប់បែកនៅទីក្រុង Bujumbura ឬនៅបារ៍ ក្នុង Gitega កាលពីថ្ងៃអាទិត្យ ដែលបានបណ្តាលឱ្យមនុស្ស ២ នាក់ស្លាប់នោះទេ។
ការវាយប្រហារគ្រាប់បែកទាំងនោះ បានកើតឡើងបន្ទាប់ពីការវាយប្រហារកាំភ្លើងត្បាល់ទៅលើព្រលានយន្តហោះ Bujumbura កាលពីថ្ងៃសៅរ៍ ដែលត្រូវបានអះអាងដោយក្រុមឧទ្ទាម RED-Tabara នៅក្នុងសេចក្តីថ្លែងការណ៍មួយនៅលើធ្វីធើរ។
មិនមាននរណាម្នាក់រងរបួសនៅក្នុងការវាយប្រហារដែលត្រូវបានធ្វើឡើង ១ ថ្ងៃ មុនពេលលោកប្រធានាធិបតី Evariste Ndayishimiye ឡើងយន្តហោះទៅចូលរួមមហាសន្និបាត UN នៅក្នុងទីក្រុងញូវយ៉ក។
មន្ត្រីជាន់ខ្ពស់ប៊ូរុនឌីម្នាក់ បាននិយាយក្នុងលក្ខខណ្ឌអនាមិកថា៖ «ការវាយប្រហារទាំងនេះត្រូវបានធ្វើឡើងដោយសត្រូវនៃសន្តិភាពដែលចង់បង្ហាញថា រយៈពេល ៣ ថ្ងៃ គ្មានសន្តិភាពនៅក្នុងប្រទេសប៊ូរុនឌី នៅពេលដែលលោកប្រធានាធិបតី Ndayishimiye នៅឯមហាសន្និបាតUNនោះ»។
«ប៉ុន្តែពួកគេយល់ច្រឡំ។ ស្ថានការណ៍នេះត្រូវគ្រប់គ្រងបាន ថ្វីបើមានការផ្ទុះបន្តិចបន្តួចក្តី»។
RED-Tabara ដែលមានមូលដ្ឋាននៅក្នុងតំបន់ Kivu ភាគខាងត្បូងក្នុងសា-ធារណរដ្ឋប្រជាធិបតេយ្យកុងហ្គោ បានលេចឡើង ១០ ឆ្នាំកន្លងទៅហើយ ហើយបច្ចុប្បន្ននេះ គឺក្រុមឧទ្ទាមសកម្មនៅក្នុងប្រទេសប៊ូរុនឌី។
ក្រុមឧទ្ទាមនេះ ត្រូវបានគេចោទប្រកាន់ថា បាននៅពីក្រោយការវាយប្រហារជាច្រើន ឬពួនស្ទាក់វាយប្រហារនៅទូទាំងប្រទេសអាហ្វ្រិកខាងកើត ចាប់តាំងពីឆ្នាំ ២០១៥ មកម្ល៉េះ។
នៅក្នុងឆ្នាំ ២០២០ ក្រុមនេះ បាននិយាយថា ខ្លួននៅពីក្រោយការវាយប្រហារជាបន្តបន្ទាប់ ដែលបានបណ្តាលឱ្យមនុស្សជាង ៤០ នាក់ មកពីកងសន្តិសុខ និងសម្ព័ន្ធយុវជននៃគណបក្ស CNDD-FDD ដែលកំពុងគ្រប់គ្រងអំណាចស្លាប់។
រដ្ឋាភិបាលប៊ូរុនឌី និងអ្នកការទូតជាច្រើនបានជឿថា នៅពេលនេះក្រុមឧទ្ទាមនេះតាមការប៉ាន់ស្ថានមានសមាជិកពី ៥០០-៨០០ នាក់ ត្រូវបានដឹកនាំដោយអ្នកប្រឆាំងម្នាក់ក្នុងចំណោមអ្នកប្រឆាំងជាច្រើននៃប្រទេសនេះគឺ លោក Alexis Sinduhije ដែលជានិច្ចកាលបដិសេធការអះអាងទទួលខុសត្រូវ៕