ប្រជាជនហៃទីដែលសហរដ្ឋអាមេរិកបញ្ជូនទៅប្រទេសហៃទីវិញ ត្រូវចាប់ផ្តើមជីវិតរបស់ខ្លួនថ្មីនៅលើទឹកដីកំណើតរបស់ខ្លួន។ ជនអន្តោប្រវេសន៍ហៃទីដែលបានធ្វើដំណើរទៅព្រំដែនសហរដ្ឋអាមេរិកដោយខុសច្បាប់ត្រូវបានបញ្ជូនទៅស្រុកខ្លួនវិញ ទោះបីជាពួកគេបានចាកចេញពីទីកន្លែងកំណើត ដើម្បីសាងជីវិតថ្មីនៅប្រទេសដទៃ ដើម្បីចៀសវាងភាពលំបាកក្នុងប្រទេសកំណើតក្ដី។
ជនអន្តោប្រវេសន៍ហៃទីដែលត្រូវបានអាមេរិកបញ្ដេញចេញ ភាគច្រើនជាអ្នកដែលបានចាកចេញពីប្រទេសហៃ ទីតាំងពីយូរណាស់មកហើយ។ អ្នកដែលត្រូវបានបញ្ជូនទៅប្រទេសហៃទីវិញ ត្រូវចាប់ផ្តើមជីវិតរបស់ខ្លួនពីចំណុចសូន្យទៅដោយសារពួកគេបានលក់ទ្រព្យសម្បត្តិរបស់ពួកគេដែលរកបាននៅលើទឹកដីបរទេស ដើម្បីមានប្រាក់ក្នុងការធ្វើដំណើរមកសហរដ្ឋអាមេរិក។
លោក Nicodeme Vyles អាយុ ៤៥ ឆ្នាំ ជាជនអន្តោប្រវេសន៍មួយក្នុងចំណោមជនអន្តោប្រវេសន៍ជាង ១០ ម៉ឺននាក់ទៀតបាននិយាយថា៖ «ខ្ញុំគិតថា សហរដ្ឋអាមេរិកជាប្រទេសធំមួយដែលមានច្បាប់។ ពួកគេបានធ្វើបាបយើង[ជនអន្តោប្រវេសន៍]យ៉ាងខ្លាំង»។ នេះបើតាមការស្រង់សម្តីរបស់សារព័ត៌មាន New York Times។
តាមការស្រង់របស់ប្រភពដដែល លោក Vyles បានបន្តនិយាយថា លោកមិនបានផ្តល់កិច្ចសម្ភាសន៍ជាមួយភ្នាក់ងារអន្តោប្រវេសន៍ទេ។ លោកបានសម្តែងការព្រួយបារម្ភពីការរស់នៅរបស់លោកក្រោយពីត្រូវបានសហរដ្ឋអានេរិកបញ្ជូនលោកមកហៃទីវិញ។ លោកបានចាកចេញពីប្រទេសហៃទីមកតាំងលំនៅលើទឹកដីប្រទេសប៉ាណាម៉ា តាំងពីឆ្នាំ ២០០៣ ដោយប្រកបរបរជាជាងដែកនិងជាងឈើ។
ចំណែកលោក Aminadel Glezil អាយុ ៣១ ឆ្នាំ ត្រូវបានបញ្ជូនមកដល់ប្រទេសហៃទីកាលពីថ្ងៃទី ១៩ កញ្ញា បាននិយាយថា អំឡុងពេលដែលលោកត្រូវបានគេបញ្ជូនមកប្រទេសហៃទី អ្នកទាំងនោះ មិនបានចាត់ទុកលោកជាមនុស្សទេ។
លោក Glezil បាននិយាយថា លោកបានលក់ផ្ទះរបស់លោកនៅទីក្រុង Paine ប្រទេសស៊ីលី រួមជាមួយគ្រឿងសង្ហារិម និងឡានទាំងអស់របស់លោក ធ្វើដំណើរជាមួយប្រពន្ធ និងកូន ២ នាក់ដើម្បីទៅព្រំដែនអាមេរិក។
គួរបញ្ជាក់ផងដែរថា សហរដ្ឋអាមេរិកបានសម្រេចបញ្ជូនជនអន្តោប្រវេសន៍ហៃទីខុសច្បាប់ទៅប្រទេសកំណើតវិញ ក្រោយពីកំណើនជនអន្តោប្រវេសន៍ បានកើនឡើងកាលពីសប្តាហ៍មុនមកទឹកដីសហរដ្ឋអាមេរិក។
កាលពីថ្ងៃចន្ទ លោកAlejandro N. Mayorkas រដ្ឋមន្ត្រីក្រសួងសន្តិសុខមាតុភូមិអាមេរិកបាននិយាយថា ខណៈពេលដែលសហរដ្ឋអាមេរិកបានពង្រីកការការពារដល់ជនជាតិហៃទីដែលបានមកដល់ប្រទេសនេះមុនថ្ងៃទី ២៩ កក្កដា អ្នកដែលមកដល់អាមេរិកពេលនេះនឹងមិនត្រូវបានទទួលការការពារឡើយ។
លោក Mayorkas បាននិយាយនៅក្នុងសន្និសីទសារព័ត៌មានមួយនៅទីក្រុង Del Rio រដ្ឋតិចសាសថា៖ «យើងមានការព្រួយបារម្ភយ៉ាងខ្លាំងដោយជនជាតិហៃទី ដែលកំពុងធ្វើដំណើរមកកាន់ទឹកដីសហរដ្ឋអាមេរិកដោយសារពួកគេទទួលបានព័ត៌មានមិនពិត»។
លោកបានបន្តនិយាយថា ជនអន្តោប្រវេសន៍ហៃទី បានទទួលព័ត៌មានមិនពិតដែលថា ព្រំដែនត្រូវបានបើក។លោកបាននិយាយថា៖ «ការព្យាយាមចូលទឹកដីអាមេរិកដោយខុសច្បាប់ គឺមិនសមនឹងតម្លៃថវិកាដែលពួកគេបានចំណាយ»៕