.jpg)
ឧបករណ៍តេស្តរហ័ស។ ហុង មិនា
ជនជាតិអាមេរិករាប់លាននាក់ កំពុងប្រឈមមុខនឹងបញ្ហាខ្វះឧបករណ៍តេស្តកូវីដ បើទោះបីជាបច្ចេកវិទ្យាផលិតឧបករណ៍ទាំងនេះ បាននិងកំពុងប្រើប្រាស់នៅប្រទេសអឺរ៉ុបខាងលិចច្រើនយ៉ាងណាក្ដី។
ការធ្វើតេស្តរហ័សដែលត្រូវបានគេស្គាល់ជាផ្លូវការថា តេស្តអង់ទីគ័របានផ្ដល់លទ្ធផលដល់អ្នកធ្វើតេស្តតែក្នុងរយៈពេលតែប៉ុន្មាននាទីប៉ុណ្ណោះ ដែលលទ្ធផលទាំងនេះ អាចជួយដល់អ្នកឆ្លងដឹងពីស្ថានភាព ហើយសម្រាកព្យាបាលនៅផ្ទះនិងដាក់ឱ្យនៅដាច់ពីគេ ចៀសវាងចម្លងទៅអ្នកដទៃ។
ឧទាហរណ៍នៅចក្រភពអង់គ្លេស បារាំង និងអាល្លឺម៉ង់ ការធ្វើតេស្តរហ័សនេះ អាចរកបាននៅគ្រប់ទីកន្លែង និងមានតម្លៃថោក ដោយសារការឧបត្ថម្ភថវិកាពីរដ្ឋាភិបាល។ ប្រជាជនអាចទស្សនាកន្លែងធ្វើតេស្ត ដូចជាតង់នៅខាងក្រៅឱសថស្ថាននៅប្រទេសបារាំង ឬក្លិបរាត្រី ដែលបោះបង់ចោលនៅអាល្លឺម៉ង់ ហើយការធ្វើតេស្តនេះមិនគិតថ្លៃទេ។ ប្រជាជនជាច្រើនផ្សេងទៀត ក៏បានទុកឧបករណ៍ទាំងនេះនៅផ្ទះ ដើម្បីធ្វើតេស្តខ្លួនឯងផងដែរ។
ផ្ទុយទៅវិញ នៅសហរដ្ឋអាមេរិកប្រជាជនតែងតែធ្វើតេស្តប្រភេទផ្សេង ដែលត្រូវបានគេស្គាល់ថា ម៉ាស៊ីនវិភាគរកមេរោគកូវីដ ១៩ ឬ P.C.R. តេស្ត ដែលត្រូវដំណើរការដោយមន្ទីរពិសោធន៍ ហើយលទ្ធផលត្រូវចំណាយពេលលើសពី ២៤ ម៉ោង។ ក្នុងអំឡុងពេលនោះមនុស្សម្នាក់ដែលឆ្លងកូវីដអាចចម្លងទៅអ្នកដទៃបានរួចទៅហើយ។
បញ្ហាកង្វះតេស្តនៅអាមេរិក អាចនឹងរួមចំណែកដល់ការរីករាលដាលនៃមេរោគ។ ការផ្ទុះឡើងថ្មីៗនេះ គឺអាក្រក់ជាងនៅអឺរ៉ុបទៀត បើទោះបីអត្រាចាក់វ៉ាក់សាំងនៅអឺរ៉ុបខ្ពស់ជាងបន្តិចក៏ដោយ។
លោកស្រី Stefanie Friedhoff សាស្រ្តាចារ្យនៅសាលាសុខភាពសាធារណៈនៃសាកលវិទ្យាល័យ Brown ថ្មីៗនេះបានវិលត្រឡប់មកពីដំណើរទស្សនកិច្ចទៅកាន់ប្រទេសអាល្លឺម៉ង់ ហើយបានសរសេរនៅលើ Twitter អំពីអត្ថប្រយោជន៍ ជាច្រើននៃការធ្វើតេស្តរហ័សដែលលោកស្រីបានឃើញ។
លោកស្រីបានសរសេរថា៖ «ស្រមៃមើលប្រសិនបើការធ្វើតេស្តថោកនៅគ្រប់ទីកន្លែង និងអាចធ្វើបាននៅសហរដ្ឋអាមេរិកមិនដឹងជាល្អប៉ុនណាទេ។ ខ្ញុំពិបាកយល់ដែរ ដែលសហរដ្ឋអាមេរិកបរាជ័យក្នុងការចែកចាយនូវឧបករណ៍ធ្វើតេស្តនេះ»។
អ្នកជំនាញផ្សេងទៀតកំពុងរិះគន់រដ្ឋបាលលោក Joe Biden ចំពោះការបរាជ័យក្នុងការចែកចាយឧបករណ៍ធ្វើតេស្តនេះដែរ។ ទោះបីជាប្រធានាធិបតី Biden បានអនុវត្តតាមគោលនយោបាយកូវីដស្របតាមភ័ស្តុតាងវិទ្យាសាស្ត្រប្រសើរជាងលោក Donald Trump ក៏ដោយប៉ុន្តែលោក មិនបានអនុវត្តទៅតាមវិធីយ៉ាងណា ដើម្បីធ្វើឱ្យប្រទេសនេះរួចផុតពីវិបត្តិកូវីដឆាប់ៗឡើយ។
នៅក្នុងករណីនៃការធ្វើតេស្តរហ័សនេះ រដ្ឋបាលចំណីអាហារនិងឪសថ (FDA) បានបន្ធូរបន្ថយច្បាប់របស់ខ្លួន កាលពីឆ្នាំមុនដែលអនុញ្ញាតឱ្យមានការលក់ការធ្វើតេស្តអង់ទីគ័រមួយចំនួន (ដែលជារឿយៗមានតម្លៃប្រហែល ១២ ដុល្លារ ក្នុង ១ ដង)។ ប៉ុន្តែនៅកន្លែងលក់ថ្នាំ លើអាម៉ាហ្សូន និងអ្នកលក់ផ្សេងទៀត សុទ្ធតែលក់ចេញអស់ពីស្ដុកទៅហើយ។
ដំណើរការរបស់រដ្ឋបាល FDA សម្រាប់ការអនុម័តការធ្វើតេស្តរហ័សគឺមានលក្ខណៈ «គួរឱ្យធុញទ្រាន់» និង «មិនសមរម្យ»។ នេះបើតាមឱ្យដឹងពីលោក Daniel Oran និងវេជ្ជបណ្ឌិត Eric Topol នៅវិទ្យាស្ថានស្រាវជ្រាវ Scripps សរសេរនៅក្នុងសារព័ត៌មាន Stat News។
ភាគច្រើនរដ្ឋបាល FDA នៅតែប្រើដំណើរការស្មុគស្មាញដដែល ដើម្បីអនុម័តការធ្វើតេស្តកូវីដ ដែលត្រូវប្រើសម្រាប់ឧបករណ៍វេជ្ជសាស្ត្របច្ចេកវិទ្យាខ្ពស់។ ដើម្បីឆ្លងផុតដំណាក់កាលនេះ ការធ្វើតេស្តរហ័ស ត្រូវតែបង្ហាញថា ពួកគេមានភាពចំណុចពិសេសដូច ការធ្វើតេស្តតាមរយៈម៉ាស៊ីនវិភាគរកមេរោគកូវីដ ១៩ ដែរ ឬយ៉ាងណា។
បើទោះជា ការធ្វើតេស្តរហ័សអាចកំណត់អត្តសញ្ញាណប្រហែល ៩៨ ភាគរយនៃករណី ដែលមនុស្សម្នាក់ឆ្លងមេរោគនេះក្ដី ប៉ុន្តែវានៅ តែមានប្រសិទ្ធភាពក្នុងការកំណត់រោគសញ្ញា និងមេរោគនៅក្នុងខ្លួនមនុស្ស។ នេះបើយោងតាមវេជ្ជបណ្ឌិត Michael Mina អ្នកជំនាញរោគរាតត្បាតនៅសាកលវិទ្យាល័យ Harvard ដែលបានតស៊ូមតិដើម្បីឱ្យមានការធ្វើតេស្តនេះបន្ថែម។
បន្ថែមពីនេះ ការកំណត់រោគសញ្ញាបានជិត ៩៨ ភាគរយនៃករណីឆ្លង អាចជួយទប់ស្កាត់ការរីករាលដាលរបស់កូវីដ។ ការវិភាគមួយនៅក្នុងទិនានុប្បវត្តិវិទ្យាសាស្ត្រ Advance បានរកឃើញថា ហ្វ្រេកង់តេស្តដូចឧបករណ៍តេស្តរហ័ស មានសារៈសំខាន់សម្រាប់កាត់បន្ថយករណីកូវីដជាង តេស្តតាមបែបម៉ាស៊ីន។
ទោះយ៉ាងណាក្ដី ប្រធានាធិបតីលោក Joe Biden កំពុងចាប់ផ្ដើមទិញឧបករណ៍ធ្វើតេស្តនៅផ្ទះ ឱ្យបានច្រើនជាងមុនរាប់លាន ដើម្បីជួយទប់ស្កាត់រលកចុងក្រោយនៃជំងឺរាតត្បាតកូវីដ ១៩ ក្រោយពេលឧបករណ៍ទាំងនេះចែកចាយអស់ពីស្ដុកពាសពេញប្រទេស៕
