.jpg)
ប្រជាជនកាន់ទង់ជាតិស៊ីលីតវ៉ាប្រឆាំងជនចំណាកស្រុកខុសច្បាប់នៅកំពង់ផែ Iquique កាលពីថ្ងៃទី ២៥ កញ្ញា។ AFP
មនុស្សប្រហែល ៣ ០០០ នាក់ ដើរក្បួនកាលថ្ងៃសៅរ៍សប្ដាហ៍មុននៅទីក្រុងកំពង់ផែ Iquique ភាគខាងជើងប្រទេសស៊ីលី ដើម្បីធ្វើការតវ៉ាប្រឆាំងនឹងជនអន្តោប្រវេសន៍វ៉េណេស៊ុយអេឡាខុសច្បាប់ដោយបាតុករខ្លះវាយតប់ និងដុតបំផ្លាញទ្រព្យសម្បត្តិនៅជំរំជនអន្តោប្រវេសន៍ផង។
ក្រុមបាតុករដង្ហែក្បួន ដោយស្រែកថា «គ្មានជនអន្តោប្រវេសន៍ខុសច្បាប់ទៀតឡើយ» និងច្រៀងចម្រៀងប្រចាំតំបន់ក៏ដូចជាចម្រៀងជាតិរបស់ស៊ីលីដោយព្រមានថា «ស៊ីលី គឺជាសាធារណរដ្ឋមួយដែលត្រូវគោរព»។ ក្រុមបាតុករដើរក្បួនពីទីប្រជុំជនចាស់នៃក្រុង Iquique ប្រហែល ១០ ប្លុក ឆ្ពោះទៅកាន់សណ្ឋាគារនិងអាផាតមិននៅជាប់នឹងមាត់មហាសមុទ្រប៉ាស៊ីហ្វិក ហើយអ្នកជ្រុលនិយមមួយចំនួនបានដុតបំផ្លាញរបស់របរមួយចំនួនដូចជាតង់ពូកកាបូបភួយ និងប្រដាប់ក្មេងលេងនៅជំរំជនអន្តោប្រវេសន៍ដែលគ្មានមនុស្សនៅ។
ប៉ូលិសចូលទៅបំបែកការវាយតប់គ្នាតូចតាចមួយចំនួនដែលខ្លួននិយាយថាជនជាតិស៊ីលីជាអ្នកបង្កហេតុ ដោយវាយប្រហារជនអន្តោប្រវេសន៍វ៉េណេស៊ុយអេឡាដែលរស់នៅតាមផ្លូវ។ ក្រុមអ្នកសារព័ត៌មាន AFP និយាយថា ជនអន្តោប្រវេសន៍ដើរជុំវិញក្រុងតាំងពីព្រឹកថ្ងៃសៅរ៍ ដើម្បីព្យាយាមរកកន្លែងដែលខ្លួនអាចធ្វើការបោះជំរំ។
បាតុកម្មនេះកើតឡើង ១ ថ្ងៃ បន្ទាប់ពីប៉ូលិសជម្លៀសជំរំជនអន្តោប្រវេសន៍ក្នុងទីលានក្រុង។ ជនអន្តោប្រវេសន៍ទាំងនេះភាគច្រើនក្រីក្រគ្មានឯកសារស្របច្បាប់ និងមានរបរមិនច្បាស់លាស់។ លោក Jose Miguel Carvajal អភិបាលនៃតំបន់ Tarapaca និយាយថាគ្រួសាររាប់រយ ដែលរស់នៅលើទីលាន កំពុងដើរនៅទីសាធារណៈផ្សេងៗគ្នាដោយព្យាយាមដំឡើងតង់នៅលើឆ្នេរខ្សាច់ឬនៅក្នុងតំបន់ឧស្សាហកម្មរបស់ទីក្រុង។
ស៊ីលី គឺជាប្រទេសអ្នកមានបំផុតនៅអាមេរិកឡាទីនតាមស្តង់ដាជាមធ្យមក្នុងមនុស្សម្នាក់។ ចំណែកឯវ៉េណេស៊ុយអេឡាវិញស្ថិតនៅក្នុងវិបត្តិសេដ្ឋកិច្ចនិងនយោបាយ បង្ខំឱ្យមនុស្សរាប់លាននាក់ចេញពីប្រទេស។ អតិផរណារបស់ប្រទេសនេះ កើនឡើងដល់ ៣ ពាន់ភាគរយ៕
ហួន ឌីណា
