.jpg)
មន្រ្តីម៉ាលីនិយាយកាលពីថ្ងៃសៅរ៍ថា អតីតវរសេនីយ៍ឯកកងទ័ពរ៉្វាន់ដាលោក Théoneste Bagosora ដែលត្រូវបានផ្តន្ទាទោសចំពោះតួនាទីរបស់លោកក្នុងអំពើប្រល័យពូជសាសន៍ឆ្នាំ១៩៩៤ បានស្លាប់ក្នុងពន្ធនាគារនៅប្រទេសម៉ាលីក្នុងអាយុ ៨០ ឆ្នាំដោយសារបញ្ហាបេះដូង។
អតីតអ្នកនយោបាយរូបនេះគឺជាឥស្សរជនជាន់ខ្ពស់ម្នាក់នៅក្នុងក្រសួងការពារជាតិរ៉្វាន់ដានៅពេលមានការសម្លាប់រង្គាល។ លោកត្រូវបានតុលាការឧក្រិដ្ឋកម្មដែលគាំទ្រដោយអង្គការសហប្រជាជាតិ ផ្តន្ទាទោសឱ្យជាប់ពន្ធនាគារអស់១ ជីវិតប៉ុន្តែក្រោយមកកាត់បន្ថយមកត្រឹម ៣៥ឆ្នាំវិញ។
មនុស្សជាង៨សែននាក់ ដែលភាគច្រើនជាក្រុមជនជាតិTutsiត្រូវបានសម្លាប់ក្នុងរយៈពេល១០០ថ្ងៃនៃប្រល័យពូជសាសន៍។ការសម្លាប់រង្គាលចាប់ផ្តើមបន្ទាប់ពីយន្តហោះដែលដឹកប្រធានាធិបតីរ៉្វាន់ដានាពេលនោះលោកJuvenal Habyarimanaត្រូវបានបាញ់ទម្លាក់នៅថ្ងៃទី៦ ខែមេសាឆ្នាំ១៩៩៤ ដោយសម្លាប់មនុស្សទាំងអស់នៅលើយន្តហោះ។២ឆ្នាំក្រោយមកលោកBagosoraត្រូវបានចាប់ខ្លួននៅក្នុងប្រទេសកាមេរូនជាកន្លែងដែលលោកភៀសខ្លួនទៅបន្ទាប់ពីរណសិរ្សរំដោះជាតិស្នេហាជាតិរបស់លោកPaul Kagameឡើងកាន់អំណាច។
កាលពីឆ្នាំ ២០០៨ តុលាការព្រហ្មទណ្ឌអន្តរជាតិសម្រាប់រ្វ៉ាន់ដា រកឃើញថាលោកមានពិរុទ្ធភាពពីបទឧក្រិដ្ឋកម្មប្រឆាំងមនុស្សជាតិនិងពីបទរៀបចំឃាតកម្មលើឥស្សរជននយោបាយមួយចំនួនរួមទាំងលោកនាយករដ្ឋមន្រ្តីAgatheUwilingiyimana។ក្នុងការជំនុំជម្រះក្តីលោកBagosoraអះអាងថា លោកគឺជាជនរងគ្រោះនៃការឃោសនាដោយរដ្ឋាភិបាលបច្ចុប្បន្នរបស់រ្វាន់ដាដែលគ្រប់គ្រងដោយជនជាតិTutsiភាគច្រើន។
កាលពីដើមឆ្នាំនេះ តុលាការបដិសេធចំពោះការស្នើសុំដោះលែងឱ្យឆាប់របស់លោក ដោយបន្តឱ្យលោកត្រូវអនុវត្តទោសរហូតដល់អាយុ៨៩ឆ្នាំ។ លោកជាប់ពន្ធនាគារKoulikoroរបស់ម៉ាលីរួមជាមួយអ្នកផ្សេងទៀតដែលត្រូវផ្តន្ទាទោសពីបទប្រព្រឹត្តអំពើប្រល័យពូជសាសន៍រ៉្វាន់ដាដូចគ្នា៕
ហួន ឌីណា
