.jpg)
ជំងឺកូវីដ ១៩ បានបន្ថយអត្រាអាយុសង្ឃឹមរស់ខ្ពស់បំផុតនៅក្នុងប្រទេសអភិវឌ្ឍន៍ បើគិតចាប់ពីសង្គ្រាមលោកលើកទី២ មក ដោយក្នុងនោះ អត្រាអាយុសង្ឃឹមរស់របស់បុរសជនជាតិអាមេរិកមានចំនួនខ្លីជាងគេ។ នេះបើតាមការឱ្យដឹងពីសារព័ត៌មាន The Financial Times។
ការសិក្សាអំពីការកំណត់អត្រាមរណភាពនៅទូទាំងប្រទេសចំនួន ២៩ នៅទ្វីបអឺរ៉ុប សហរដ្ឋអាមេរិកនិងប្រទេសឈីលីបានរកឃើញថា អត្រាអាយុសង្ឃឹមរស់នៅប្រទេសចំនួន ២៧ បានថយចុះនៅឆ្នាំ ២០២០ ដែលជាការថយចុះស្ថិតក្នុងកម្រិតដែលកើតឡើងស្របពេល ដែលអត្រាមរណមានការកើនឡើងជាខ្លាំងក្នុងឆ្នាំនេះ។ នេះបើយោងតាមការស្រាវជ្រាវដែលដឹកនាំដោយអ្នកវិទ្យាសាស្ត្រនៅសាកលវិទ្យាល័យ Oxford។
ជាមួយគ្នានេះ បុរសនឹងប្រឈមនឹងការថយចុះអត្រាសង្ឃឹមរស់ច្រើនជាងស្ត្រី ដែលគេសង្កេតឃើញនៅទូទាំងប្រទេសភាគច្រើន។ ការធ្លាក់ចុះយ៉ាងខ្លាំងនេះ ត្រូវបានគេសង្កេតឃើញក្នុងចំណោមបុរសនៅសហរដ្ឋអាមេរិកដែលបានមានការធ្លាក់ចុះដល់ទៅ ២,២ ឆ្នាំបើប្រៀបធៀបទៅនឹងឆ្នាំ ២០១៩ បន្ទាប់មកគឺបុរសលីទុយអានី ដែលត្រូវប្រឈមនឹងការធ្លាក់ចុះ ១,៧ ឆ្នាំ។
លោក Jose Manuel Aburto អ្នកស្រាវជ្រាវការសិក្សានេះមានប្រសាសន៍ថា៖ «អំឡុងសង្គ្រាមលោកលើកទី២ បណ្តាប្រទេសនៅអឺរ៉ុបខាងលិចដូចជាអេស្ប៉ាញ អង់គ្លេស និងវែល អ៊ីតាលី បែលហ្ស៊ិក និងប្រទេសដទៃទៀតជាប្រទេសមានការធ្លាក់ចុះអត្រាសង្ឃឹមរស់យ៉ាងខ្លាំងបំផុត ពោលគឺធ្លាក់ចុះត្រឹម ១ ឆ្នាំប៉ុណ្ណោះ»។
ស្ត្រីនៅក្នុងប្រទេសចំនួន ៨ និងបុរសនៅក្នុងប្រទេសចំនួន ១១ ត្រូវប្រឈមនឹងការថយអាយុសង្ឃឹមរស់ច្រើនជាង ១ ឆ្នាំ ខណៈដែលប្រទេសចំនួន ២២ ផ្សេងទៀត ត្រូវប្រឈមនឹងការថយអាយុសង្ឃឹមរស់ច្រើនជាងកន្លះឆ្នាំ។
លោកវេជ្ជបណ្ឌិត Aburto បានមានប្រសាសន៍ថា៖ «តាមបរិបទ ជាមធ្យមក្នុងរយៈពេល ៥,៦ ឆ្នាំម្តង ប្រទេសទាំងនេះ ត្រូវសម្រេចបាននូវការកើនឡើងអត្រាសង្ឃឹមរស់ ១ ឆ្នាំ ប៉ុន្តែបែរជាត្រូវបានកាត់បន្ថយអត្រាសង្ឃឹមរស់វិញ ដោយសារវិបត្តិកូវីដ ១៩»។
ការធ្លាក់ចុះអាយុសង្ឃឹមរស់នៅសហរដ្ឋអាមេរិកក្នុងឆ្នាំ ២០២០ គឺមិនធ្លាប់មានពីមុនមកសម្រាប់ទាំងស្ត្រីនិងបុរស។ នេះបើយោងតាមទិន្នន័យដែលអាចរកបាននៅឆ្នាំ១៩៣៣ ក្នុងអំឡុងពេលមានវិបត្តិសេដ្ឋកិច្ច។ អាយុកាលសង្ឃឹមរស់របស់ស្ត្រីអាមេរិក បានធ្លាក់ចុះដល់ទៅ ១,៦៥ ឆ្នាំនៅឆ្នាំ ២០២០ បើប្រៀបធៀបនឹងឆ្នាំមុន។
ការធ្លាក់ចុះជាខ្លាំងនៅសហរដ្ឋអាមេរិកនេះ គឺបណ្ដាលមកពីការកើនឡើងអត្រាមរណភាពដ៏ច្រើន គួរឱ្យកត់សម្គាល់ក្នុងចំណោមមនុស្សវ័យធ្វើការនៅវិបត្តិកូវីដ។
លោក Ridhi Kashyap សហអ្នកនិពន្ធនាំមុខនៃការស្រាវជ្រាវបាននិយាយថា៖ «នៅសហរដ្ឋអាមេរិកការកើនឡើងនៃអត្រាមរណភាពចំពោះក្រុមអាយុក្រោម ៦០ ឆ្នាំ បានរួមចំណែកយ៉ាងសំខាន់ដល់ការធ្លាក់ចុះនៃអត្រាសង្ឃឹមរស់នៅទូទាំងទ្វីបអឺរ៉ុប ភាគច្រើនអត្រាមរណភាព ស្ថិតនៅក្នុងក្រុមមនុស្សមានអាយុក្រោម ៦០ ឆ្នាំ»។
អ្នកជំនាញសុខភាពបានសន្មតថា ភាពខុសគ្នានៃជីវសាស្ត្រនិងកត្តាអាកប្បកិរិយា អាចរួមចំណែកដល់ករណីជំងឺធ្ងន់ធ្ងរក្នុងចំណោមបុរសបើប្រៀបធៀបជាមួយស្ត្រី។
លោក David Dowdy សាស្ត្រាចារ្យរងនៅសកលវិទ្យាល័យវេជ្ជសាស្ត្រ Johns Hopkins University បានមានប្រសាសន៍ថា៖«ស្ត្រី និងបុរសមាននិន្នាការឆ្លងជំងឺកូវីដ១៩ ក្នុងអត្រាប្រហាក់ប្រហែលគ្នាបុរស បើទោះជាបុរសត្រូវប្រឈមនឹងការឈឺធ្ងន់ក្នុងរយៈពេលខ្លី ហើយស្ត្រីត្រូវប្រឈមនឹងករណីជំងឺកូវីដរយៈពេលវែងច្រើនជាងបុរសក៏ដោយ»។
វេជ្ជបណ្ឌិត Kashyap បានបន្ថែមថា៖ «អ្នកស្រាវជ្រាវដឹងអំពីបញ្ហាមួយចំនួនដែលទាក់ទងនឹងការស្លាប់ដោយសារការរាប់ចំនួនស្លាប់ ដោយសារកូវីដការធ្វើតេស្តមិនត្រឹមត្រូវ ឬការធ្វើចំណាត់ថ្នាក់មិនត្រឹមត្រូវ។ លទ្ធផលសិក្សា បានបង្ហាញពីផលប៉ះពាល់ធំធេងដែលបង្កឡើងដោយជំងឺកូវីដ ១៩ ធ្វើឱ្យមានការតក់ស្លុតជាខ្លាំង»។
អ្នកស្រីបានបន្ថែមថា៖«យើងអំពាវនាវជាបន្ទាន់ឱ្យមានការបោះពុម្ពផ្សាយ និងចែកចាយទិន្នន័យនេះឱ្យបានទូលំទូលាយ រួមទាំងប្រទេស ដែលមានចំណូលទាបនិងមធ្យមដើម្បីស្វែងយល់ឱ្យកាន់តែច្បាស់អំពីផលប៉ះពាល់នៃជំងឺរាតត្បាតទូទាំងពិភពលោក»។
ការប៉ាន់ស្មានចេញពីការិយាល័យស្ថិតិជាតិ (ONS)កាលពីដើមខែនេះបានបង្ហាញពីការប្រែប្រួលរវាងផ្នែកផ្សេងៗនៃចក្រភពអង់គ្លេសទាក់ទងនឹងអាយុកាលសង្ឃឹមរស់ជាមធ្យម លើទារកទើបនឹងកើតថាតើពួកគេនឹងរស់នៅយូរប៉ុនណា ប្រសិនបើអត្រាមរណភាពបច្ចុប្បន្ននៅតែបន្តកើនឡើង៕
