កង្វះការផ្គត់ផ្គង់ និងតម្រូវការអគ្គិសនីនៅប្រទេសនីហ្សេរីយ៉ា បានបង្ខំឱ្យប្រជាជននៅទីនោះប្រើប្រាស់ម៉ាស៊ីនភ្លើង បង្កើតអគ្គិសនីដើម្បីប្រើប្រាស់។
លោក Mathew Bello ដែលជាម្ចាស់ហាងមួយនៅរដ្ឋ Kwara ប្រទេសនីហ្សេរីយ៉ាត្រូវប្រើប្រាស់ម៉ាស៊ីនភ្លើង ដើម្បីបំពេញតម្រូវការផ្គត់ផ្គង់របស់ហាងលោកបាន។ លោក Bello បាននិយាយថា ម៉ាស៊ីនភ្លើងដែលលោកប្រើនោះត្រូវចំណាយថ្លៃសាំងចន្លោះពី ១៧ ទៅ ២៧ លីត្រ ជារៀងរាល់ថ្ងៃ។
ការចំណាយទៅលើថ្លៃសាំងជារៀងរាល់ថ្លៃលោកត្រូវចំណាយប្រាក់ពីចន្លោះ ៦ ទៅ ៩ ដុល្លារសហរដ្ឋអាមេរិក។ បន្ថែមពីការចំណាយលើថ្លៃសាំង លោកត្រូវចំណាយប្រាក់ប្រហែល ៣,៦៥ ដុល្លារក្នុង១សប្តាហ៍ដើម្បីពិនិត្យនិងប្តូរប្រេងម៉ាស៊ីន។ ជារៀងរាល់ខែ ជាងមេកានិចត្រូវពិនិត្យ និងជួសជុលម៉ាស៊ីនភ្លើងនោះ៣ ដងក្នុង១ខែដោយចំណាយប្រាក់យ៉ាងតិច ២,៤៣ ដុល្លារ ក្នុង ១ លើក។
ប្រជាជននីហ្សេរីយ៉ាភាគច្រើនដឹងពីបញ្ហាសុខភាព និងបរិស្ថានដូចជាការប្រើប្រាស់ថាមពលពន្លឺព្រះអាទិត្យ ដើម្បីផលិតជាថាមពលប្រើប្រាស់។ បញ្ហាកង្វះថាមពលអគ្គិសនីប្រើប្រាស់ជាមូលហេតុដែលប្រទេសនេះត្រូវការការវិនិយោគបន្ថែមលើថាមពលពន្លឺព្រះអាទិត្យ។
លោក Segun Adaju ប្រធានសមាគមថាមពលនីហ្សេរីយ៉ា បានប្រាប់សារព័ត៌មាន Al Jazeeraថា៖«ប្រសិនបើមានការវិនិយោគជាទឹកប្រាក់ ២ ប៊ីលានដុល្លារសហរដ្ឋអាមេរិកទៅលើវិស័យប្រព័ន្ធសូឡា ដោយប្រើប្រាស់ថាមពលព្រះអាទិត្យ អាជីវកម្មភាគច្រើនអាចដំណើរការប្រកបដោយផាសុកភាពដោយមានថាមពលអគ្គិសនីពី ៨ ទៅ ១២ ម៉ោងជារៀងរាល់ថ្ងៃ។
របាយការណ៍ឆ្នាំ ២០១៩ ដោយអគ្គនាយកនៃគណៈកម្មការថាមពលនីហ្សេរីយ៉ា បានប៉ាន់ប្រមាណថា ប្រសិនបើមួយភាគរយនៃផ្ទៃដីប្រទេសនីហ្សេរីយ៉ា ត្រូវបានគ្របដណ្តប់ដោយបច្ចេកវិជ្ជាបង្កើតថាមពលអគ្គិសនីដោយពន្លឺព្រះអាទិត្យ ប្រទេសនេះនឹងអាចផ្គត់ផ្គង់ថាមពលបានប្រហែល ៣៣៣,៤៨០ មេហ្គាវ៉ាត់។
ប្រទេសនីហ្សេរីយ៉ាទទួលបានពន្លឺព្រះអាទិត្យពី ៥ ទៅ ៧ ម៉ោងជារៀងរាល់ថ្ងៃអាស្រ័យទៅតាមតំបន់៕