អស់រយៈពេលជាច្រើនខែកន្លងមកនេះ ថ្នាំលេបប្រឆាំងប៉ារ៉ាស៊ីត ivermectin ចំណុះ ៥០០ មិល្លីលីត្រ ត្រូវគេប្រើដើម្បីសម្លាប់ប៉ារ៉ាស៊ីតនៅក្នុងសត្វ ឆ្កែ មាន់ និងអ្នកជំងឺដទៃទៀត ត្រូវបានលក់ដាច់នៅទូទាំងប្រទេសអាមេរិក ដោយសារមានការជឿជាក់ថា ថ្នាំប្រភេទនេះ ជួយសម្លាប់មេរោគកូវីដ ១៩។ នេះបើយោងតាមកាសែតញូវយ៉កថាមស៍។
ការជឿជាក់ថាថ្នាំនេះ អាចព្យាបាលជំងឺកូវីដ មិនត្រឹមតែអាចបង្កគ្រោះថ្នាក់ដល់មនុស្សតែម្នាក់ឯងទេ វាថែមទាំងអាចបង្កគ្រោះថ្នាក់សត្វងាយរងគ្រោះ ដោយគ្មានថ្នាំការពារ និងព្យាបាលត្រឹមត្រូវ ខណៈពេទ្យសត្វ និងកសិករកំពុងជួបការលំបាកក្នុងការស្វែងរកថ្នាំនេះ ដើម្បីមកព្យាបាលសត្វ។
វេជ្ជបណ្ឌិត Karen Emerson នៅមជ្ឈមណ្ឌលបសុពេទ្យនៅទីក្រុង West Point បានឱ្យដឹងថា ប្រជាជនសម្រុកទិញថ្នាំនេះអស់ពីមន្ទីរពេទ្យរបស់លោកស្រី ហើយបើទោះបុគ្គលិករបស់លោកស្រីបានព្យាយាមស្វែងរកប្រភេទថ្នាំនេះដដែលក៏ដោយ ក៏បុគ្គលិកលោកស្រីរកបានតែថ្នាំ ដែលមានចំណុះ ៥០ មិល្លីលីត្រប៉ុណ្ណោះ។
ការផ្សព្វផ្សាយព័ត៌មានមិនពិតនេះ ត្រូវបានរីកដុះដាលនៅលើគេហទំព័រប្រព័ន្ធផ្សព្វផ្សាយសង្គមដូចជា Reddit និង Facebook នៅក្នុងក្រុមហ្វេសប៊ុកមួយក្រុម Ivermectin Covid-19 Testimonials ដែលមានសមាជិក ក្រុម ៤ ២០០ នាក់។
ក្រុមហ៊ុន Facebook បាននិយាយថាខ្លួនបានលុបខ្លឹមសារលើប្រតិបត្តិការមួយចំនួន ដែលបានផ្សព្វផ្សាយពីប្រសិទ្ធភាពថ្នាំ ivermectin ក៏ដូចជាការអះអាងណាមួយដែលថា ថ្នាំនេះជួយព្យាបាលជំងឺកូវីដ។
ដោយឡែកក្រុមហ៊ុន Reddit បាននិយាយថា ខ្លួនបានលើកទឹកចិត្តឱ្យមានការពិភាក្សាបើកចំហលើមាតិកា ឬការពិភាក្សាណាមួយ ដែលមិនរំលោភគោលនយោបាយរបស់ខ្លួន។
វេជ្ជបណ្ឌិត Emerson បាននិយាយថា៖ «ខ្ញុំគិតថា ការផ្អើលទិញថ្នាំនេះជាមូលហេតុ ដែលធ្វើឱ្យយើងខ្វះខាតថ្នាំនេះ សម្រាប់អ្នកដែលត្រូវការវាពិតប្រាកដ។ ថ្នាំ ivermectin អាចសម្លាប់សត្វដង្កូវស៊ីសត្វធម្មតា ហើយអាចនឹងការពារ ឬប្រយុទ្ធប្រឆាំងកូវីដ ១៩ បើប្រើនៅលើមនុស្ស។ រូបមន្តមួយចំនួនផ្សេងទៀតអាចត្រូវបានគេរាយការណ៍ថា ថ្នាំនេះអាចព្យាបាលចៃលើក្បាល និងជំងឺ ផ្សេងៗលើមនុស្ស ប៉ុន្តែរដ្ឋបាលចំណីអាហារអាមេរិក FDA បានព្រមានជនជាតិអាមេរិកថាគួរតែឈប់ប្រើថ្នាំនេះទៅ»។
ការកើនឡើងនៃតម្រូវការនេះ បានធ្វើឱ្យម្ចាស់កសិដ្ឋាន អ្នកចិញ្ចឹមសត្វនិងពេទ្យសត្វមួយចំនួន ត្រូវបានបង្ខំចិត្តឱ្យប្រើប្រាស់ប្រភេទថ្នាំផ្សេង ដែលមានតម្លៃថ្លៃជាងមុន ខណៈដែលអ្នកផ្សេងទៀតត្រូវបង្ខំចិត្តប្រើថ្នាំ ivermectin ដែលផុតកំណត់ ឬទុកថ្នាំប្រើតែពេលចាំបាច់ប៉ុណ្ណោះ។
លោក Marc Fillion ជាកសិករម្នាក់មកពីរដ្ឋ South Carolina ដែលប្រើថ្នាំ ivermectin សម្រាប់បសុសត្វរបស់គាត់បានប្រាប់កាសែត The Times ថា គាត់មានការព្រួយបារម្ភយ៉ាងខ្លាំង។ លោកបាននិយាយថា៖ «ឧទាហរណ៍ការមិនព្យាបាលជ្រូកវ័យក្មេងមិនត្រឹមត្រូវ ឬខ្វះថ្នាំ ឬមិន ត្រូវថ្នាំអាចបណ្ដាលឱ្យជ្រូកស្លាប់។ ចំណែកហាងលក់ថ្នាំសត្វមួយនៅ Las Vegas តម្រូវឱ្យអតិថិជនបង្ហាញរូបថតពួកគេជាមួយសត្វសេះ ឬសត្វរបស់ខ្លួន ដើម្បីទិញថ្នាំនេះ»។
លោក Kolina Koltai អ្នកស្រាវជ្រាវទ្រឹស្តីសង្គមនៅសាកលវិទ្យាល័យវ៉ាស៊ីនតោនបានប្រាប់កាសែត The Times ថា៖ «បទពិសោធបែបនេះគូសបញ្ជាក់ពីឥទ្ធិពលនៃប្រភពព័ត៌មានមិនពិត ដែលអាចផ្ដល់អន្តរាយដល់ពិភពលោកប៉ុនណា»។
កាលពីខែមុនវេជ្ជបញ្ជាសម្រាប់ការបង្កើតថ្នាំivermectin បានកើនឡើងដល់ជាង ៨៨ ០០០ ក្នុង ១ សប្តាហ៍ ពោលគឺកើនឡើងពីកម្រិតមូលដ្ឋានក្នុងអំឡុងពេលជំងឺរាតត្បាត ដែលកើនចំនួន ៣ ៦០០។ នេះបើយោងតាមមជ្ឈមណ្ឌលត្រួតពិនិត្យ និងបង្ការជំងឺ (CDC)។
នៅក្នុងសេចក្តីថ្លែងការណ៍មួយ រដ្ឋបាល FDA បាននិយាយថា ខ្លួនមិនបានទទួលរបាយការណ៍អំពីកង្វះការផលិត ivermectin ទេ ប៉ុន្តែលោកទទួលស្គាល់ថា ថ្នាំ ivermectin មានសារៈសំខាន់សម្រាប់អ្នកចិញ្ចឹមសត្វ កសិករ និងម្ចាស់សេះដើម្បីថែរក្សាហ្វូងនិងសុខភាពសត្វ»។
គួរបញ្ជាក់ផងដែរថា ព័ត៌មានមិនពិតអំពីថ្នាំ ivermectin រីករាលដាលតែប៉ុន្មានសប្តាហ៍ បន្ទាប់ពីជំងឺរាតត្បាតបានផ្ទុះឡើងម្ល៉េះ។ កាលពីខែមេសា ឆ្នាំ ២០២០ អ្នកវិទ្យាសាស្ត្រនៅសាកលវិទ្យាល័យ Monash ក្នុងទីក្រុងមែលប៊នប្រទេសអូស្ត្រាលី បានបោះពុម្ពផ្សាយការរកឃើញបឋមដែលបង្ហាញថា ថ្នាំនេះត្រូវបានប្រើក្នុងបន្ទប់ពិសោធន៍អាចសម្លាប់មេរោគកូរ៉ូណាក្នុងរយៈពេល ៤៨ ម៉ោង។ សាកលវិទ្យាល័យដដែលនេះ បានព្រមានថា លទ្ធផលអាចនឹងឆាប់ ប៉ុន្តែការស្រាវជ្រាវនៅកំពុងបន្តនៅឡើយ៕