និយោជកផ្នែកសុខាភិបាល និងសហជីពបានអំពាវនាវដល់រដ្ឋាភិបាលសហព័ន្ធ ដើម្បីដោះស្រាយបញ្ហាកង្វះបុគ្គលិកដោយសាររលកនៃជំងឺកូវីដ ១៩ វាយលុកសហរដ្ឋអាមេរិក ហើយកម្មករជួរមុខរាប់ម៉ឺននាក់ កំពុងប្រឈមនឹងការបណ្តេញចេញពីការងារ ដោយការមិនព្រមទទួលការចាក់វ៉ាក់សាំង។
កង្វះគិលានុបដ្ឋាយិកាបានបង្ខំឱ្យមន្ទីរពេទ្យនៅក្នុងរដ្ឋដែលរងផលប៉ះពាល់ធ្ងន់ធ្ងរបំផុត បានផ្ដល់ផលលំបាកដល់បុគ្គលិកពេទ្យ និងត្រូវស្នើសុំកម្លាំងពីឆ្មាំជាតិដែលមានបុគ្គលិកចំនួន ១៣ ០០០ នាក់ ដើម្បីជួយមើលការងារ ដែលត្រូវការជំនួយផ្សេងៗ។ ប៉ុន្តែទំហំនៃវិបត្តិនេះធំធេងពេក ដែលបណ្តាលឱ្យអត្រាស្លាប់ប្រចាំថ្ងៃកើនឡើងដល់កម្រិតចុងក្រោយ ដែលបណ្ដាលឱ្យមានការជំរុញឱ្យមានការស្នើសុំជំនួយហិរញ្ញវត្ថុ និងកំណែទម្រង់ ដើម្បីដោះស្រាយបញ្ហាប្រឈមមុខនឹងជំងឺរាតត្បាត។
អ្នកជំនាញផ្នែកសុខភាពនិយាយថា ការណែនាំអំពីវ៉ាក់សាំងសម្រាប់បុគ្គលិកសុខាភិបាល អាចនាំឱ្យមានការបណ្តេញគិលានុបដ្ឋាយិកាវិជ្ជាជីវៈចេញបន្ថែមទៀត។ កាលពីថ្ងៃចន្ទ អាជ្ញាធរនៅទីក្រុងញូវយ៉ក បានព្រមានថា បុគ្គលិកសុខាភិបាលរាប់ពាន់នាក់ ដែលមិនបានចាក់វ៉ាក់សាំងអាចត្រូវបានបណ្តេញចេញពីកាងាររហូតដល់ ១៦ ភាគរយ នៃបុគ្គលិកមន្ទីរពេទ្យចំនួន ៤៥០ ០០០ នាក់ក្នុងរដ្ឋ។
លោកស្រី Kathy Hochul អភិបាលក្រុងញូវយ៉ក បាននិយាយថា៖ «បុគ្គលិកណាដែលត្រូវបានបញ្ឈប់ ដោយសារតែការបដិសេធមិនចាក់វ៉ាក់សាំងនឹងមិនមានសិទ្ធិទទួលបានការធានារ៉ាប់រងភាពអត់ការងារឡើយ»។
វិធានជំរុញឱ្យមានការប្រយុទ្ធប្រឆាំងនឹងវ៉ាក់សាំងនៅទីក្រុងញូវយ៉ក នឹងមានផលប៉ះពាល់យ៉ាងសំខាន់ ចំពោះវិស័យសុខាភិបាលនៅទូទាំងប្រទេស ដោយសារច្បាប់ស្រដៀងគ្នានេះ ត្រូវបានដាក់ចេញ ដោយអាជ្ញាធររដ្ឋ និងសហព័ន្ធ។ សហជីពនិងនិយោជកព្រមានថាប្រព័ន្ធថែទាំសុខភាពនៅរដ្ឋខ្លះជិតដល់ចំណុចចុងក្រោយហើយ ដែលជំរុញឱ្យកម្មករជួរមុខអស់កម្លាំងពេក ក៏ចាកចេញពីឧស្សាហកម្មនេះដូចគ្នា។
យោងតាមការស្ទង់មតិរបស់វិទ្យាស្ថាន McKinsey មានតែគិលានុបដ្ឋាយិកាជាង ១៥ ភាគរយប៉ុណ្ណោះ ដែលបានចាកចេញពីការងាររបស់ពួកគេក្នុងកំឡុងឆ្នាំដំបូងនៃការរីករាលដាលនៃជំងឺរាតត្បាត ពោលគឺកើនឡើងប្រហែល ៥ ភាគរយ បើធៀបនឹងឆ្នាំមុន។ គិលានុបដ្ឋាយិកាម្នាក់ក្នុងចំណោម ៥ នាក់ បានរាយការណ៍ថា ពួកគេអាចនឹងចាកចេញពីតួនាទីរបស់ពួកគេពីផ្នែកថែទាំអ្នកជំងឺដោយផ្ទាល់នៅឆ្នាំក្រោយ។
លោក Ernest Grant ប្រធានសមាគមគិលានុបដ្ឋយិកាអាមេរិក (ANA)បានប្រាប់កាសែត Financial Times ថា៖ «គិលានុបដ្ឋាយិកាអស់កម្លាំងទាំងផ្លូវចិត្ត និងផ្លូវកាយបន្ទាប់ពីរយៈពេល ១៨ ខែ នៃការរីករាលដាលនៃជំងឺនេះ។ ឥឡូវនេះ ពួកគេកំពុងជួបប្រទះករណីស្លាប់ជាច្រើនជារៀងរាល់ថ្ងៃ ក្នុងអត្រាដូចគ្នាកាលពីឆ្នាំមុន មុនពេលដែលយើងមានវ៉ាក់សាំង»។
លោកបាននិយាយថា វាជាការខកចិត្តសម្រាប់គិលានុបដ្ឋាយិកាដែលបានឃើញការស្លាប់ជាច្រើនដោយសារមិនបានចាក់វ៉ាក់សាំងហើយ នៅមិនព្រមចាក់វ៉ាក់សាំងខ្លួនឯងទៀត»។
សមាគមន ANA ដែលតំណាងឱ្យគិលានុបដ្ឋាយិកាដែលបានចុះឈ្មោះចំនួន ៤ លាននាក់ បាននិយាយថា មានការខ្វះខាតបុគ្គលិកមុនពេលមានជំងឺកូវីដ ដោយសារតែបញ្ហារចនាសម្ព័ន្ធ រួមទាំងប្រាក់ ខែទាប។ ប៉ុន្តែជំងឺរាតត្បាតនេះ បានជំរុញឱ្យគិលានុបដ្ឋយិកាជាច្រើនឈប់ពីអាជីពនេះ ដោយអស់កម្លាំង និងព្រួយបារម្ភអំពីការឆ្លងជំងឺនេះថា នឹងឆ្លងដល់គ្រួសាររបស់ពួកគេ។ ការខ្វះខាតអាចខ្ពស់គិលានុបដ្ឋាយិកាអាចខ្វះដល់ទៅ ១ លាននាក់ឯណ្ណោះ។
ក្រុមអ្នករិះគន់ព្រមានថា ចំនួនគិលានុបដ្ឋាយិកាដែលបានចុះឈ្មោះច្រើនលាលែងពីតំណែងអចិន្ត្រៃយ៍ ដើម្បីទទួលបានតំណែងធ្វើដំណើរដែលមានប្រាក់ខែល្អប្រសើរ ដែលនេះកំពុងធ្វើឱ្យប៉ះពាល់ដល់សមត្ថភាពរបស់មន្ទីរពេទ្យក្នុងការឆ្លើយតបទៅនឹងវិបត្តិនេះ។
សមាគមន៍ ANA បានអំពាវនាវឱ្យរដ្ឋបាល Joe Biden កោះប្រជុំវិបត្តិជាមួយមន្ទីរពេទ្យសហជីពមន្រ្តីរដ្ឋាភិបាល និងអ្នកជំនាញដទៃទៀត ដើម្បីធ្វើការរកដំណោះស្រាយ។ ភាពតានតឹងនេះត្រូវបានគេដឹងភាគច្រើននៅក្នុងរដ្ឋ ដែលអត្រាចាក់វ៉ាក់សាំងមានកម្រិតទាបហើយអត្រាចូលមន្ទីរពេទ្យនៅតែកើនឡើង បើទោះបីជា មានការធ្លាក់ចុះថ្មីៗនៅក្នុងផ្នែកផ្សេងទៀតនៃសហរដ្ឋអាមេរិកក៏ដោយ។
សមាគមន៍មន្ទីរពេទ្យអាមេរិក ក៏កំពុងជំរុញឱ្យសភាផ្តល់អាទិភាពដល់ការផ្តល់មូលនិធិជាទឹកប្រាក់ដើម្បីអាចជួយដោះស្រាយបញ្ហាកង្វះបុគ្គលិករួមទាំងការពង្រីកទិដ្ឋាការសម្រាប់គិលានុបដ្ឋយិការបរទេស និងពង្រីកសាលាគិលានុបដ្ឋយិការព្រមទាំងដាក់ចេញនូវវិធានការ ដើម្បីដោះស្រាយការអស់កម្លាំង បុគ្គលិកផងដែរ៕