កាលពីថ្ងៃអាទិត្យ នាយករដ្ឋមន្រ្តីអង់គ្លេស លោក Boris Johnson បានបង្ហាញពីសញ្ញាថា លោកនឹងផ្ដល់ទិដ្ឋាការបណ្តោះអាសន្នបន្ថែមទៀត ដល់ពលករបរទេស ដើម្បីបន្ធូរបន្ថយការរំខានក្នុងចង្វាក់ផលិតកម្មរបស់ចក្រភពអង់គ្លេស។ នេះបើតាមការឱ្យដឹងពីសារព័ត៌មាន The Financial Times។
នាយករដ្ឋមន្រ្តី ចក្រភពអង់គ្លេសនឹងត្រូវចំណាយពេល ដើម្បីការកែតម្រូវ ក្រោយកិច្ចព្រមព្រៀង Brexit និងការបញ្ចប់នៃការរៀបចំចលនាមនុស្ស ដោយសេរីរបស់សហភាពអឺរ៉ុប ព្រោះឧស្សាហកម្មនេះ ជាដំណោះស្រាយល្អបំផុតសម្រាប់បញ្ហា ចង្វាក់ផ្គត់ផ្គង់ជាជាងរដ្ឋាភិបាល។
ថ្លែងនៅក្នុងការចាប់ផ្តើមសន្និសីទនៅគណបក្សអភិរក្សលោក Johnson បាននិយាយថា ប្រទេសនេះ នឹងមិនត្រូវប្រឈមនឹងអ្វី ដែលគេហៅថា ចំនួនអន្តោប្រវេសន៍ច្រើនរហូតដល់មិនអាចគ្រប់គ្រងបាន ត្រឹមអនុញ្ញាតឱ្យមានការដោះស្រាយបញ្ហាកង្វះអ្នកបើកបររថយន្តដឹកទំនិញធុនធ្ងន់នោះ ព្រោះបញ្ហានេះនាំឱ្យមានការរំខានដល់ចង្វាក់ផ្គត់ផ្គង់នៅផ្សារទំនើបនិងការភ័យស្លន់ស្លោក្នុងការទិញប្រេងឥន្ធនៈក្នុងរដូវបុណ្យគ្រិស្តម៉ាស់។
រដ្ឋមន្រ្តី បានត្រៀមខ្លួនសម្រាប់ការរំខានបន្ថែមទៀតនៅក្នុងការប្រារព្ធពិធីបុណ្យគ្រិស្ដម៉ាស់ ហើយលោក Johnson បាននិយាយថា អធិការបតីលោក Rishi Sunak បានត្រៀមខ្លួនសម្រាប់បញ្ហា ដែលអាចនឹងត្រូវបន្តក្នុងរយៈពេលជាច្រើនខែ ប៉ុន្តែបានបន្ថែមថា រដ្ឋាភិបាលនឹងមិនផ្លាស់ប្តូរទិសដៅក្នុងការត្រៀមខ្លួនដោះស្រាយបញ្ហានេះទេ។
លោកបានប្រាប់សារព័ត៌មាន BBC ថា៖ «នៅពេលប្រជាជនបោះឆ្នោតឱ្យមានការផ្លាស់ប្តូរនៅឆ្នាំ ២០១៦ និងនៅពេលដែលប្រជាជនបោះឆ្នោតឱ្យមានការផ្លាស់ប្តូរនៅឆ្នាំ ២០១៩ គឺគេបោះឆ្នោតឱ្យបញ្ចប់នូវគំរូខូចនៃសេដ្ឋកិច្ចចក្រភពអង់គ្លេស ដែលពឹងផ្អែកទៅលើប្រាក់ឈ្នួលទាបជំនាញទាប និងផលិតភាពទាបរ៉ាំរ៉ៃ។ ហេតុដូចនេះហើយ បច្ចុប្បន្នយើងខំប្រឹងងាកខ្លួនចេញពីបញ្ហានេះ»។
ការិយាល័យរដ្ឋាភិបាល បានជំទាស់នឹងការបន្ថែមអ្នកបើកបរចូលទៅក្នុងបញ្ជីកង្វះការងារជាផ្លូវការ ប៉ុន្តែគាំទ្រគម្រោងទិដ្ឋាការរយៈពេលខ្លីបន្ថែមទៀត។ លើសពីនេះទៅទៀត វិស័យផ្សេងទៀត ដែលកំពុងជួបការខ្វះខាតកម្លាំងពលកម្ម ដូចជា បដិសណ្ឋារកិច្ច និងថែទាំសង្គម ឥឡូវនេះ នឹងដាក់សម្ពាធលើរដ្ឋមន្ត្រី ដើម្បីផ្តល់ការលើកលែងដល់ពួកគេផងដែរ។
រដ្ឋាភិបាលនៅថ្ងៃសៅរ៍ កន្លងទៅ បាននិយាយថា ខ្លួននឹងអនុញ្ញាតឱ្យអ្នកបើកបរបរទេស ៣០០ នាក់ ចូលក្នុងប្រទេសអង់គ្លេសភ្លាមៗ ដើម្បីជួយផ្គត់ផ្គង់ប្រេង បន្ទាប់ពីយានដ្ឋានជាច្រើនអស់ប្រេងសាំង។ ដោយឡែក អ្នកបើកបរបរទេស ៤ ៧០០ នាក់បន្ថែមទៀត មានបំណងមកចក្រភពអង់គ្លេស ដើម្បីជួយក្នុងការដឹកជញ្ជូនម្ហូបអាហារនៅមុនថ្ងៃបុណ្យគ្រិស្ដម៉ាស់។
បុគ្គលិកយោធាជិត ២០០នាក់ រួមទាំងអ្នកបើកបរ ១០០ នាក់ នឹងត្រូវដាក់ពង្រាយចាប់ពីថ្ងៃចន្ទ ដើម្បីផ្តល់ការគាំទ្របណ្តោះអាសន្ន ដែលជាផ្នែកមួយនៃសកម្មភាពកាន់តែទូលំទូលាយរបស់រដ្ឋាភិបាល ដើម្បីបន្ធូរបន្ថយសម្ពាធបន្ថែមទៀតលើស្ថានីយប្រេងឥន្ធនៈ និងដោះស្រាយបញ្ហាកង្វះអ្នកបើកបរ។
ក្រុមពាណិជ្ជកម្មអះអាងថា ផែនការរបស់រដ្ឋាភិបាលសម្រាប់ទិដ្ឋាការបណ្តោះអាសន្នសម្រាប់ពលករបរទេស មានចំនួន ៥ ៥០០ សម្រាប់ឧស្សាហកម្មកែច្នៃម្ហូបអាហារ នៅមិនទាន់គ្រប់គ្រាន់នៅឡើយទេ។
យ៉ាងណាមិញ លោក Johnson បាននិយាយថា រដ្ឋាភិបាលកំពុងធ្វើឱ្យប្រាកដថា ចក្រភពអង់គ្លេសនឹងមាន អ្នកបើកបរបន្ថែមនៅពេលចាំបាច់ តាមវិធីដែលអាចធ្វើទៅបាន ប៉ុន្តែវាអាស្រ័យលើក្រុមនិយោជិតនិងនិយោជកទាំងនេះដែរ ដែលត្រូវខិតខំជួយគ្នា ដោះស្រាយបញ្ហាចង្វាក់ផ្គត់ផ្គង់ផ្ទាល់ខ្លួនរបស់ពួកគេ។ រដ្ឋាភិបាល មិនអាចឈានជើងចូល និងជួសជុលរាល់ចង្វាក់ផ្គត់ផ្គង់បានទេ។
ទន្ទឹមនឹងនេះដែរ លោក Johnson បានបដិសេធការដំឡើងពន្ធបន្ថែមទៀត ដើម្បីស្រោចស្រង់ហិរញ្ញវត្ថុសាធារណៈបន្ទាប់ពីវិបត្តិមេរោគកូរ៉ូណា ដែលគាត់បានពិពណ៌នាថាជាវិបត្តិ «ឧតុនិយមសារពើពន្ធ»។
នាយករដ្ឋមន្រ្តី កាលពីខែមុន បានប្រកាសបង្កើនការរួមចំណែកធានារ៉ាប់រងជាតិ ដើម្បីផ្តល់មូលនិធិដល់សេវាសុខភាពសាធារណៈ NHS និងការថែទាំសង្គម ដែលនឹងធ្វើឱ្យបន្ទុកពន្ធរបស់ចក្រភពអង់គ្លេសដល់កម្រិតខ្ពស់បំផុត ចាប់តាំងពីឆ្នាំ១៩៥០មកម៉្លេះ។
លោកបានបន្តថា៖«ប្រសិនបើខ្ញុំអាចចៀសវាងបាន ខ្ញុំមិនចង់ដំឡើងពន្ធម្តងទៀតទេ ប៉ុន្តែយើងត្រូវប្រឈមមុខនឹងជំងឺរាតត្បាតក្នុងកម្រិតមួយ ដែលប្រទេសនេះមិនធ្លាប់បានឃើញពីមុនមក»៕