កាលពីថ្ងៃអាទិត្យសប្ដាហ៍មុន លោក Lee Jae-myung បេក្ខជនឈរឈ្មោះជាប្រធានាធិបតីនៃគណបក្សប្រជាធិបតេយ្យកំពុងកាន់អំណាចបានប្តេជ្ញាថា នឹងកំណត់ប្រាក់ចំណូលមូលដ្ឋានជាសកលដល់ប្រជាជន ប្រសិនបើលោកជាប់ការបោះឆ្នោតនាពេលខាងមុខ។
លោក Lee បាននិយាយថា សេរីភាពពិតប្រាកដ គឺអាចធ្វើទៅបានលុះត្រាតែលក្ខខណ្ឌជីវភាពរបស់ប្រជាជនត្រូវបានធានាទៅលើគ្រប់វិស័យរួមទាំងប្រាក់ចំណូល លំនៅឋាន និងហិរញ្ញប្បទាន។
គម្រោងការប្រាក់ចំណូលជាសកលក្រោមការដឹកនាំរបស់លោកនឹងផ្តល់ការឧបត្ថម្ភជាសាច់ប្រាក់ប្រចាំឆ្នាំដល់ប្រជាជនកូរ៉េខាងត្បូងយ៉ាងតិច ២០៩,១៦ ដុល្លារសហរដ្ឋអាមេរិក ចាប់ពីឆ្នាំ២០២៣។ ចំពោះប្រជាជនកូរ៉េខាងត្បូងដែលមានអាយុចន្លោះពី ១៩ ទៅ ២៩ ឆ្នាំ នឹងទទួលបានប្រាក់ប្រចាំឆ្នាំប្រមាណ ៨០០ ដុល្លារសហរដ្ឋអាមេរិក ជារៀងរាល់ឆ្នាំចាប់ពីឆ្នាំ ២០២៣។
លោក Kim Dong-yeon អតីតរដ្ឋមន្ត្រីក្រសួងហិរញ្ញវត្ថុកូរ៉េខាងត្បូង ហាក់បីដូចជាយល់ស្របហើយលោកនិយាយថា ការរុះរើច្បាប់ឡើងវិញ គឺជាការចាំបាច់ដើម្បីជំរុញការធ្វើនិយតកម្ម
នេះ។ លោកបាននិយាយថា ប្រទេសកូរ៉េខាងត្បូងគួរតែធ្វើបច្ចុប្បន្នភាពទៅលើច្បាប់របស់ខ្លួន។
លោក Kim បាននិយាយថា៖ «ច្បាប់កូរ៉េចែងតែអ្វីដែលស្របច្បាប់ ដូច្នេះកន្លែងដែលនៅសល់ត្រូវចាត់ទុកថាជាអំពើខុសច្បាប់។ យើងគួរតែមានវិធីផ្សេងដូចនៅប្រទេសជឿនលឿនដែរ»។ នេះបើតាមការរាយការណ៍របស់សារព័ត៌មាន Financial Times។
ប៉ុន្តែផែនការប្រាក់ចំណូលជាសកលបានទទួលការរិះគន់ពីអ្នកជំនាញ និងតំណាងរាស្ត្រគណបក្សប្រឆាំងដោយពួកគេសួរថា តើប្រាក់របស់អ្នកបង់ពន្ធប៉ុន្មាន ដែលត្រូវការដើម្បីសម្រេចបានគោលនយោបាយមួយនេះ។
លោក Paul Choi សេដ្ឋវិទូនៅក្រុមវិនិយោគ CLSA បាននិយាយថា ការអនុវត្តគោលការណ៍នេះ អាចជោគជ័យក្នុងរយៈពេលខ្លី ប៉ុន្តែប្រថុយនឹងលំនឹងនៃសេដ្ឋកិច្ចប្រទេសដែលត្រូវបានចាត់ទុកជាសេដ្ឋកិច្ចធំទី៤ របស់អាស៊ី។
លោក Sung Tae-yoon ជាសាស្ត្រាចារ្យផ្នែកសេដ្ឋកិច្ចនៅសាកលវិទ្យាល័យយ៉ុនស៊ីបាននិយាយថា គោលការណ៍នៃប្រាក់ចំណូលមូលដ្ឋានជាសកលតម្រូវឱ្យរដ្ឋាភិបាលចំណាយថវិកាបន្ថែមច្រើនជារៀងរាល់ឆ្នាំ។
លោក Sung បាននិយាយបន្ថែមថា៖ «លុះត្រាតែប្រទេសកូរ៉េខាងត្បូងមានមធ្យោបាយប្រមូលផលចំណេញប្រចាំឆ្នាំដូចជានៅតំបន់មជ្ឈិមបូព៌ាដែលមានប្រេងឆៅ ហើយមានគម្រោងរកប្រាក់តាមរយៈអ្នកបង់ពន្ធដោយមិនកាត់បន្ថយការចំណាយទៅលើកម្មវិធីសុខុមាលភាពដែលមានស្រាប់»។
នៅក្នុងអំឡុងវិបត្តិកូវីដ ១៩ សម្ទុះនៃការនាំចេញ និងការឆ្លើយតបផ្នែកសុខភាពរបស់ប្រទេសនេះបានជួយកូរ៉េខាងត្បូងសម្រេចបាននូវការងើបឡើងវិញលឿនបំផុតពីវិបត្តិសេដ្ឋកិច្ចដែលបង្កឡើងដោយជំងឺរាតត្បាតកូវីដ ១៩។ ប៉ុន្តែវិបត្តិសេដ្ឋកិច្ច និងយុទ្ធសាស្ត្រទប់ស្កាត់ការរីករាលដាលជំងឺកូវីដ ១៩ បានបង្កើតឱ្យមានគម្លាតរវាងអ្នកមាន និងអ្នកក្រខ្លាំងជាងមុន។
កន្លងមក ប្រទេសកូរ៉េខាងត្បូង បានអនុវត្តប្រាក់ចំណូលមូលដ្ឋានសកលអំឡុងពេលដែលប្រទេសនេះ ជួបវិបត្តិកូវីដ ១៩។ រដ្ឋាភិបាលបានផ្តល់ជាសាច់ប្រាក់ទៅប្រជាជនខ្លួនប្រមាណ ២២០ដុល្លារសហរដ្ឋអាមេរិក៕