កាលពីថ្ងៃអង្គារ ប្រទេសឥណ្ឌា បានណែនាំឱ្យប្រើក្នុងគ្រាអាសន្ននូវវ៉ាក់សាំងកូវីដ ១៩ របស់ក្រុមហ៊ុន Bharat Biotech លើកុមារអាយុក្រោម ១២ ឆ្នាំ ដែលធ្វើឱ្យក្រុមហ៊ុននេះក្លាយជាក្រុមហ៊ុនផលិតវ៉ាក់សាំង ជាលើកដំបូងនៅក្នុងប្រទេស ដែលទទួលបានអនុម័តដាក់ឱ្យប្រើប្រាស់ក្រោយមានការពិនិត្យទិន្នន័យសាកល្បងរបស់ខ្លួនលើក្រុមអាយុ ២-១៨ ឆ្នាំ។ នេះបើតាមការឱ្យដឹងពីសារព័ត៌មាន CNA។
ការសម្រេចចិត្តនេះ កើតឡើងនៅពេលដែលឥណ្ឌាផ្លាស់ប្តូរការផ្តោតអារម្មណ៍លើការចាក់វ៉ាក់សាំងការពារកុមារពីវីរុសកូរ៉ូណា ដោយបានចាក់វ៉ាក់សាំងជាង ៩៥០ លានដូស ដល់មនុស្សពេញវ័យក្នុងចំណោមប្រជាជនសរុបជិត ១,៤ ពាន់លាននាក់របស់ខ្លួន។
វ៉ាក់សាំង Covaxin ជាង ១១០ លានដូស ត្រូវបានគេចែកចាយ ហើយក្រុមហ៊ុនកំពុងដំណើរការធានាការចុះបញ្ជីការប្រើប្រាស់គ្រាអាសន្នពីអង្គការសុខភាពពិភពលោក ដែលការសម្រេចចិត្តនេះ នឹងសម្រេចជាផ្លូវការនៅចុងខែនេះ។
គួរបញ្ជាក់ផងដែរថា វ៉ាក់សាំង Covaxin របស់ Bharat Biotech ដែលប្រើវីរុសកូរ៉ូណាអសកម្មជាមួយថ្នាំបង្កើនភាពស៊ាំស្ថិតក្នុងចំណោមវ៉ាក់សាំងចំនួន ៣ ប្រភេទផ្សេងទៀត ដែលត្រូវបានប្រើនៅក្នុងប្រទេសឥណ្ឌាបច្ចុប្បន្ន៕