.jpg)
លោក ស៊ី ជីនភីង (នៅខាងមុខ) និងមេដឹកនាំចិនជាច្រើនរូបទៀត។ រូបថត AFP
ប្រធានាធិបតីចិន លោក ស៊ី ជីនភីង កំពុងធ្វើដំណើរឆ្លងកាត់ព្យុះភ្លៀងសេដ្ឋកិច្ចដ៏ធំមួយ ខណៈពេលដែលក្រុមហ៊ុនអចលនទ្រព្យធំបំផុតក្នុងប្រទេសនេះ កំពុងប្រឈមមុខនឹងវិបត្តិបំណុល និងអាចឈានដល់ការក្ស័យធន ហើយរោងចក្រធំៗកំពុងជួបឧបសគ្គជាច្រើន ខណៈពេលងើបពីវិបត្តិជំងឺកូវីដ ១៩ ដោយរួមមានទាំងកង្វះអគ្គិសនីទូទាំងប្រទេសទៀតផង។
ក្រៅពីការខិតខំតម្រូវដំណើរតូចតាចខ្លះ អ្នកវិភាគ និងទីប្រឹក្សារដ្ឋាភិបាលមួយចំនួនបានគិតថា លោក ស៊ី អាចនឹងទាញប្រយោជន៍ពីស្ថានភាពបច្ចុប្បន្ន ដែលលោកហៅថា «បង្អួចឱកាស» ដើម្បីធ្វើកំណែទម្រង់រចនាសម្ព័ន្ធដ៏លំបាក។
ប្រសិនបើបានជោគជ័យ កំណែទម្រង់ទាំងនេះគឺជាចំណុចចុងក្រោយនៃសកម្មភាពនយោបាយរបស់លោក ស៊ី ដែលរួមមានការលុបបំបាត់ដែនកំណត់អាណត្តិប្រធានាធិបតី រហូតដល់ការស្វែងរក «វិបុលភាពរួម» សម្រាប់ប្រជាជនចិន ដែលបានធ្វើឱ្យលោកក្លាយជាមេដឹកនាំចិនមានអំណាចបំផុតចាប់តាំងពីលោក ម៉ៅ សេទុង មក។
ការលុបបំបាត់ដែនកំណត់អាណត្តិប្រធានាធិបតី បានអនុញ្ញាតឱ្យលោកស៊ីបន្តកាន់អំណាចដល់អាណត្តិទី៣ ដែលមេដឹកនាំមុនៗមិនអាចធ្វើបាន។ គោលដៅ «វិបុលភាពរួម» ពោល គឺការកាត់បន្ថយតម្លៃអចលនទ្រព្យ និងការកាត់បន្ថយវិសមភាពប្រាក់ចំណូល គឺអាចផ្ដល់ប្រជាប្រិយភាពបន្ថែមទៀតសម្រាប់លោក ស៊ី ខណៈដែលលោកកំពុងត្រៀមខ្លួនសម្រាប់សមាជប្រជាជនចិននៅឆ្នាំក្រោយ។
ប៉ុន្តែអ្នកវិភាគមួយចំនួនបានគិតថា «វិបុលភាពរួម» គឺមានហានិភ័យជាពិសេស ខណៈពេលដែលគោលនយោបាយកាត់បន្ថយតម្លៃអចលនទ្រព្យ និងកាត់បន្ថយវិសមភាពប្រាក់ចំណូលរបស់ក្រុងប៉េកាំង អាចបង្កផលអវិជ្ជមានច្រើនជាងផលវិជ្ជមានចំពោះប្រទេសសេដ្ឋកិច្ចធំជាងគេទី២ ក្នុងពិភពលោក។
នៅក្នុងកិច្ចប្រជុំមួយរបស់ការិយាល័យនយោបាយរបស់គណបក្សកុម្មុយនីស្តចិន កាលពីខែមេសា លោក ស៊ី បានកត់សម្គាល់ថា ការងើបឡើងវិញដ៏រឹងមាំនៃសេដ្ឋកិច្ចរបស់ចិនពីជំងឺរាតត្បាតកូវីដ ១៩ បានផ្ដល់នូវ «បង្អួចឱកាស» ដើម្បីកាត់បន្ថយហានិភ័យហិរញ្ញវត្ថុជាពិសេសនៅក្នុងវិស័យដែលជំពាក់បំណុលច្រើនដូចជាវិស័យអចលនទ្រព្យ។ វាក៏ជាឱកាសដើម្បីបន្តគោលដៅបរិស្ថានប្រកបដោយមហិច្ឆតាដូចជាការសម្រេចបាននូវការបញ្ចេញកាបូនខ្ពស់បំផុតត្រឹមឆ្នាំ ២០៣០ និងអព្យាក្រឹតភាពកាបូនត្រឹមឆ្នាំ ២០៦០។
ប៉ុន្តែការងើបឡើងវិញនៃសេដ្ឋកិច្ចចិន ក៏បានបង្កឱ្យតម្លៃអចលនទ្រព្យផងដែរ ដែលជាការគំរាមកំហែងដល់គោលដៅ «វិបុលភាពរួម»។ កត្តាទាំងនេះបានធ្វើឱ្យមន្ត្រីកាន់តែមានឆន្ទៈធ្វើកំណែទម្រង់និយតកម្មលើក្រុមហ៊ុនអចលនទ្រព្យ។
កំណែទម្រង់និយតកម្មនេះបានធ្វើឱ្យក្រុមហ៊ុន Evergrande ដែលជាក្រុមហ៊ុនអចលនទ្រព្យធំជាងគេទី២ របស់ចិន ប្រឈមនឹងវិបត្តិមិនអាចសងបំណុលបាន។ រដ្ឋបាលលោកស៊ីមានជំហរយ៉ាងតឹងរ៉ឹងថា មិនដកថយពីការអនុវត្តកំណែទម្រង់ទាំងនេះ បើទោះបីជាក្រុមហ៊ុន Evergrande ដួលរលំក៏ដោយ។ អ្នកវិភាគជាច្រើនព្រមានថា ការដួលរលំរបស់ក្រុមហ៊ុន Evergrande ដែលជំពាក់បំណុលជាង ៣០០ ពាន់លានដុល្លារ នឹងមានផលប៉ះពាល់យ៉ាងខ្លាំងចំពោះសេដ្ឋកិច្ចចិនទាំងមូល។
វិបត្តិកង្វះអគ្គិសនីនៅទូទាំងប្រទេសចិន ក្នុងរយៈពេលប៉ុន្មានសប្ដាហ៍ ក៏ជាឧទាហរណ៍មួយទៀតនៃផលអវិជ្ជមានបានមកពីគោលនយោបាយមានបំណងល្អ។ ដើម្បីបំពេញគោលដៅប្រយុទ្ធប្រឆាំងការប្រែប្រួលអាកាសធាតុ រដ្ឋាភិបាលក្រុងប៉េកាំងបានកាត់បន្ថយផលិតកម្មអគ្គិសនីនៅខេត្តដែលមិនបានឈានដល់គោលដៅទិន្នភាពខ្ពស់។ រោងចក្រអគ្គិសនីជាច្រើនកំពុងប្រឈមកង្វះធ្យូងថ្ម ការឡើងតម្លៃធ្យូងថ្ម និងដែនកំណត់តម្លៃអគ្គិសនីទាប មានន័យថាពួកគេធ្វើការផ្គត់ផ្គង់ដោយខាតបង់។ បន្ថែមពីលើនេះទៀត តំបន់ផលិតធ្យូងថ្មសំខាន់ៗ ក្នុងប្រទេសចិន គឺកំពុងរងគ្រោះដោយទឹកជំនន់ ដែលធ្វើឱ្យបញ្ហាទាំងនេះកាន់តែលំបាក។
នៅសប្ដាហ៍ក្រោយការិយាល័យស្ថិតិជាតិរបស់ប្រទេសចិន នឹងចេញផ្សាយការប៉ាន់ស្មានរបស់ខ្លួនសម្រាប់កំណើនសេដ្ឋកិច្ចត្រីមាសទី៣ ឆ្នាំនេះ និងសូចនាករសេដ្ឋកិច្ចសំខាន់ៗដទៃ
ទៀត។ ទិន្នន័យនេះនឹងផ្ដល់នូវការចង្អុលបង្ហាញដ៏ល្អបំផុតអំពីផលប៉ះពាល់ពីវិបត្តិនៅ Evergrande និងវិបត្តិកង្វះថាមពល។
ជាលទ្ធផលអ្នកព្យាករជាច្រើនកំពុងពិនិត្យឡើងវិញនូវការព្យាករសេដ្ឋកិច្ចពេញ ១ ឆ្នាំរបស់ពួកគេចំពោះសេដ្ឋកិច្ចចិន។ ប៉ុន្តែភាគច្រើននៅតែប៉ាន់ស្មានថា ទិន្នផលសេដ្ឋកិច្ចពេញ ១ ឆ្នាំ នឹងធំជាងគោលដៅកំណើន ៦ ភាគរយរបស់រដ្ឋាភិបាលចិនផងដែរ៕
