មន្រ្តីឥណ្ឌាបាននិយាយកាលពីថ្ងៃពុធថា ប្រទេសឥណ្ឌា បានបន្តការនាំចេញវ៉ាក់សាំងការពារជំងឺកូវីដ ១៩ បន្តិចបន្តួចហើយនឹងបង្កើនការនាំចេញឱ្យខ្លាំងក្នុងរយៈពេល ២-៣ ខែខាងមុខនេះ នៅពេលស្តុកនៅក្នុងស្រុក បានកើនឡើងហើយចំនួនប្រជាជនភាគច្រើនបានទទួលវ៉ាក់សាំងរួចហើយ។ នេះបើតាមការឱ្យដឹងពីសារព័ត៌មាន CNA។
ស្ថានទូតឥណ្ឌាប្រចាំនៅទីក្រុងតេអេរ៉ង់បាននិយាយថា វ៉ាក់សាំងប្រមាណ ១០០ លានដូសនៃវ៉ាក់សាំងកូវ៉ាស៊ីន ផលិតដោយក្រុមហ៊ុនឥណ្ឌា Bharat Biotech បានដឹកទៅកាន់ប្រទេសអ៊ីរ៉ង់ កាលពីសប្តាហ៍មុន។
ប្រភពពីខាងរដ្ឋាភិបាលបាននិយាយថា វ៉ាក់សាំងក៏ត្រូវបានបញ្ជូនទៅប្រទេសនេប៉ាល់ ផងដែរ ដោយបន្ថែមថា កិច្ចខិតខំប្រឹងប្រែងនេះផ្តោតលើប្រទេសជិតខាង។ ប្រភពដដែលបាននិយាយថា រហូតមកដល់ពេលនេះ វ៉ាក់សាំងប្រហែល ៤ លានដូស ត្រូវបាននាំចេញដែលជាចំនួនតូចមួយដែលសមាមាត្រទៅនឹងវិស័យការទូតវ៉ាក់សាំងដ៏ធំដែលរដ្ឋាភិបាលរបស់នាយករដ្ឋមន្រ្តី Narendra Modi បានដាក់ឱ្យដំណើរការនៅឆ្នាំនេះ មុនពេលរលកឆ្លងទី២ បង្ខំឱ្យបញ្ឈប់ការផលិត។
ប៉ុន្តែឥឡូវនេះប្រជាជនចំនួន ៣ ភាគ ៤ បានទទួលវ៉ាក់សាំងយ៉ាងហោច ១ ដូសរួចហើយ ហើយ ១ ភាគ ៣ នៃប្រជាជនទាំងនេះ បានចាក់វ៉ាកសាំងដល់ទៅ ២ ដូសរួចដែរ។ យ៉ាងណាមិញ ប្រទេសឥណ្ឌា ត្រៀមខ្លួនដើរតួនាទីយ៉ាងសំខាន់ក្នុងការបំពេញតម្រូវការវ៉ាក់សាំងរបស់ប្រទេសដទៃទៀត។
គួរបញ្ជាក់ផងដែរថា វិទ្យាស្ថានសេរ៉ូមកំពុងផលិតវ៉ាក់សាំង Oxford AstraZeneca ចំនួន ២២០ លានដូស ក្នុង ១ ខែ កើនឡើងពី ១៥០ លានដូស នៅក្នុងខែសីហា ហើយក្រុមហ៊ុន Bharat Biotech ក៏កំពុងផ្គត់ផ្គង់វ៉ាក់សាំង ដែលផលិតក្នុងស្រុកចំនួន ៣០ លានដូស ដែលគ្រោងបង្កើនផលិតភាពដល់ ៥០ លានដូសនៅខែក្រោយ៕