.jpg)
កោះបាលី កោះរៀវ បានត្រៀមខ្លួនរួចជាស្រេច ដើម្បីបើកឱ្យភ្ញៀវទេសចរបរទេសមកពី ១៩ ប្រទេស។ រូបថត AFP
រដ្ឋាភិបាលឥណ្ឌូនេស៊ីបានបញ្ជាក់ពីបញ្ជីឈ្មោះប្រទេសដែលភ្ញៀវទេសចរអន្តរជាតិនឹងត្រូវបានអនុញ្ញាតឱ្យចូលទៅកោះបាលី និងកោះរីអៅដោយចាប់ផ្តើមពីថ្ងៃព្រហស្បតិ៍ ទី ១៤ ខែតុលា ខណៈខេត្តទាំង ២ នេះកំពុងបើកដំណើរការឡើងវិញជាបណ្តើរៗហើយ។
រដ្ឋមន្ត្រីសម្របសម្រួលកិច្ចការសមុទ្រ និងវិនិយោគលោក Luhut Pandjaitan បាននិយាយនៅក្នុងសេចក្តីប្រកាសព័ត៌មានមួយថា៖ «ស្របតាមការណែនាំរបស់ប្រធានាធិបតីនៃសាធារណរដ្ឋឥណ្ឌូនេស៊ី យើងបានផ្តល់ការអនុញ្ញាតដល់ប្រទេសចំនួន ១៩ ដើម្បីឱ្យធ្វើដំណើរទៅកាន់កោះ Bali និងកោះ Riau បាន។»
អ្នកទេសចរមកពីបណ្តាប្រទេសអឺរ៉ុប ដែលត្រូវបានអនុញ្ញាតឱ្យចូលកោះបាលី រួមមានអ្នកទេសចរមកពីប្រទេសអ៊ីតាលី បារាំង អេស្ប៉ាញ ព័រទុយហ្កាល់ ន័រវែស ស៊ុយអែត ប៉ូឡូញ ហុងគ្រីនិងលីកថេនស្ទេន។
អ្នកទេសចរមកពីបណ្តាប្រទេសនៅមជ្ឈិមបូព៌ា ដូចជា អារ៉ាប៊ី សាអ៊ូឌីត អេមីរ៉ាត អារ៉ាប់រួម កាតា បារ៉ែន និងគុយវ៉ែត ក៏ត្រូវបានស្វាគមន៍ផងដែរខណៈឥណ្ឌា ចិន ជប៉ុន កូរ៉េខាងត្បូង និងនូវែលសេឡង់ ត្រូវបានបញ្ចូលក្នុងបញ្ជីនេះផងដែរ។ លោក Pandjaitan បានបន្ថែមថា៖ «បញ្ជីឈ្មោះប្រទេសទាំង ១៩ ដែលចូលមកឥណ្ឌូនេស៊ី នឹងចូលតាមជើងហោះហើរត្រង់ទៅកាន់កោះបាលីនិងកោះរីអៅតែម្តង»។
ការបើកដំណើរការឡើងវិញ នៅពេលដែលកោះបាលី ទទួលរងការធ្លាក់ចុះយ៉ាងខ្លាំងនៃករណីឆ្លងកូវីដ ១៩ បើប្រៀបធៀបទៅនឹងកម្រិតខ្ពស់បំផុតនៃរលកឆ្លងទី២ របស់ប្រទេសនៅពាក់កណ្តាលខែកក្កដា។ ៣ ខែមុន កោះបាលីបានកត់ត្រាករណីថ្មីជាង ១ ០០០ ករណីជារៀងរាល់ថ្ងៃ។ គិតត្រឹមខែនេះ តួលេខនេះបានធ្លាក់ចុះមកក្រោម ១០០។ កោះបាលីពឹងផ្អែកយ៉ាងខ្លាំងលើវិស័យទេសចរណ៍ ហើយជំងឺរាតត្បាតកូវីដ ១៩ បានធ្វើឱ្យប៉ះពាល់យ៉ាងខ្លាំង ដល់សេដ្ឋកិច្ចរបស់ខ្លួន។ អាជ្ញាធរសង្ឃឹមថា តាមរយៈការបើកកោះនេះឡើងវិញ ជីវភាពរស់នៅរបស់ប្រជាជនចំនួន ៤,៣ លាននាក់អាចនឹងប្រសើរឡើង៕
មឹង ច័ន្ទសុម៉ានីតា
