.jpg)
លោក Yeo Zheng Ye ដែលជាសមាជិកម្នាក់នៃក្រុមជំនុំសាក្សីព្រះយេហូវ៉ា។ រូបថត Yeo Zheng Ye
សមាជិកម្នាក់នៃក្រុមជំនុំសាក្សីព្រះយេហូវ៉ា គឺលោក Yeo Zheng Ye បានប្រកាន់ខ្ជាប់យ៉ាងហ្មត់ចត់លើការប្រាសចាកពីអំពើហិង្សាហើយការប្រកាន់ជំនឿនេះហាមឃាត់មិនឱ្យកាន់អាវុធ និងពីការចូលរួមជាមួយអង្គការណាមួយដែលមានបំណងធ្វើសង្គ្រាម។ នៅអាយុ ២០ ឆ្នាំ រូបលោក Yeo បានបដិសេធមិនចូលរួមក្នុងសេវាកម្មយោធាដែលជាកាតព្វកិច្ចរបស់រដ្ឋាភិបាលសិង្ហបុរី ហើយរូបលោកត្រូវបានគេបញ្ជូនទៅពន្ធនាគារ។ លោក Yeo បានជាប់ពន្ធនាគារជិត ៣ ឆ្នាំ គឺវែងជាងកម្មវិធីបណ្តុះបណ្តាលកាតព្វកិច្ចយោធាជាតិដែលមានរយៈពេលត្រឹមតែ ២ ឆ្នាំតែប៉ុណ្ណោះ។
ថ្វីដ្បិតតែប្រទេសសិង្ហបុរី មិនមានសង្រ្គាមជាមួយប្រទេសណាក៏ដោយ ប៉ុន្តែការចូលហ្វឹកហ្វឺនផ្នែកយោធា គឺជាកាតព្វកិច្ចនៅក្នុងរដ្ឋសម្រាប់ប្រជាពលរដ្ឋបុរស ដែលមានរាងកាយ និងសុខភាពល្អនិងអ្នករស់នៅអចិន្ត្រៃយ៍ជំនាន់ទី២ នៅពេលពួកគេមានអាយុ ១៨ ឆ្នាំ។
ចាប់តាំងពីឆ្នាំ ១៩៧០ មក អ្នកមកពីក្រុមសាសនាព្រះយេហូវ៉ា ៦ នាក់ ត្រូវបានគេបញ្ជូនទៅពន្ធនាគារយោធាជារៀងរាល់ឆ្នាំរួចមកហើយ។ សំណួរជុំវិញតម្រូវការក្នុងការបញ្ជូនអ្នកប្រឆាំងទៅពន្ធនាគារត្រូវបានលើកឡើងនៅក្នុងសភាសិង្ហបុរី ក្នុងឱកាសមួយចំនួនផងដែរ។ ប៉ុន្តែរដ្ឋមន្រ្តីបានទទូចលើតម្រូវការ សម្រាប់គោលនយោបាយធ្វើទាហានយ៉ាងតឹងរ៉ឹងដោយនិយាយថា៖ «សេវាកម្មជាតិមានសារៈសំខាន់ណាស់ ចំពោះសន្តិសុខប្រទេសតូចមួយដូចជាសិង្ហបុរី»។
លោក Matthias Yao Chih បានប្រាប់សភាក្នុងឆ្នាំ ១៩៩៨ កាលលោកនៅជារដ្ឋមន្ត្រីក្រសួងការពារជាតិថា៖ «គ្មានជនជាតិសិង្ហបុរីមួយណាគួរត្រូវបានអនុញ្ញាតឱ្យលើកយកហេតុផលណាមួយ ដើម្បីលើកលែងខ្លួនឯងពីការចូលរួមចំណែកក្នុងកិច្ចខិតខំប្រឹងប្រែងការពារជាតិឡើយ ព្រោះរាល់ជនជាតិសិង្ហបុរីទទួលបានអត្ថប្រយោជន៍ពីសន្តិភាព និងសន្តិសុខដែលសេវាកម្មជាតិបានជួយធានា»។
ក្រុមសាក្សីព្រះយេហូវ៉ាបានស្នើសុំការផ្លាស់ប្តូរគោលនយោបាយនេះ ដោយចង្អុលទៅប្រទេសកូរ៉េខាងត្បូងជាឧទាហរណ៍។ នៅក្នុងរបត់ដ៏សំខាន់មួយ នៅខែតុលានេះទីក្រុងសេអ៊ូលបានបញ្ឈប់ការបញ្ជូនសាក្សីព្រះយេហូវ៉ា ទៅពន្ធនាគារហើយបានណែនាំគ្រោងការថ្មីមួយដែលអនុញ្ញាតឱ្យអ្នកដែលប្រឆាំងនឹងការចូលបម្រើយោធា ដោយផ្អែកលើជំនឿ ឬហេតុផលផ្ទាល់ខ្លួន អាចបម្រើការងារនៅពន្ធនាគារ ៣ ឆ្នាំសងជំនួសវិញ៕
មឹង ច័ន្ទសុម៉ានីតា
