អង្គការសុខភាពពិភពលោក បានបង្ហើបឱ្យដឹងពីក្រុមអ្នកវិទ្យាសាស្ត្រថ្មី ១ ក្រុម ដែលនឹងទទួលបន្ទុកស៊ើបអង្កេតយ៉ាងម៉ឺងម៉ាត់ពីប្រភពដើមវីរុសកូរ៉ូណាថា តើវាកើតឡើងយ៉ាងដូចម្តេច?។ នេះបើតាមការឱ្យដឹងពីសារព័ត៌មាន South China Morning Post។
ស្ថាប័នដដែលនេះ បានប្រកាសអំពីការបង្កើតក្រុមអ្នកស្រាវជ្រាវចំនួន ២៦ នាក់ កាលពីថ្ងៃពុធ រួមមានអ្នកជំនាញផ្នែកវីរុស ផ្នែករោគរាតត្បាត ផ្នែកសុខភាពសត្វ និងសុវត្ថិភាពជីវសាស្ត្រ ក៏ដូចជាអ្នកជំនាញមកពីវិស័យដទៃទៀតដែរ។ បេក្ខជនជាង ៧០០ នាក់ ត្រូវបានជ្រើសរើសដោយអង្គការសុខភាពពិភពលោក មកពីប្រទេសនានា រួមមានចិន អាមេរិក ឥណ្ឌា កេនយ៉ា និងប្រេស៊ីលជាដើម។
ក្រុមអ្នកវិទ្យាសាស្ត្រថ្មីនេះ ត្រូវបានគេស្គាល់ថា ជាក្រុមប្រឹក្សាវិទ្យាសាស្ត្រស្តីពីប្រភពដើមនៃមេរោគ ឬហៅកាត់ថា Sago ដែលនឹងត្រូវទទួលខុសត្រូវលើការស៊ើបអង្កេតអំពីដើមកំណើតមេរោគកូរ៉ូណារបស់ អង្គការ WHO ក្រោយពីក្រុមអ្នកជំនាញដំបូងបានធ្វើដំណើរទៅប្រទេសចិន កាលពីដើមឆ្នាំនេះ ក្នុងបេសកកម្មរយៈពេល ៤ សប្តាហ៍នៅទីក្រុងវូហាន ដែលគេចាត់ទុកថាជាប្រភពផ្ទុះវីរុសកូរ៉ូណាកាលពីដើមឆ្នាំ ២០២០។
ក្រុម Sago ដែលជាស្ថាប័នអចិន្រ្តៃយ៍នឹងត្រៀមខ្លួន ដើម្បីស៊ើបអង្កេតប្រភពដើមនៃវីរុសបច្ចុប្បន្ន និងនាពេលអនាគត ដែលក្រុមនេះ នឹងចាប់ផ្តើមជួបប្រជុំនៅចុងខែនេះ ក្រោយមានការពិគ្រោះយោបល់ជាសាធារណៈរយៈពេល ២ សប្តាហ៍លើសមាជិកដែលបានស្នើកន្លងមក។
ទីភ្នាក់ងារសុខភាពរបស់អង្គការសហប្រជាជាតិបាននិយាយថា ក្រុមនេះនឹងជួយផ្តល់ដំបូន្មានដល់អង្គការសុខភាពពិភពលោកអំពីការអភិវឌ្ឍការត្រួតពិនិត្យ និងការគាំទ្រការសិក្សាជាស៊េរី អំពីប្រភពដើមនៃមេរោគឆ្លងរួមទាំង «ដំបូន្មានរហ័ស» លើផែនការប្រតិបត្តិការផ្សេងៗនាពេលអនាគតផងដែរ។
ពួកគេក៏នឹងបង្កើតក្របខ័ណ្ឌសម្រាប់ដោះស្រាយការស្រាវជ្រាវប្រភព សម្រាប់ការផ្ទុះឡើងនាពេលអនាគតផងដែរ។
លោក Tedros Adhanom Ghebreyesus ប្រធានអង្គការសុខភាពពិភពលោកបានមានប្រសាសន៍ថា៖ «ការលេចចេញនូវមេរោគថ្មីដែលមានសក្តានុពលក្នុងការបង្កឱ្យមានជំងឺរាតត្បាតនិងរោគរាតត្បាត គឺជាការពិតនៃធម្មជាតិឧទាហរណ៍ដូចវីរុស Sars-CoV-2 គឺជាវីរុសថ្មីបំផុត ក៏ប៉ុន្តែមិនមែនមានន័យថាជាវីរុសចុងក្រោយដែរ»។
លោក Lawrence Gostin នាយកមហាវិទ្យាល័យនៃវិទ្យាស្ថាន O''Neill ទទួលបន្ទុកខាងច្បាប់សុខភាពជាតិ និងសកលនៅសាកលវិទ្យាល័យ Georgetown សហរដ្ឋអាមេរិកបានមានប្រសាសន៍ថា៖ «អង្គការ WHO បានបោះជំហានយ៉ាងឆ្លាតវៃក្នុងការបង្កើតក្រុមប្រឹក្សាមួយនេះ។ ការធ្វើបែបនេះនឹងបង្កើតបាននូវទំនុកចិត្តសាធារណៈ និងទទួលបានទំនុកចិត្តពីរដ្ឋាភិបាលនិងអ្នកវិទ្យាសាស្ត្រយ៉ាងទូលំទូលាយ»។
គួរបញ្ជាក់ផងដែរថា អង្គការសុខភាពពិភពលោក ឬ WHO បានប្រកាសពីការសម្រេចចិត្តក្នុងការបង្កើតក្រុមនេះ កាលពីខែកក្កដាច្រើនខែបន្ទាប់ពីការបញ្ចប់បេសកកម្មដំណាក់កាលទី១ ដ៏ចម្រូងចម្រាស ដែលប្រទេសនានា រួមទាំងសហរដ្ឋអាមេរិកជប៉ុននិងអូស្ត្រាលីនិយាយថា ដំណើរការនេះកង្វះតម្លាភាពព្រោះមិនមានការចូលរួមពេញលេញពីរដ្ឋាភិបាលចិន។
ក្រុមអ្នករិះគន់ បាននិយាយថាក្រុមអ្នកសិក្សាពីប្រភពដើមបានទទួលទំនាស់ផលប្រយោជន៍ព្រោះសមាជិកក្រុមលោក Peter Daszak អ្នកឯកទេសជំងឺអេកូឡូស៊ី មានទំនាក់ទំនងការងារយូរអង្វែង ជាមួយមន្ទីរពិសោធន៍មួយគឺវិទ្យាស្ថានវូហានវិទ្យាសាស្ត្រមេរោគ។
បញ្ជីចុងក្រោយនៃអ្នកជំនាញ Sago នឹងត្រូវបានត្រួតពិនិត្យដោយម៉ឺងម៉ាត់ និងល្អិតល្អន់បំផុតសម្រាប់សម្ព័ន្ធភាពមុននេះ។ បើយោងតាមអ្នកជំនាញអភិបាលកិច្ចសុខភាព និងជាសាស្រ្តាចារ្យសាកលវិទ្យាល័យហ្គ្រីហ្វីតប្រទេសអូស្ត្រាលីគឺលោកស្រី Sara Davies។
ទោះយ៉ាងណា គេមើលឃើញថា ក្រុមនេះកំពុងបោះជំហានចូលទៅក្នុងទឹកដីដែលមិនប្រាកដប្រជាមួយអំពីអនាគតនៃបេសកកម្មបែបនេះទៅកាន់ប្រទេសចិន ព្រោះកាលពីខែកក្កដាទីក្រុងប៉េកាំង ធ្លាប់បានច្រានចោលផែនការរបស់អង្គការ WHO ដែលរួមបញ្ចូលការស្រាវជ្រាវបន្ថែមនៅក្នុងប្រទេសនេះ។
ទីក្រុងប៉េកាំង បានសង្កត់ធ្ងន់ម្តងហើយម្តងទៀតចំពោះការបើកចំហរបស់ខ្លួនក្នុងការធ្វើការជាមួយអង្គការសុខភាពពិភពលោកស្តីពី «ការតាមដានប្រភពដើមជាសកល» និងការពារតម្លាភាពរបស់ខ្លួននៅក្នុងបេសកកម្មចុងក្រោយ ប៉ុន្តែក៏មានការលើកឡើងដែរថា ផែនការបញ្ចូលការធ្វើសវនកម្មមន្ទីរពិសោធន៍ គឺមានហេតុផលនយោបាយ និងកំពុងផ្តោតលើការផ្លាស់ប្តូរទៅក្រៅប្រទេស។
ទន្ទឹមនឹងនេះ ការអត្ថាធិប្បាយនៅក្នុងសុន្ទរកថារបស់គណបក្សកុម្មុយនីស្ត People’s Daily កាលពីដើមខែនេះ ក៏បានចោទសួរថា តើក្រុម Sago នឹងអាចទទួលឥទ្ធិពលពីអាមេរិក ឬយ៉ាងណា?។
លោកស្រី Davies បានឱ្យដឹងថា៖ «បេសកកម្មទៅកាន់ប្រទេសចិនរបស់ក្រុម Sago អាចជាការបំពុលមួយ ដែលពង្វាងការចាប់អារម្មណ៍ពីប្រទេសផ្សេង ដោយងាកមករកតែប្រទេសចិន តែឯង។ នេះក៏អាចចោទជាសំណួរមួយថា ប្រទេសមួយគំនរ មិនរក ហេតុអ្វីមករកតែចិន?»
ទោះយ៉ាងណា គេនៅមើលឃើញបញ្ហាប្រឈមធំធេងសម្រាប់ក្រុម Sago ក្នុងការទទួលបានលទ្ធភាពបន្តការស៊ើបអង្កេតដើមកំណើតមេរោគនៅក្នុងប្រទេសចិន៕