ដែនដីភាគខាងជើងអូស្ត្រាលីកាលពីថ្ងៃពុធកន្លងទៅ បានកំណត់ឱ្យបុគ្គលិកផ្នែកសេវាកម្មដែលរួមមានអ្នកលក់ដូរជាងកាត់សក់ អ្នកធ្វើការធនាគារក៏ដូចជាអ្នកធ្វើការផ្នែកបដិសណ្ឋារកិច្ចនានា ត្រូវតែទទួលយកការចាក់វ៉ាក់សាំង បើទោះបីជានៅដែនដីនេះមានករណីវិជ្ជមានកូវីដ ១៩ តែជាង ២០០ ករណី ហើយមានអត្រាអ្នកបានចាក់វ៉ាក់សាំងយ៉ាងតិច ១ ដូសរហូតដល់ ៨០% ក៏ដោយ។
អភិបាលដែនដីភាគខាងជើងលោក Michael Gunner បានប្រកាសថា «នរណាក៏ដោយឱ្យតែធ្វើការជាមួយសាធារណៈត្រូវតែទៅចាក់វ៉ាក់សាំង»។
ទោះបីជាមានករណីវិជ្ជមានទាបក្ដីក៏អាជ្ញាធរដែនដីនោះនៅតែមានក្ដីព្រួយបារម្ភថា ជំងឺរាតត្បាតសកលនេះអាចនឹងវាយលុកដែនដីខ្លួននៅពេលណាមួយ។
ចំពោះទោសទណ្ឌនៅដែនដីភាគខាងជើងអូស្ត្រាលីវិញ ប្រសិនបើបុគ្គលិកធ្វើការផ្នែកសេវាកម្មមិនទៅចាក់វ៉ាក់សាំងត្រឹមថ្ងៃទី ២៤ ខែធ្នូទេ បុគ្គលិកនោះនឹងត្រូវបញ្ឈប់ពីការងារហើយរងពិន័យជាទឹកប្រាក់ប្រមាណ ៣ ៧០០ ដុល្លារអាមេរិក៕
ហ៊ីម រដ្ឋា