ក្រុមមន្រ្តីបាននិយាយថា ការប៉ះទង្គិចគ្នារវាងក្រុមឧទ្ទាម និងកងកម្លាំងរដ្ឋាភិបាលព្រមទាំងការសម្លាប់តាមចិញ្ចើមផ្លូវបានបណ្តាលឱ្យមនុស្ស ៦ នាក់ស្លាប់បន្ថែមទៀត នៅក្នុងតំបន់កាស្មៀរ ប្រទេសឥណ្ឌា កាលពីថ្ងៃសៅរ៍កន្លងទៅ ខណៈតំបន់ជម្លោះនៅហិមាលយា កំពុងប្រយុទ្ធនឹងរលកនៃអំពើហិង្សា។
មនុស្សយ៉ាងតិច ២៨ នាក់ រួមទាំងជនស៊ីវិល ៩ នាក់ ត្រូវបានបាញ់សម្លាប់ក្នុងរយៈពេល ២ សប្តាហ៍ចុងក្រោយនេះ ដែលនេះជាការរស់ឡើងវិញនៃការបាញ់ប្រហារដ៏សាហាវនៅក្នុងការបះបោរដែលមានអាយុកាល ៣ ទសវត្សរ៍ នៅក្នុងតំបន់ដែលមានប្រជាជនមូស្លីម។
លោក Vijay Kumar អធិការប៉ូលិសបាននិយាយថា កាលពីថ្ងៃសៅរ៍ លោកបានឃើញក្រុមសកម្មប្រយុទ្ធ២នាក់មកពីក្រុមឧទ្ទាម The Resistance Front (TRF) ត្រូវបានសម្លាប់នៅខាងក្រៅទីក្រុង Srinagar ។
លោក Kumar បានបន្ថែមថាម្នាក់ក្នុងចំណោមពួកគេគឺជាមេបញ្ជាការឧទ្ទាមកំពូលលោក Umer Mushtaq Khanday។ ប៉ុន្មានម៉ោងក្រោយមកខ្មាន់កាំភ្លើងបានបាញ់សម្លាប់អ្នកលក់តាមចិញ្ចើមថ្នល់ និងកម្មករម្នាក់ មកពីខាងក្រៅតំបន់កាស្មៀរក្នុងការបាញ់ប្រហារដាច់ដោយឡែកពីគ្នា។
សេចក្តីថ្លែងការណ៍យោធាមួយបាននិយាយថា ទាហាន ២ នាក់ក៏បានស្លាប់ផងដែរ នៅក្នុងការប្រយុទ្ធគ្នាដ៏សាហាវមួយរវាងឥណ្ឌា និងប៉ាគីស្ថានក្នុងតំបន់ ដែលគ្រប់គ្រងដោយកាស្មៀរ។ ក្រុមយោធា បានចូលរួមក្នុងការតាមប្រមាញ់អស់រយៈពេល ១ សប្តាហ៍ ដើម្បីស្វែងរកក្រុមឧទ្ទាម ដែលសម្លាប់ទាហាន ៧ នាក់ នៅក្នុងតំបន់ព្រំដែនមេនដារ។
ក្រុមឧទ្ទាម TRF បានអះអាងពីការសម្លាប់មនុស្ស ៧ នាក់ ក្នុងនោះមានបុរសហិណ្ឌូ ៣ នាក់ និងស្ត្រីស៊ីកម្នាក់។
មន្រ្តីប៉ូលីសម្នាក់បានប្រាប់ សារព័ត៌មាន AFP កាលពីថ្ងៃសៅរ៍ថា មនុស្សជាង ១ ០០០ នាក់ ដែលត្រូវបានសង្ស័យថា មានទំនាក់ទំនងជាមួយក្រុមសាសនា និងក្រុមសកម្មប្រយុទ្ធត្រូវបានឃាត់ខ្លួននៅក្នុងការបង្ក្រាប ដែលជាផ្នែកមួយនៃការស៊ើបអង្កេតលើការសម្លាប់ជនស៊ីវិលថ្មីៗនេះ៕