អ្នកវិទ្យាសាស្ត្រជាច្រើន កំពុងដាក់សម្ពាធលើរដ្ឋាភិបាលអង់គ្លេសថា តើគួរដាក់កំហិតលើការរឹតត្បិតសង្គមឡើងវិញ និងបង្កើនល្បឿនការចាក់វ៉ាក់សាំងការពារដែរឬទេ ក្រោយឃើញមានករណីកូវីដក្នុងតំបន់កើនឡើងខ្ពស់ជាងគេនៅអឺរ៉ុប។
ចក្រភពអង់គ្លេស បានរកឃើញកំណត់ត្រាករណីឆ្លងថ្មីរហូតដល់ ៤៩ ១៥៦ ករណី កាលពីថ្ងៃចន្ទ ដែលជាចំនួនច្រើនបំផុត គិតចាប់តាំងពីពាក់កណ្តាលខែកក្កដាមក។ ការឆ្លងថ្មីជាមធ្យមស្ថិតក្នុងចំនួន ៤៣ ០០០ នាក់ ក្នុង ១ ថ្ងៃ ក្នុងសប្តាហ៍កន្លងទៅ ដោយកើនឡើង ១៥ ភាគរយ បើប្រៀបធៀបនឹងសប្តាហ៍មុន។
កាលពីសប្តាហ៍មុនការិយាល័យស្ថិតិជាតិ បានប៉ាន់ប្រមាណថា មនុស្ស ១ នាក់ ក្នុងចំណោម ៦០ នាក់ នៅក្នុងប្រទេសអង់គ្លេស បានឆ្លងមេរោគនេះ ដែលនេះជាកម្រិតមួយខ្ពស់បំផុតនៅក្នុងប្រទេសអង់គ្លេសក្នុងអំឡុងពេលមានជំងឺរាតត្បាត។
នៅខែកក្កដា រដ្ឋាភិបាលរបស់លោកនាយករដ្ឋមន្រ្តី Borris Johnson បានដកការរឹតត្បិតផ្នែកច្បាប់ទាំងអស់ ដែលបានដាក់ចេញជាង ១ ឆ្នាំមុន ដើម្បីបន្ថយការរីករាលដាលនៃមេរោគរួមទាំងការពាក់ម៉ាស់ និងវិធានគម្លាតសង្គមផងដែរ។
អ្នកខ្លះនិយាយថា ជនជាតិអង់គ្លេសត្រឡប់ទៅរកជីវិតមុនពេលមានជំងឺរាតត្បាតលឿនពេក។ ការពាក់ម៉ាស់ និងការរក្សាគម្លាតសង្គម ក៏ត្រូវអនុវត្តនៅក្នុងប្រទេសអង់គ្លេសរួមទាំងសាលារៀនផងដែរ ទោះបីជាផ្នែកផ្សេងទៀតនៃចក្រភពអង់គ្លេសនៅតែតឹងរ៉ឹងជាងនេះបន្តិចក៏ដោយ៕