.jpg)
FBI ចុះឆែកឆេរគេហដ្ឋានមហាសេដ្ឋីរុស្ស៊ី លោក អូឡេក ឌឺរីប៉ាស្កា នៅក្រុងវ៉ាស៊ីនតោន។ រូបថត AFP
កាលពីថ្ងៃទី ១៩ តុលា ភ្នាក់ងារនៃការិយាល័យស៊ើបអង្កេតរបស់អាមេរិក (FBI) បានចុះឆែកឆេរគេហដ្ឋានចំនួន ២ នៅទីក្រុងវ៉ាស៊ីនតោន និងញូវយ៉ក មានទំនាក់ទំនងជាមួយមហាសេដ្ឋីរុស្ស៊ីលោក អូឡេក ឌឺរីប៉ាស្កា ដែលស្ថិតក្រោមការដាក់ទណ្ឌកម្មរបស់អាមេរិក និងអតីតនិយោជករបស់លោក ផលម៉ាណាហ្វត ប្រធានយុទ្ធនាការបោះឆ្នោត ២០១៦ របស់លោក ដូណាល់ ត្រាំ។
អ្នកនាំពាក្យ FBI ថា ការឆែកឆេរនេះ គឺធ្វើតាមដីកាតុលាការ ប៉ុន្តែបដិសេធបញ្ជាក់ពីហេតុផល។
ប្រភពដែលដឹងអំពីការស៊ើបអង្កេតនេះឱ្យដឹងថា ការិយាល័យរដ្ឋអាជ្ញាអាមេរិកប្រចាំភាគខាងត្បូងរដ្ឋញូវយ៉ក គឺកំពុងតែដឹកនាំការស៊ើបអង្កេតទៅលើលោក ឌឺរីប៉ាស្កា ដែលជាមហាសេដ្ឋីក្នុងវិស័យផលិតលោហធាតុ ហើយមានទំនាក់ទំនងយ៉ាងជិតស្និទ្ធជាមួយរដ្ឋាភិបាលរុស្ស៊ី។ មានការរាយការណ៍ថា លោកបានស្ថិតក្រោមការស៊ើបអង្កេតជុំវិញការចោទប្រកាន់ជាច្រើន ដូចជាការលាងលុយកខ្វក់ ការគំរាមកំហែងគូប្រជែង ការលួចស្ដាប់ទូរស័ព្ទដោយខុសច្បាប់ ការជំរិតទារប្រាក់ និងការធ្វើអាជីវកម្មខុសច្បាប់។
អ្នកតំណាងលោក ឌឺរីប៉ាស្កា ១ រូបបាននិយាយថា គេហដ្ឋានដែលត្រូវបានឆែកឆេរទាំងនេះ គឺជាកម្មសិទ្ធិរបស់សាច់ញាតិលោក ឌឺរីប៉ាស្កា មិនមែនជាកម្មសិទ្ធិរបស់លោកផ្ទាល់ទេ។ គេមិនដឹងថា លោក ឌឺរីប៉ាស្កា ឥឡូវមានទីតាំងនៅឯណាទេ។
កាលពីឆ្នាំ ២០១៨ អាមេរិកសម្រេចដាក់ទណ្ឌកម្មលើលោក ឌឺរីប៉ាស្កា ជាមួយនឹងមហាសេដ្ឋីរុស្ស៊ីមួយចំនួនផ្សេងទៀត ដោយសារទំនាក់ទំនងពួកគេជាមួយរដ្ឋាភិបាលរុស្ស៊ី បន្ទាប់ពីមានការចោទប្រកាន់អំពីការជ្រៀតជ្រែកចូលការបោះឆ្នោតឆ្នាំ ២០១៦ របស់អាមេរិក។ រុស្ស៊ីបានច្រានចោលការចោទប្រកាន់នេះ៕
