បើទោះបីជាមេដឹកនាំពិភពលោកប្តេជ្ញាចាត់វិធានការខ្លាំងក្លាជាងមុនចំពោះបញ្ហាបម្រែបម្រួលអាកាសធាតុក៏ដោយ ក៏ប្រទេសជាច្រើននៅតែមានគម្រោងបង្កើនការផលិតប្រេងឧស្ម័ន និងធ្យូងថ្មរបស់ពួកគេយ៉ាងខ្លាំងក្នុងរយៈពេលជាច្រើនទសវត្សរ៍ខាងមុខ ដែលអាចធ្វើឱ្យប៉ះពាល់ដល់ផែនការទាំងអស់នោះ។ នេះបើតាមការផ្សាយដោយសារព័ត៌មាន ញូវយ៉កថាមស៍។
របាយការណ៍ពីអង្គការសហប្រជាជាតិបានឱ្យដឹងថា ផែនការរុករករ៉ែនិងខួងយកនាពេលអនាគតនៅក្នុងប្រទេសផលិតឥន្ធនៈហ្វូស៊ីលធំៗ ចំនួន ១៥ រួមមាន សហរដ្ឋអាមេរិកអារ៉ាប៊ី សាអ៊ូឌីត រុស្ស៊ី កាណាដា ចិន ឥណ្ឌា និងន័រវែស។ល។
បច្ចុប្បន្នប្រទេសទាំងនោះ មានគម្រោងផលិតប្រេង ឧស្ម័ន និងធ្យូងថ្មទ្វេដងនៅឆ្នាំ ២០៣០ តាមតម្រូវការប្រសិនបើរដ្ឋាភិបាលចង់កំណត់កម្រិតកម្ដៅ មិនឱ្យក្ដៅដល់ ១,៥ អង្សាសេ លើសពីកម្រិតកម្ដៅ មុនមានសកម្មភាពឧស្សាហកម្ម។
អ្នកវិទ្យាសាស្ត្រនិងមេដឹកនាំពិភពលោកសុទ្ធតែបានអះអាងថា ការឡើងកម្ដៅផែនដីដល់ ១,៥ អង្សាសេនេះ មានសារៈសំខាន់ណាស់ ប្រសិនបើមនុស្សជាតិចង់ចៀសផុតពីផលវិបាកដ៏មហន្តរាយបំផុតនៃបញ្ហាបម្រែបម្រួលអាកាសធាតុ ដែលមានដូចជារលកកម្ដៅមិនធ្លាប់មានពីមុនមក គ្រោះទឹកជំនន់ទ្រង់ទ្រាយធំ និងការផុតពូជនៃសត្វមួយចំនួនជាដើម។ ពិភពលោកបានឡើងកម្ដៅប្រហែល ១,១ អង្សាសេ ចាប់តាំងពីមានបដិវត្តន៍ឧស្សាហកម្មមក។
ប្រសិនបើពិភពលោកនៅតែប្រើប្រាស់ ប្រភពថាមពលចេញពីប្រេងឧស្ម័ន និងធ្យូងថ្មអស់ជាច្រើនទសវត្សរ៍ទៀតនោះ ប្រទេសជាច្រើនអាចនឹងពិបាកក្នុងការផ្លាស់ប្តូរទៅរកការប្រើប្រាស់ប្រភពថាមពលស្អាត។ ក្នុងពេលជាមួយគ្នានេះអណ្តូងប្រេង និងអណ្តូងរ៉ែធ្យូងថ្មជាច្រើន ដែលកំពុងត្រូវបានអនុម័ត និងអភិវឌ្ឍអាចបង្ហាញថា ប្រភពថាមពលទាំងនោះ មិនមានផលចំណេញយ៉ាងខ្លាំង ប្រសិនបើតម្រូវការឥន្ធនៈហ្វូស៊ីលថយចុះដែលនេះអាចនឹងបង្កឱ្យមានការរំខានដល់សេដ្ឋកិច្ច។
របាយការណ៍បានរកឃើញថា នៅឆ្នាំ ២០៣០ ប្រទេសនៅលើពិភពលោកមានគម្រោងផលិតធ្យូងថ្មបន្ថែម ២៤០ ភាគរយ, ប្រេង ៥៧ ភាគរយ និងឧស្ម័នធម្មជាតិ ៧១ ភាគរយបន្ថែមទៀត ដែលចាំបាច់ ដើម្បីកំណត់កំណើនកម្ដៅតែត្រឹម ១,៥ អង្សាសេ។
ចាប់ពីថ្ងៃទី ៣១ ខែតុលា តទៅ មេដឹកនាំពិភពលោកនឹងបើកកិច្ចប្រជុំកំពូលអាកាសធាតុ ដែលនឹងធ្វើឡើងដោយអង្គការសហប្រជាជាតិនៅទីក្រុង Glasgow រយៈពេល ២ សប្តាហ៍ ដើម្បីពិភាក្សាពីវិធីកាត់បន្ថយការបំភាយកម្ដៅផែនដីរបស់ពួកគេ។ ប៉ុន្តែអ្នកបរិស្ថាននិយាយថា រដ្ឋាភិបាលក៏ត្រូវផ្តោតលើផែនការនាពេលអនាគតសម្រាប់ការទាញយកថាមពល ប្រេងឥន្ធនៈហ្វូស៊ីលដើម្បីឱ្យពួកគេអាចសម្របខ្លួនជាបណ្ដើរៗជាមួយនឹងផែនការប្រើប្រាស់រថយន្តអគ្គិសនីបន្ថែម ឬការដំឡើងថាមពលកកើតឡើងវិញបន្ថែមទៀត។
លោកស្រី Inger Andersen នាយិកាប្រតិបត្តិនៃកម្មវិធីបរិស្ថានរបស់អង្គការសហប្រជាជាតិបានមានប្រសាសន៍ថា៖ «រដ្ឋាភិបាលនៃប្រទេសក្នុងពិភពលោកត្រូវតែបង្កើនជំហានដោយរហ័ស និងបន្ទាន់ ដើម្បីបិទគម្លាតផលិតកម្មឥន្ធនៈហ្វូស៊ីល និងធានាឱ្យមានការផ្លាស់ប្តូរដោយយុត្តិធម៌»។
គួរបញ្ជាក់ផងដែរថា ក្នុងរយៈពេល ១ ទសវត្សរ៍កន្លងមកនេះ រដ្ឋាភិបាល និងអាជីវកម្មបានចាប់ផ្តើមងាកឆ្ងាយពីការពឹងផ្អែកយូរអង្វែងលើឥន្ធនៈហ្វូស៊ីលបណ្តើរៗហើយ។ បច្ចុប្បន្នប្រទេសជាច្រើនកំពុងរៀបចំផែនការពង្រីកថាមពលខ្យល់ និងថាមពលព្រះអាទិត្យយ៉ាងសំខាន់ និងលុបចោល គម្រោងសាងសង់រោងចក្រធ្យូងថ្មថ្មីៗ។ ក្រុមហ៊ុនផលិតរថយន្តធំៗ ដូចជា Ford និង General Motors កំពុងវិនិយោគយ៉ាងច្រើនទៅលើរថយន្តអគ្គិសនី និងកំពុងរៀបចំកាត់បន្ថយការលក់រថយន្តប្រើសាំង និងម៉ាស៊ូត។
ទោះយ៉ាងណា ជំហានទាំងនេះ គ្រាន់តែជាការចាប់ផ្តើមប៉ុណ្ណោះ។ ទីភ្នាក់ងារថាមពលអន្តរជាតិនាពេលថ្មីៗនេះបានពិនិត្យមើលនូវអ្វីដែលត្រូវការដើម្បីទប់កម្ដៅផែនដីឱ្យកើនត្រឹម ១,៥ អង្សាសេ។ ប្រទេសទាំងអស់នៅលើពិភពលោកនឹងត្រូវកាត់បន្ថយការប្រើប្រាស់ឥន្ធនៈហ្វូស៊ីលរបស់ពួកគេយ៉ាងខ្លាំងក្នុងរយៈពេល ៣ ទសវត្សរ៍ខាងមុខនេះ រហូតដល់ពួកគេលែងបន្ថែមឧស្ម័នផ្ទះកញ្ចក់ទៅក្នុងបរិយាកាសត្រឹមឆ្នាំ ២០៥០ ដោយសម្រេចបាននូវការបំភាយ «សូន្យសុទ្ធ» ឬ “net zero”។
ទីភ្នាក់ងារនេះ បានបន្ថែមទៀតថា នៅក្រោមសេណារីយោនោះប្រទេសនៅលើពិភពលោកនឹងមិនយល់ព្រមលើការអភិវឌ្ឍអណ្តូងរ៉ែធ្យូងថ្មថ្មី ឬវាលប្រេង និងឧស្ម័នថ្មីលើសពីអ្វី ដែលបានប្តេជ្ញាចិត្តនាពេលបច្ចុប្បន្ននេះទេ។
ទោះបីជាប្រទេសដូចជាចិន និងសហរដ្ឋអាមេរិកកំពុងរំពឹងថា នឹងកាត់បន្ថយការទាញយកធ្យូងថ្មនៅប៉ុន្មានទសវត្សរ៍ខាងមុខក៏ដោយ ប៉ុន្តែផែនការសម្រាប់ការជីកយករ៉ែថ្មីនៅនឹងកន្លែងដូចជានៅប្រទេសអូស្ត្រាលី ឥណ្ឌា និងរុស្ស៊ី ក៏នៅតែកើតមាន ដែលបណ្ដាលឱ្យក្ដីស្រមៃ ក្នុងការកាត់បន្ថយការទាញយកធ្យូងថ្មនៅពេលខាងមុខ ស្ថិតនៅកាន់តែឆ្ងាយ។
របាយការណ៍ដដែល បានរកឃើញថា នៅសហរដ្ឋអាមេរិក ការផលិតប្រេង និងឧស្ម័ននឹងមានការកើនឡើងគួរឱ្យកត់សម្គាល់នៅឆ្នាំ ២០៣០ ហើយជាងពាក់កណ្តាលនៃការផលិតឥន្ធនៈហ្វូស៊ីលនៅទូទាំងពិភពលោក ត្រូវបានគ្រប់គ្រងដោយក្រុមហ៊ុនរដ្ឋដែលជារឿយៗត្រូវទទួលរងសម្ពាធទីផ្សារ ហើយពេលខ្លះតម្រូវឱ្យមានច្បាប់ដើម្បីរក្សាផលិតកម្មដើម្បីរក្សាចំណូលពន្ធ។
យ៉ាងណាមិញ នៅក្នុងការអនុវត្តជាក់ស្តែង គេក៏អាចបង្ហាញឱ្យឃើញពីល្បិចកលរបស់រដ្ឋាភិបាលក្នុងការកាត់បន្ថយការផលិតប្រេងឥន្ធនៈហ្វូស៊ីលនៅទូទាំងពិភពលោក។ ទោះបីជាពិភពលោកផ្លាស់ប្តូរទៅជាថាមពលស្អាតក៏ដោយ ក៏នៅតែមានតម្រូវការប្រេង និងឧស្ម័នក្នុងអំឡុងពេលផ្លាស់ប្តូរដដែល៕