.jpg)
ទឹកជំនន់ និងការរអិលបាក់ដីសម្លាប់មនុស្សជាង ១៥០ នាក់នៅឥណ្ឌា និងនេប៉ាល់។ រូបថត AFP
មន្រ្តីឥណ្ឌា និងនេប៉ាល់បាននិយាយថា មនុស្សជាង ១៥០ នាក់បានស្លាប់ ដោយសារគ្រោះទឹកជំនន់ និងការរអិលបាក់ដីដែលបោកបក់ផ្ដាច់ផ្លូវ និងផ្ទះសំបែងរយៈពេលប៉ុន្មានថ្ងៃចុងក្រោយនៅក្នុងប្រទេសទាំង ២ ខណៈមនុស្សរាប់សិបនាក់ទៀតកំពុងបាត់ខ្លួន។
មន្រ្តីឥណ្ឌាបាននិយាយថា មនុស្ស ៤៦ នាក់ស្លាប់ នៅក្នុងរដ្ឋ Uttarakhand ភាគខាងជើងប្រទេសនិង ១១ នាក់ផ្សេងទៀតកំពុងបាត់ខ្លួន ខណៈនៅរដ្ឋ Kerala ចំនួនអ្នកស្លាប់បានកើនឡើងដល់ ៣៩ នាក់។ មន្រ្តីដដែល បន្តទៀតថា ភ្លៀងធ្លាក់យ៉ាងខ្លាំងនៅរដ្ឋ Uttarakhand រហូតបង្កឱ្យមានការបាក់ដី និងបំផ្លាញសំណង់អស់ជាច្រើនខ្នង។
នាយកដ្ឋានឧតុនិយមឥណ្ឌា បានព្រមានកាលពីថ្ងៃអង្គារដោយព្យាករថា ភ្លៀងធ្លាក់ពីខ្លាំងទៅជោគជាំនៅតំបន់ភាគខាងជើង។ ការិយាល័យអាកាសធាតុនិយាយថា តំបន់ជាច្រើនទទួលបានកំណកអាកាសជាង ៤០០ មីល្លីម៉ែត្ រកាលពីថ្ងៃចន្ទ រហូតបណ្តាលឱ្យមានការបាក់ដី និងទឹកជំនន់។ ជាមួយគ្នានោះ អាជ្ញាធរក៏បានបញ្ជាឱ្យបិទសាលារៀន និងហាមឃាត់រាល់សកម្មភាពសាសនា និងទេសចរណ៍នៅក្នុងរដ្ឋ។
នៅឯប្រទេសនេប៉ាល់វិញ មន្ត្រីបាននិយាយថា ចំនួនអ្នកស្លាប់បន្ទាប់ពីមានភ្លៀងធ្លាក់ខ្លាំង ៣ ថ្ងៃជាប់គ្នា បានបង្កឱ្យមានការរអិលបាក់ដី និងទឹកជំនន់ភ្លាមៗនៅតំបន់ភាគខាងកើត និងខាងលិចក្បែរព្រំដែនឥណ្ឌាមានអ្នកស្លាប់កើនឡើងដល់ ៧៧ នាក់នៅថ្ងៃពុធ បន្ទាប់ពីក្រុមអ្នកជួយសង្គ្រោះរកឃើញសាកសព ៣៤ នាក់បន្ថែមទៀត។
ការរអិលបាក់ដីតែងកើតមាននៅក្នុងតំបន់ហិមាល័យ ប៉ុន្តែអ្នកជំនាញនិយាយថា គ្រោះធម្មជាតិនេះនឹងកើតមានញឹកញាប់ដោយសារតែមានភ្លៀងធ្លាក់ខ្លាំងខុសពីធម្មតា និងការរលាយផ្ទាំងទឹកកក។ អ្នកជំនាញក៏បានបន្ទោសលើការសាងសង់ទំនប់វារីអគ្គិសនី និងការកាប់បំផ្លាញព្រៃឈើផងដែរ។
កាលពីខែកុម្ភៈ ទឹកជំនន់ដ៏សាហាវនៅជ្រលងភ្នំដាច់ស្រយាលមួយក្នុងរដ្ឋ Uttarakhand បានសម្លាប់មនុស្សប្រហែល ២០០ នាក់ ហើយក្នុងឆ្នាំ ២០១៣ មានមនុស្សយ៉ាងហោចណាស់ ៥ ៧០០ នាក់ បានស្លាប់នៅទីនោះ ដោយសារទឹកជំនន់ដ៏មហាប្រល័យដូចគ្នានេះ៕
ហួន ឌីណា
