ទារកសញ្ជាតិអាហ្វហ្គានីស្ថានម្នាក់ ត្រូវបានគ្រួសាររស់នៅក្នុងសភាពស្រេកឃ្លានលក់ក្នុងតម្លៃចំនួន ៥០០ ដុល្លារ។ ប្រទេសអាហ្វហ្កានីស្ថាន កំពុងប្រឈមនឹងវិបត្តិមនុស្សធម៌ដ៏ធំបំផុតក្នុងពិភពលោក។អាហ្វហ្គានីស្ថានកំពុងមានស្ថានភាព យ៉ាប់យ៉ឺនយ៉ាងខ្លាំង ចាប់តាំងពីក្រុមតាលីបង់ បានដណ្តើមអំណាចកាលពីខែសីហាឆ្នាំមុនមក។
គេសង្គេតឃើញមានមូលនិធិអន្តរជាតិដែលធ្លាប់បានជំរុញសេដ្ឋកិច្ចយ៉ាងផុយស្រួយនេះ និងកំពុងគ្រប់គ្រងដោយពួកតាលីបង់ ហើយវាត្រូវបានបញ្ឈប់ ខណៈដែលពិភពលោកកំពុងពិភាក្សាអំពីរបៀបដោះស្រាយជាមួយរបប ក្រុមតាលីបង់។ អង្គការសហប្រជាជាតិ បានចេញការព្រមានយ៉ាងម៉ឺងម៉ាត់ថា មនុស្សរាប់លាននាក់អាចនឹងស្លាប់ ប្រសិនបើជំនួយបន្ទាន់មិនទៅដល់ប្រទេសក្នុងពេលឆាប់ៗនេះ។
កាលពីដើមសប្តាហ៍មុន អង្គការសហប្រជាជាតិ (UN) បានដាស់តឿនថា អាហ្វហ្គានីស្ថានក៏កំពុងស្ថិតក្នុងហានិភ័យ «ការបែកបាក់ទាំងស្រុង»។ អង្គការសហប្រជាជាតិបានជំរុញសហគមន៍អន្តរជាតិឱ្យរក្សាប្រាក់ដែលហូរចូលក្នុងប្រទេសអាហ្វហ្គានីស្ថាន ដើម្បីបញ្ចៀសការបែកបាក់ទាំងស្រុង។
បេសកជនពិសេសរបស់អង្គការសហប្រជាជាតិលោកស្រី Deborah Lyons បានសង្កត់ធ្ងន់លើសារៈសំខាន់នៃការស្វែងរកមធ្យោបាយ ដើម្បីទទួលបានប្រាក់ចូលប្រទេស។ នេះនឹងជួយ "ទប់ស្កាត់ការបែកបាក់សេដ្ឋកិច្ច និងសណ្តាប់ធ្នាប់សង្គមទាំងមូល។ អាហ្វហ្គានីស្ថានកំពុងប្រឈមមុខនឹងព្យុះនៃវិបត្តិរួមទាំងរូបិយប័ណ្ណធ្លាក់ចុះ ហើយក៏មានការកើនឡើងយ៉ាងខ្លាំងនៃតម្លៃម្ហូបអាហារ និងប្រេងឥន្ធនៈ និងកង្វះសាច់ប្រាក់នៅធនាគារឯកជន។ អ្នកស្រីបន្តថា អាជ្ញាធរក៏មិនមានថវិកាសម្រាប់បើកប្រាក់ខែដែរ៕
មឹង ច័ន្ទសុម៉ានីតា