មេដឹកនាំអាហ្វ្រិក បានឱ្យដឹងនៅក្នុងកិច្ចពិភាក្សាអាកាសធាតុនៅទីក្រុង Glasgow ថា ខ្លួនយល់ព្រមកាត់បន្ថយឧស្ម័នផ្ទះកញ្ចក់ ប៉ុន្តែកុំរំពឹងថា ប្រទេសក្រីក្រនឹងបោះជំហានមុន និងបង្កើតប្រព័ន្ធរបស់ពួកគេឡើងវិញបានលឿនដូចប្រទេសអ្នកមាននោះ។ នេះបើតាមការឱ្យដឹងពីសារព័ត៌មានញូវយ៉កថាមស៍។
ទ្វីបអាហ្រ្វិកកំពុងជួបប្រទះការកើនកម្តៅលឿនជាងប្រទេសដទៃទៀតលើពិភពលោក។ ផែនការនៃការកាត់បន្ថយឧស្ម័នផ្ទះកញ្ចក់ ដែលកើតឡើងមកពីការប្រើប្រាស់ឥន្ទនៈ និងហ្គាស ដោយងាកមករកការប្រើប្រាស់ថាមពលស្អាត ដែលបានមកពីថាមពលពន្លឺព្រះអាទិត្យភ្លាមៗនោះ នឹងមិនដំណើរការទៅតាមផែនការទេ។ ថ្វីបើ ប្រទេសនៅអាហ្វ្រិក ដែលជាតំបន់សម្បូរទៅដោយឥន្ធនៈហ្វូស៊ីល តែងចង់ប្រើប្រាស់ថាមពលនេះ ប៉ុន្តែបញ្ហាគឹថា ការផ្គត់ផ្គង់ថាមពលនេះមិនមានស្ថិរភាពនោះទេ។ ដូចនេះ ដើម្បីកាត់បន្ថយកម្តៅផែនដី ប្រជាជាតិនានា ត្រូវតែប្រើប្រាស់ប្រេងនិងឧស្ម័នឱ្យតិចជាងនេះទៅទៀតទើប បាន។
សម្រាប់ការចាប់ផ្តើមដំបូងនោះ ក្រុមហ៊ុនBig Cabal បានរកឃើញថាបន្ទះស្រូបពន្លឺព្រះអាទិត្យ ត្រូវចំណាយថវិកាច្រើនជាងម៉ាស៊ីនភ្លើង ដល់ទៅ ៣ដងឯណោះ។ កញ្ញា Sophia Abu អ្នកគ្រប់គ្រងផ្នែកហិរញ្ញវត្ថុរបស់ក្រុមហ៊ុននេះ បានស្វែងរកអង្គភាពដ៏មានឥទ្ធិពលបំផុត ដើម្បីធ្វើឱ្យលទ្ធភាពនៃការអនុវត្តដំណើរការនេះទៅរួចក៏ដោយ ក៏នៅតែមិនគ្រប់គ្រាន់សម្រាប់ដំណើរការម៉ាស៊ីនត្រជាក់។
កញ្ញា Abu លើកឡើងថា៖«យើងត្រូវទិញថ្ម និងបន្ទះសូឡាជាច្រើនទៀតក៏ដូចជាម៉ាស៊ីនត្រជាក់ពិសេស ដែលដំណើរការជាមួយឧបករណ៍បំប្លែងថាមពលពន្លឺព្រះអាទិត្យ ឧបករណ៍ដែលអាចផ្ទុកថ្មបាន»។
លោក Titus Gwemendeនាយកអាកាសធាតុ មានមូលដ្ឋាននៅប្រទេសហ្ស៊ីមបាវ៉េ បាននិយាយថា៖ «នៅពេលដែលពួកគេនិយាយថា ឱ្យកាត់បន្ថយនៅអាហ្វ្រិកតើពួកគេឱ្យយើងចង់កាត់អ្វី? គ្មានអ្វី ត្រូវកាត់បន្ថយទេនៅទីនេះ។ ប្រទេសអាហ្វ្រិកជាប្រទេសដែលទទួលបានការបញ្ចប់បញ្ហានេះ។ អ្នកដែលបញ្ចេញឧស្ម័នធំជាងនេះ ដែលគួរមានការទទួលខុសត្រូវក្នុងការកាត់បន្ថយ»។
ការផ្លាស់ប្តូរប្រភពថាមពល ដ៏ឆាប់រហ័ស គឺមានសារៈសំខាន់ក្នុងការប្រយុទ្ធប្រឆាំងនឹងការប្រែប្រួលអាកាសធាតុជាសកល។ ប៉ុន្តែ សម្រាប់ប្រទេសក្រីក្រ ការផ្លាស់ប្ដូរនេះ ត្រូវចំណាយថ្លៃ ម្យ៉ាងវិញទៀតបណ្តាប្រទេសនៅអាហ្វ្រិកជាច្រើន មានឧស្ម័នធម្មជាតិ ឬឥន្ធនៈហ្វូស៊ីលដ៏ច្រើនសន្ធឹកសន្ធាប់ ដូច្នេះប្រទេសជាសកលមិនអាចប្រាប់ពួកគេថា ឱ្យឈប់ប្រើប្រាស់ធនធាន ដែលមានស្រាប់នោះទេ។
គួរបញ្ជាក់ផងដែរថា ប្រេងឆៅបម្រុង នៅលើទ្វីបអាហ្រ្វិកសរុប មានច្រើនជាង ១០០ពាន់លានបារ៉ែលដែលលាតសន្ធឹងលើប្រទេសចំនួន១១ជាមួយ រួមមានប្រទេសលីប៊ី និងនីហ្សេរីយ៉ា ក្នុងចំណោមប្រទេសផលិតប្រេងធំបំផុតទាំង ១០ នៅទូទាំងពិភពលោក។ តំបន់នេះ ក៏សម្បូរទៅដោយឧស្ម័នផងដែរ ដែលរួមមាន ប្រទេសនីហ្សេរីយ៉ា អាល់ហ្សេរី និងម៉ូសំប៊ិក កាន់កាប់ប្រហែល៦ ភាគរយនៃទុនបម្រុងឧស្ម័នធម្មជាតិរបស់ពិភពលោក។
ខណៈពេលដែលមេដឹកនាំពិភពលោកជួបប្រជុំគ្នានៅកិច្ចប្រជុំ COP26 ក្នុងទីក្រុង Glasgow មេដឹកនាំ និងសកម្មជនអាហ្រ្វិកមួយចំនួន បានលើកឡើងពីការជំរុញឱ្យប្រទេសខ្លួនផ្លាស់ប្ដូរប្រើប្រាស់ថាមពលកកើតឡើងវិញលឿនជាងមុន ដោយប្រទេសទាំងនេះ អាចផ្លាស់ប្តូរយឺតជាងការរំពឹងទុករបស់ពួកគេ ដោយសារប្រទេសទាំងនេះបន្តពឹងផ្អែកលើឥន្ធនៈហ្វូស៊ីល ជាពិសេសឧស្ម័នធម្មជាតិ ដែលឆេះបានស្អាតជាងធ្យូងថ្ម ឬប្រេង (ដែលនៅតែបូមកាបូនឌីអុកស៊ីតកម្តៅភពផែនដីទៅក្នុងបរិយាកាសដូចគ្នា)។
ឆ្នាំនេះតែឯង អ្នកវិទ្យាសាស្ត្រ និងអ្នកស្រាវជ្រាវបានចេញរបាយការណ៍ជាច្រើនដែលបង្ហាញពីការខូចខាត ដែលការឆេះរីករាលដាលនៃឥន្ធនៈហ្វូស៊ីលបានបង្កឡើងដល់អាកាសធាតុក្នុងរយៈពេលជាច្រើនទសវត្សរ៍មកហើយ។ ការរកឃើញបែបវិទ្យាសាស្ត្របានគូសបញ្ជាក់ពីភាពបន្ទាន់នៃការផ្លាស់ប្តូរទៅជាថាមពលស្អាត ប្រសិនបើពិភពលោកត្រូវទប់ស្កាត់សីតុណ្ហភាពសកលពីការកើនឡើង ១,៥ អង្សាសេពីសម័យបុរេឧស្សាហកម្ម ដែលជាគោលដៅកំណត់ដោយកិច្ចព្រមព្រៀងទីក្រុងប៉ារីស ក្នុងចំណោមប្រទេសនានាដើម្បីបន្ថយការប្រែប្រួលអាកាសធាតុ។
អ្នកវិទ្យាសាស្ត្របាននិយាយថា លើសពីកម្រិតសីតុណ្ហភាពនោះ ហានិភ័យនៃគ្រោះមហន្តរាយ ដូច ជារលកកម្តៅដ៏សាហាវ កង្វះទឹក និងការដួលរលំនៃប្រព័ន្ធអេកូឡូស៊ី ក៏នឹងកើនឡើងយ៉ាងខ្លាំងដែរ។
ដើម្បីសម្រេចគោលដៅនោះនិងបញ្ចៀសគ្រោះមហន្តរាយអាកាសធាតុដ៏អាក្រក់បំផុត អ្នកវិភាគនៅទីនេះ និយាយថា ប្រទេសអាហ្វ្រិកគួរតែត្រូវបានគាំទ្រផ្នែកហិរញ្ញវត្ថុដោយប្រទេសអ្នកមាន ខណៈដែលពួកគេស្វែងរកវិធានជំនួស ដើម្បីកាត់បន្ថយការបំភាយឧស្ម័ន។ប្រទេសអភិវឌ្ឍន៍ក៏គួរតែផ្ទេរចំណេះដឹងបច្ចេក ទេសស្តីពីការកកើតឡើងវិញទៅកាន់ទ្វីបអាហ្រ្វិកផងដែរ៕