.jpg)
ប្រទេសបារាំង កំពុងប្រឈមនឹងការចាប់ផ្ដើមរលកទី៥ នៃការរីករាលដាលជំងឺកូវីដ ១៩។ រូបថត AFP
កាលពីថ្ងៃពុធ ទី ១០ វិច្ឆិកា រដ្ឋមន្ត្រីក្រសួងសុខាភិបាលបារាំងលោក អូលីវីយេ វីរ៉ាន់ បាននិយាយថា ប្រទេសបារាំង គឺកំពុងស្ថិតក្នុងការចាប់ផ្ដើមនៃរលកទី៥ នៃការរីករាលដាលជំងឺកូវីដ ១៩។
លោក វីរ៉ាន់ បានប្រាប់ទូរទស្សន៍ TF1 ថា៖ «ប្រទេសជិតខាងជាច្រើន គឺកំពុងស្ថិតក្នុងរលកទី៥ នៃការរាតត្បាតនៃជំងឺកូវីដ ១៩ ហើយអ្វីដែលយើងកំពុងជួបប្រទះនៅក្នុងប្រទេសបារាំងមើលទៅហាក់ដូចជាការចាប់ផ្ដើមនៃរលកទី៥»។ លោកបានកត់សម្គាល់ថា ការរីករាល បានចាប់ផ្ដើមបង្កើនសម្ទុះ។
កាលពីថ្ងៃពុធ ក្រសួងសុខាភិបាលបារាំងបានរាយការណ៍ករណីឆ្លងថ្មីចំនួន ១១ ៨៨៣ ករណី ជាថ្ងៃទី ២ ជាប់គ្នា ដែលមានករណីប្រចាំថ្ងៃលើសពី ១០ ០០០ ករណី ក្នុង ១ ថ្ងៃ។ ចាប់តាំងពីពាក់កណ្ដាលខែតុលា អត្រាការកើនឡើងករណីឆ្លងថ្មី បានឈានដល់ភាគរយ ២ ខ្ទង់។
អង្គការសុខភាពពិភពលោកបាននិយាយថា ទ្វីបអឺរ៉ុបបានក្លាយជាចំណុចកណ្ដាលនៃការរីករាលដាលជំងឺកូវីដ ១៩ ដែលជាស្ថានភាពដដែលដូចកាលពីឆ្នាំមុន។ កាលពីចុងខែតុលា ទ្វីបអឺរ៉ុបមាន មានករណីជំងឺកូវីដ ១៩ ជាង ១,៨ លានករណី ស្មើនឹង ៥៩ ភាគរយ នៃករណីសរុបរបស់ពិភពលោក ហើយមានការស្លាប់ប្រមាណ ២៤ ០០០ ដែលជិតពាក់កណ្ដាលនៃចំនួនសរុបរបស់ពិភពលោក៕
វីដេអូ៖
