ផលវិបាកនៃការឡើងតម្លៃឧស្ម័នធម្មជាតិទៅលើអឺរ៉ុបអាចនឹងកាន់តែលំបាកជាងមុន បន្ទាប់អាជ្ញាធរអាល្លឺម៉ង់បានសម្រេចចិត្តកាលពីថ្ងៃអង្គារ ទី ១៦ វិច្ឆិកាថានឹងផ្អាកការអនុញ្ញាតឱ្យមានការបង្ហូរឧស្ម័នធម្មជាតិរុស្ស៊ី តាមរយៈបំពង់ដ៏ចម្រូងចម្រាស Nord Stream 2។
ការសាងសង់ Nord Stream 2 ត្រូវបានបញ្ចប់កាលពីដើមឆ្នាំនេះ ប៉ុន្តែនៅមិនទាន់ដំណើរការនៅឡើយ។ បំពង់ ដែលសាងសង់ក្រោមការវិនិយោគរបស់ក្រុមហ៊ុនរុស្ស៊ី Gazprom និងក្រុមហ៊ុនអឺរ៉ុបធំៗមួយចំនួននឹងបញ្ជូនឧស្ម័នពីរុស្ស៊ី ទៅអឺរ៉ុបដោយផ្ទាល់តាមរយៈបាតសមុទ្របាល់ទិក ហើយនឹងមិនឆ្លងកាត់ប្រទេសដទៃទៀតដូចជាអ៊ុយក្រែនទេ។
Nord Stream 2 បានទាក់ទាញការប្រឆាំងពីសហរដ្ឋអាមេរិក និងអ៊ុយក្រែន ហើយប្រទេសនៅសហភាពអឺរ៉ុបមួយចំនួនបានបង្ហាញការព្រួយបារម្ភថាបំពង់នេះនឹងធ្វើឱ្យអឺរ៉ុបកាន់តែរំពឹងលើឧស្ម័នរបស់រុស្ស៊ី។ ប្រទេសអ៊ុយក្រែនក៏ប្រឈមនឹងការបាត់បង់ថ្លៃសេវាឆ្លងកាត់រាប់ពាន់លានដុល្លារ នៅពេលដែលបំពង់នេះដំណើរការ។
អាជ្ញាធរអាល្លឺម៉ង់បាននិយាយថាការផ្អាកនេះគឺដោយសារក្រុមហ៊ុនដែលតំណាងឱ្យក្រុមវិនិយោគិននៃគម្រោង Nord Stream គឺត្រូវបានចុះបញ្ជីនៅប្រទេសស្វ៊ីស ហើយការអនុញ្ញាតឱ្យដំណើរការអាចធ្វើបាន លុះត្រាតែពួកគេធ្វើចុះបញ្ជីសាជាថ្មីក្រោមច្បាប់របស់ប្រទេសអាល្លឺម៉ង់។
ភាពតានតឹងភូមិសាស្ត្រនយោបាយជុំវិញ Nord Stream 2 កើតឡើងខណៈពេលដែលតម្លៃឧស្ម័នធម្មជាតិនៅអឺរ៉ុបបានកើនឡើងយ៉ាងខ្លាំង ដោយសារតម្រូវការកើនឡើងនៅរដូវរងា ភាពមិនច្បាស់លាស់ថា នៅពេលណាដែលរុស្ស៊ីនឹងផ្គត់ផ្គង់បន្ថែមទៀត និងកង្វះថាមពលនៅជុំវិញពិភពលោក៕