.jpg)
ជនចំណាកស្រុកឆ្លងចូលជំរំប៉ូឡូញនៅលើព្រំដែនបេឡារុស-ប៉ូឡូញ កាលពីថ្ងៃទី ១៧ វិច្ឆិកា។ AFP
ប្រធានាធិបតីបេឡារុស លោក អាឡិចសាន់ឌឺរ លូកាសិនកូ បាននិយាយថា ទាហានបេឡារុសអាចជួយជនអន្តោប្រវេសន៍ឆ្លងព្រំដែនចូលសហភាពអឺរ៉ុប ប៉ុន្តែបានបដិសេធថា ប្រទេសលោកមិនបានរៀបចំឱ្យមានវិបត្តិនេះទេ។
ប្រទេសមួយចំនួនក្នុងសហភាពអឺរ៉ុប បានចោទប្រកាន់រដ្ឋាភិបាលលោក លូកាសិនកូថា បានរៀបចំវិបត្តិនេះ ដោយដឹកជញ្ជូនជនអន្តោប្រវេសន៍ពីបរទេស ហើយនាំពួកគេមកតំបន់ព្រំដែន ដោយសន្យាថា នឹងមានការឆ្លងកាត់ដ៏ស្រួលចូលសហភាពអឺរ៉ុប។ បេឡារុសបានច្រានចោលការចោទប្រកាន់នេះ ហើយបានរិះគន់អឺរ៉ុបជុំវិញការបិទព្រំដែនជាមួយខ្លួន។
ក្នុងការសម្ភាសជាមួយសារព័ត៌មាន BBC អ្នកសម្ភាសន៍ បានសួរលោកលូកាសិនកូថាតើបេឡារុសកំពុងជួយជនភៀសខ្លួន និងជនអន្តោប្រវេសន៍ព្យាយាមឆ្លងចូលប៉ូឡូញឬទេ ហើយលោកបានឆ្លើយថា៖ «ខ្ញុំគិតថា វាពិតជាអាចទៅរួច»។
«យើងជាជនជាតិស្លាវី។ យើងមានបេះដូង។ ទាហានយើងដឹងថា ជនអន្តោប្រវេសន៍ កំពុងទៅអាល្លឺម៉ង់ ប្រហែលជាមាននរណាម្នាក់បានជួយពួកគេ» លោកលូកាសិនកូនិយាយបែបនេះហើយបន្តទៀតថា៖ «ប៉ុន្តែខ្ញុំមិនបានអញ្ជើញពួកគេមកទីនេះទេ»។
ក្រុមជំនួយមនុស្សធម៌បាននិយាយថា ជនអន្តោប្រវេសន៍យ៉ាងហោចណាស់ ១១ នាក់ បានស្លាប់នៅសងខាងព្រំដែន ចាប់តាំងពីវិបត្តិនេះ ចាប់ផ្ដើមកាលពីដើមឆ្នាំនេះ ប៉ុន្តែគេជឿជាក់ថាតួលេខជាក់ស្ដែងអាចនឹងខ្ពស់ជាងនេះ។ ក្រុមសិទ្ធិមនុស្សនិយាយថា ប្រទេសប៉ូឡូញបានធ្វើឱ្យការឈឺចាប់កាន់តែខ្លាំងឡើង តាមរយៈការបញ្ជូនជនអន្តោប្រវេសន៍ឱ្យត្រឡប់ទៅតំបន់សវិញ៕
