.jpg)
ផែនទីនៃប្រទេសអាមេនី និងតំបន់ Nagorno-Karabakh។ AFP
កាលពីសប្ដាហ៍មុនការប៉ះទង្គិចបានផ្ទុះឡើងនៅតំបន់ព្រំដែនប្រទេសអាមេនី និងអាស៊ែបៃហ្សង់ ដែលបានបណ្ដាលឱ្យមនុស្ស ៨ នាក់បាត់បង់ជីវិត និងជាច្រើនទៀតរបួស ឬបាត់ខ្លួន មុនប្រទេសទាំង ២ យល់ព្រមលើបទឈប់បាញ់។
ក្រសួងការពារជាតិរបស់អាមេនីបានចោទប្រកាន់កងកម្លាំងអាស៊ែបៃហ្សង់ថា បានបើកការបាញ់ប្រហារមុន រីឯអាស៊ែបៃហ្សង់ បានចោទប្រកាន់កងកម្លាំងអាមេនីថាជាអ្នកបង្កការប៉ះទង្គិច។ ការប្រយុទ្ធគ្នានេះបានកើតឡើង១សប្ដាហ៍ បន្ទាប់ពីខួប១ឆ្នាំនៃការចុះហត្ថលេខាលើបទឈប់បាញ់សម្របសម្រួលដោយរុស្ស៊ីដើម្បីបញ្ចប់សង្គ្រាម៤៤ថ្ងៃក្នុងតំបន់នេះ។
មន្ត្រីអាមេនីបានរាយការណ៍ថា ទាហានរបស់ខ្លួនម្នាក់ បានស្លាប់ហើយបាត់ខ្លួនទាហាន២ នាក់ ប៉ុន្តែសមាជិកសភាអាមេនី១រូប បាននិយាយថា ទាហានយ៉ាងហោចណាស់ ១៥នាក់បានស្លាប់។ ភាគីអាស៊ែបៃហ្សង់ បានបាត់បង់ ៧នាក់ ប៉ុន្តែបានចាប់ខ្លួនទាហានអាមេនីចំនួន១៣ នាក់។
រដ្ឋមន្ត្រីការពារជាតិរុស្ស៊ី លោកសឺហ្គេ ស៊ូហ្គូ បាននិយាយជា មួយភាគីទាំងសងខាងដើម្បីបញ្ឈប់ការប្រយុទ្ធគ្នា ប៉ុន្តែចុងក្រោយនៅតែត្រូវការការអន្តរាគមន៍ពីប្រធានាធិបតីរុស្ស៊ីលោកវ្ល៉ាឌីមៀរ ពូទីន ជាម្ដងទៀតដើម្បីទទួលបានបទឈប់បាញ់។
ក្រុងម៉ូស្គូ បានជួយសម្របសម្រួលកិច្ចព្រមព្រៀងឈប់បាញ់កាលពីឆ្នាំមុន ដែលអនុញ្ញាតឱ្យអាស៊ែ បៃហ្សង់ការគ្រប់គ្រងឡើងវិញនូវតំបន់ណាហ្គ័រណូ-ការ៉ាបាក (Nagorno-Karabakh) ដែលខ្លួនបានបាត់បង់ក្នុងសង្គ្រាមជាមួយអាមេនីកាលពីការបែកបាក់សហភាពសូវៀតនៅដើមទសវត្សរ៍១៩៩០។ ដែនដីនេះដើមឡើយ គឺគ្រប់គ្រងដោយអាស៊ែបៃហ្សង់ ប៉ុន្តែមានប្រជាជនភាគច្រើនជាជនជាតិអាមេនី។
បញ្ហាដែលកំពុងកើតមានបន្ទាប់ពីជម្លោះឆ្នាំ២០២០ គឺជុំវិញការឃុំឃាំងឈ្លើយសឹកជនជាតិអាមេនីដោយរដ្ឋាភិបាលអាស៊ែបៃហ្សង់ បើទោះបីមានកិច្ចព្រមព្រៀងដោះលែងទាំងសងខាងក៏ដោយ។ កាលពីខែកញ្ញារដ្ឋាភិបាលអាមេនីបានដាក់ពាក្យបណ្ដឹងជាផ្លូវទៅកាន់តុលាការយុត្តិធម៌អន្តរជាតិនៅទីក្រុងឡាអេ៕
