នៅពេលដែលរដ្ឋមន្ត្រីការបរទេសអាមេរិក លោក អានតូនី ប្ល៊ីនកែន ធ្វើដំណើរចេញពីអាកាសយានដ្ឋានអន្តរជាតិរដ្ឋធានី អា-ប៊ូចា ប្រទេសនីហ្សេរីយ៉ា កាលពីថ្ងៃព្រហស្បតិ៍ លោកបានធ្វើដំណើរកាត់អគារសភាពាណិជ្ជកម្មចិននៅនីហ្សេរីយ៉ា ដែលជាអគារមួយមានលក្ខណៈជាវិមានដ៏ស្កឹមស្កៃ។
ស្រដៀងគ្នានេះដែរ ដែលកាលពី ១ ថ្ងៃមុនលោក ប្ល៊ីនកែន បានធ្វើដំណើរចេញពីអាកាសយានដ្ឋានអន្តរជាតិរដ្ឋធានីណៃរ៉ូប៊ី ប្រទេសកេនយ៉ា លោកបានធ្វើដំណើរអមការដ្ឋានផ្លូវល្បឿនដ៏ធំ ដោយគេអាចមើលឃើញអក្សរចិននៅលើត្រាក់ទ័រ និងម៉ាស៊ីនធុនធ្ងន់ដទៃទៀតនៅទីនោះ។ ផ្លូវនេះ គឺជាផ្នែកមួយនៃគំនិតផ្ដួចផ្ដើមខ្សែក្រវាត់ និងផ្លូវរបស់ចិនដែលផ្ដល់មូលនិធិដ៏ធំទៅឱ្យគម្រោងហេដ្ឋារចនាសម្ព័ន្ធនៅទូទាំងទ្វីបអាស៊ី និងអាហ្វ្រិក។
ការពិតនៃការប្រកួតប្រជែងជាសកលរវាងសហរដ្ឋអាមេរិក និងប្រទេសចិន ដែលជាគោលការណ៍ចម្បងនៃគោលនយោបាយការបរទេសរបស់លោក ចូ បៃដិន បានជះស្រមោលទៅលើទស្សនកិច្ចដំបូងរបស់លោក ប្ល៊ីនកែន នៅទ្វីបអាហ្វ្រិក។ ៣ ថ្ងៃ ដំបូងនៃការធ្វើដំណើររបស់លោក ប្ល៊ីនកែន គឺពោរពេញទៅដោយការរំឭកអំពីការកើនឡើងនៃឥទ្ធិពលរបស់ទីក្រុងប៉េកាំង នៅលើទ្វីបនេះ រួមជាមួយនឹងសូចនាករមួយចំនួននៃការចុះខ្សោយនៃឥទ្ធិពលរបស់អាមេរិក។
នៅក្នុងសុន្ទរកថានៅទីក្រុងអាប៊ូចាកាលពីថ្ងៃសុក្រ លោក ប្លីកែន បានគូសបញ្ជាក់អំពីចក្ខុវិស័យរបស់រដ្ឋបាលលោក បៃដិន សម្រាប់ទ្វីបអ្រាហ្វិកដែលលោកបាននិយាយថា នឹងរួមបញ្ចូលកិច្ចសហប្រតិបត្តិការជិតស្និទ្ធ ដើម្បីជំរុញលទ្ធិប្រជាធិបតេយ្យ ទប់ស្កាត់ជំងឺរាតត្បាត និងបន្ថយល្បឿននៃការប្រែប្រួលអាកាសធាតុ។
នៅក្នុងសារមួយ ដែលទទួលស្គាល់ការប្រកួតប្រជែងជាមួយចិននៅអាហ្វ្រិក ប៉ុន្តែព្យាយាមបន្ទាបបញ្ហានេះ លោក ប្ល៊ីនកែន បានលើកឡើងថា សហរដ្ឋអាមេរិកនឹងបញ្ឈប់ការចាត់ទុកទ្វីបអាហ្រ្វិកគ្រាន់តែជាកូនអុកក្នុងការប្រកួតប្រជែងជាមួយមហាអំណាចផ្សេងទៀតទេ។
លោកនិយាយថា៖ «ជាច្រើនដងពេកហើយ ដែលបណ្ដាប្រទេសនៃទ្វីបអាហ្វ្រិកត្រូវបានចាត់ទុកជាដៃគូក្រោមបង្គាប់ ឬអាក្រក់ជាងនេះ ជាជាងដៃគូស្មើគ្នា»។ លោកបន្តទៀតថា សហរដ្ឋអាមេរិក «ជឿជាក់យ៉ាងមុតមាំថា វាដល់ពេលដែលត្រូវបញ្ឈប់ការចាត់ទុកទ្វីបអាហ្វ្រិកជាប្រធានបទនៃភូមិសាស្ត្រនយោបាយ ហើយចាប់ផ្តើមចាត់ទុកជាអ្នកចូលរួមភូមិសាស្ត្រនយោបាយដ៏សំខាន់ដែលពួកគេបានប្រែក្លាយ»។
ថ្លែងនៅក្នុងសន្និសីទសារព័ត៌មានកាលពីថ្ងៃព្រហស្បតិ៍ជាមួយរដ្ឋមន្ត្រីការបរទេសនីហ្សេរីយ៉ា លោក ជេហ្វហ្វ្រី អូនីយ៉ាម៉ា លោក ប្ល៊ីនកែន បាននិយាយនៅក្នុងការឆ្លើយតបទៅនឹងសំណួរអំពីឥទ្ធិពលរបស់ទីក្រុងប៉េកាំងថា ការចូលរួមរបស់សហរដ្ឋអាមេរិកគឺ «មិនមែនអំពីប្រទេសចិន ឬភាគីទី៣ ផ្សេងទៀតនោះទេ។ វាគឺអំពីទ្វីបអាហ្វ្រិក»។
ប៉ុន្តែលោក អូនីយ៉ាម៉ា ហាក់ដូចជាមិនប្រកាន់ទៅនឹងការប្រកួតប្រជែងនោះទេ។
លោកនិយាយថា៖ «ទាក់ទងនឹងការប្រកួតប្រជែងរវាងសហរដ្ឋអាមេរិក និងចិននៅក្នុងទ្វីបអាហ្វ្រិក ខ្ញុំមិនចង់និយាយតែពីរឿងអាក្រក់ទេ។ ប៉ុន្តែពេលខ្លះ វាគឺជារឿងល្អសម្រាប់អ្នក ប្រសិនបើអ្នកជាកូនក្រមុំដ៏ស្រស់ស្អាត ហើយអ្នករាល់គ្នាផ្ដល់បណ្ដាការដ៏អស្ចារ្យដល់អ្នក។ ដូច្នេះអ្នកយកអ្វីដែលអ្នកអាចយកបានពីពួកគេម្នាក់ៗ»។
ទីក្រុងប៉េកាំង បានធ្វើវិនិយោគហេដ្ឋារចនាសម្ព័ន្ធធំៗ នៅក្នុងប្រទេសនីហ្សេរីយ៉ា ដែលរួមទាំងការវិនិយោគទឹកប្រាក់ចំនួន ៧,៥ ពាន់លានដុល្លារ ចាប់តាំងពីឆ្នាំ ២០១៨ មក។ កាលពីខែមុន ឯកអគ្គរដ្ឋទូតចិនប្រចាំប្រទេសនីហ្សេរីយ៉ា បាននិយាយថា ទីក្រុងប៉េកាំង គ្រោងនឹងចាប់ផ្តើមបើកធនាគារនៅក្នុងប្រទេសនេះនាពេលឆាប់ៗខាងមុខ។ អ្នកវិភាគបាននិយាយថា ការខិតខំប្រឹងប្រែងនេះ គឺដើម្បីធ្វើសមាហរណកម្មប្រទេសនេះបន្ថែមទៀតទៅក្នុងប្រព័ន្ធហិរញ្ញវត្ថុរបស់ប្រទេសចិន។
លោក ប្ល៊ីនកែន ហាក់ដូចជាបានទទួលស្គាល់មួយផ្នែកនូវការលើកឡើងរបស់លោក អូនីយ៉ាម៉ា អំពីការប្រកួតប្រជែងដ៏មានអត្ថប្រយោជន៍ ដោយនិយាយថា ការវិនិយោគហេដ្ឋា រចនាសម្ព័ន្ធរបស់សហរដ្ឋអាមេរិកនៅក្នុងទ្វីបអាហ្វ្រិកអាចបង្កើតឱ្យមាន «ការប្រណាំងទៅកាន់កំពូល»៕
វីដេអូ៖