.jpg)
ប្រធានាធិបតីឥណ្ឌូនេស៊ី លោក Joko Widodo ថ្លែងនាពេលកន្លងទៅ។ រូបថត AFP
ក្រុមអ្នកស្រាវជ្រាវមកពីសាកលវិទ្យាល័យឥណ្ឌូនេស៊ីនៅទីក្រុង Depok បានរកឃើញវិធីកែច្នៃកាហ្វេទៅជាកាបូនធ្យូងថ្មម្យ៉ាង ដែលអាចបញ្ចូលទៅក្នុងសារធាតុសកម្មបង្កើតចរន្តអាណូតនៅក្នុងអាគុយរថយន្តអគ្គិសនី (EV) ខណៈប្រទេសនេះកំពុងមានមហិច្ឆតាចង់ក្លាយជាអ្នកលេងនៅក្នុងឧស្សាហកម្មថាមពល EV នេះ។ នេះបើតាមការឱ្យដឹងពីសារព័ត៌មាន CNA។
ការស្រាវជ្រាវរបស់ពួកគេត្រូវបានប្រកាស ដោយសាកលវិទ្យាល័យនៅដើមខែនេះ។ ក្រុមដដែលនេះ ក៏បានរកឃើញវិធីមួយ ដើម្បីបំប្លែងកាកសំណល់សម្បកដូងទៅជាកាបូនដែលអាចបញ្ចូលទៅក្នុងសារធាតុសកម្មបង្កើតចរន្តអាណូតផងដែរ។
ចរន្តអាណូត នៅក្នុងអាគុយលីចូមធ្វើឱ្យចរន្តអគ្គិសនីហូរតាមរយៈសៀគ្វីខាងក្រៅ ស្របពេលដែលចរន្តនេះស្រូបយកអ៊ីយ៉ុងលីចូម ដែលបញ្ចេញចេញពីកាតូដ។
ប្រធានក្រុមស្រាវជ្រាវសាស្ត្រាចារ្យ Anne ZulfiaSyahrial បានប្រាប់ CNA ថា៖ «ថ្មលីចូមអ៊ីយ៉ុងរបស់ពួកគេ ត្រូវបានផលិតចេញពីលីចូមទីតានអុកស៊ីត (LTO) ដែលផលិតចរន្តអគ្គិសនីដែលមានស្ថេរភាពជាង បើប្រៀបធៀបទៅនឹងថ្មក្រាហ្វីតលីចូម ដែលប្រើក្នុងរថយន្ត EV ដែលគេឃើញភាគច្រើន»។
ប្រភពដដែលបាននិយាយថា លីចូមទីតានអុកស៊ីត (LTO) មិនងាយនឹងសៀគ្វីខ្លីក្នុងអំឡុងពេលដំណើរការសាកថ្មទេ។ ទោះជាយ៉ាងណាក៏ដោយ សមត្ថភាពរបស់ LTO បញ្ចេញថាមពល ១៧៥ មីលីអំពែម៉ោងក្នុង ១ ក្រាម ដែលតិចជាងធ្យូងថ្មរាល់ដងបញ្ចេញថាមពល ៣៧២ មីលីអំពែម៉ោង ក្នុង ១ ក្រាម។
សាស្ត្រាចារ្យ Syahrial បាននិយាយថា៖ «ហើយនេះជាមូលហេតុដែលយើងព្យាយាមលាយសំណប៉ាហាំង ឬស៊ីលីកុន និងកាបូនដែលបានធ្វើឱ្យសកម្មពីកាកសំណល់សម្បកដូងទៅជាសមាសធាតុ ដើម្បីបន្ថែមថាមពល។ យើងក៏កែច្នៃកាកកាហ្វេ និងសូម្បីតែកាកសំណល់ប្លាស្ទិកទៅជាធ្យូងថ្មដើម្បីលាយជាមួយនឹងលីចូមទីតានអុកស៊ីត (LTO)»។
លោក Bambang Priyono សហសេវិករបស់សាស្ត្រាចារ្យដដែលបាននិយាយថា៖ «លទ្ធផលនេះធ្វើឱ្យទម្ងន់ថ្មស្រាលជាងមុន និងពេលវេលាសាកថ្មលឿនជាងបើប្រៀបធៀបទៅនឹងថ្មក្រាហ្វិចលីចូម»។
ទម្ងន់របស់លីចូមទីតានអុកស៊ីត (LTO) អាចមានទម្ងន់ស្រាលជាងអាគុយ ២០០ គីឡូក្រាម ដែលជាធម្មតាត្រូវបានប្រើប្រាស់ក្នុងរថយន្ត EV សព្វថ្ងៃនេះ។ ទម្ងន់របស់វាដដែលនេះ អាចនឹងមានទម្ងន់សរុបប្រហែល ៥០០ គីឡូក្រាម។ នៅពេលដែលថ្មកាន់តែស្រាល ចម្ងាយចររបស់រថយន្តក៏កាន់តែកើនលឿន។
ប្រភពដដែលបានឱ្យដឹងថា៖ «យើងបានរកឃើញថានៅក្នុងកាកសំណល់កាហ្វេ ភាគល្អិត អាចបង្កើតជាភាគល្អិតណាណូជាមួយនឹងលក្ខខណ្ឌផ្ទៃល្អ។ ពេលស្ថានភាពនៃផ្ទៃកាន់តែល្អ អ៊ីយ៉ុងក៏មានកាន់តែច្រើនដែលអាចផលិតថាមពលកាន់តែប្រសើរ»។
ទោះយ៉ាងណាអាគុយដែលប្រើប្រាស់កាកកាហ្វេនេះ ត្រូវការពេលប្រហែល ៣០ នាទី ដើម្បីសាកពេញ ខណៈអាគុយ EV ភាគច្រើនត្រូវការរហូតដល់ ២ ម៉ោងឯណោះ។ ឥឡូវនេះអ្នកស្រាវជ្រាវកំពុងព្យាយាមកាត់បន្ថយពេលវេលាសាកថ្មមកត្រឹម ១៥ នាទីប៉ុណ្ណោះ។
ការបង្កើតថ្មីនេះកើតឡើងស្របពេល ដែលឥណ្ឌូនេស៊ី គឺជាអ្នកផលិតរ៉ែនីកែល (ជាវត្ថុធាតុដើមសម្រាប់ផលិតថ្មលីចូម) ដ៏ធំបំផុតរបស់ពិភពលោក។
ក្នុងឆ្នាំ ២០១៩ តែឯង ប្រទេសនេះផលិតសារធាតុរ៉ែនីកែលបានដល់ទៅ ៨០ ម៉ឺនតោន ឬប្រហែល ២៩,៦ ភាគរយនៃចំនួនសារធាតុរ៉ែនីកែលសរុបក្នុងពិភពលោក។ នេះបើយោងតាមក្រសួងវិនិយោគរបស់ឥណ្ឌូនេស៊ី។
អាគុយ គឺជាសមាសធាតុសំខាន់នៅក្នុងរថយន្ត EV ហើយត្រូវបានគេជឿថា នឹងរួមចំណែកប្រហែល ២៥ ភាគរយទៅ ៤០ ភាគរយនៃការចំណាយរបស់រថយន្ត។
កាលពីខែកញ្ញា ប្រធានាធិបតី Joko Widodo បានបើកការដ្ឋានសាងសង់រោងចក្រអាគុយ EV ដំបូងគេរបស់ប្រទេសនេះនៅទីក្រុង Karawang ភាគខាងលិច Java ដែលមានតម្លៃវិនិយោគចំនួន ១,១ ពាន់លានដុល្លារអាមេរិក។ វាក៏ជារោងចក្រផលិតថ្ម EV ដំបូងគេនៅអាស៊ីអាគ្នេយ៍ផងដែរដែលគ្រោងនឹងចាប់ផ្តើមផលិតនៅឆ្នាំ ២០២៤។
កាលពីថ្ងៃទី ១៧ ខែវិច្ឆិកា លោក Widodo បាននិយាយថា៖ «រដ្ឋាភិបាលកំពុងលើកទឹកចិត្តដល់កិច្ចខិតខំប្រឹងប្រែងផ្សេងៗ ដើម្បីបង្កើនការផលិតរថយន្តអគ្គិសនី និងរថយន្តកូនកាត់ ក្នុងគោលបំណងបង្កើតប្រព័ន្ធអេកូឡូស៊ី EV ដែលមិនប៉ះពាល់ដល់បរិស្ថាន និងការបំភាយឧស្ម័នទាបផងដែរ។
លោកប្រធានាធិបតី Widodo បន្ថែមថា៖ «យើងក៏កំពុងជំរុញការផលិតរថយន្តអគ្គិសនី ការផលិតរថយន្តកូនកាត់ប៉ុន្តែជាថ្មីម្តងទៀត ពួកវាទាំងអស់ត្រូវតែមិនប៉ះពាល់ខ្លាំងដល់បរិស្ថាន»។
អ្នកបរិស្ថានបានចង្អុលបង្ហាញថា មហិច្ឆតារបស់ឥណ្ឌូនេស៊ីក្នុងការបំប្លែងនីកែលទៅជាអាគុយ នឹងតម្រូវឱ្យវាប្រើប្រាស់ថាមពលច្រើន។ ប្រជុំកោះនេះពឹងផ្អែកយ៉ាងខ្លាំងលើធ្យូងថ្មសម្រាប់ល្បាយថាមពលរបស់វា និងជាប្រទេសមួយក្នុងចំណោមអ្នកបញ្ចេញឧស្ម័នផ្ទះកញ្ចក់កំពូលរបស់ពិភពលោក។ ដូច្នេះផែនការនេះប្រហែលជាមិនប៉ះពាល់ដល់បរិស្ថានដូចការគិតពីដំបូងឡើយ៕
