កាលពីថ្ងៃអាទិត្យកន្លងទៅ អាជ្ញាធររៀបចំការបោះឆ្នោតបានបិទការិយាល័យបោះឆ្នោតនៅក្នុងប្រទេសវេណេស៊ុយអេឡា នៃការបោះឆ្នោតថ្នាក់តំបន់ និងថ្នាក់មូលដ្ឋាន ដោយមិនផ្ដល់តម្រុយថាលទ្ធផលនឹងចេញផ្សាយនៅពេលណានោះទេ។
ប្រជាពលរដ្ឋវេណេស៊ុយអេឡាចំនួនជាង ២១ លាននាក់ បានចុះឈ្មោះបោះឆ្នោតជ្រើសតាំងអភិបាលរដ្ឋ អភិបាលក្រុង និងក្រុមប្រឹក្សាក្រុងនៅទូទាំងប្រទេសជាង ៣ ០០០ អាសនៈ។ ការបោះឆ្នោតនេះគឺជាលើកដំបូងដែលអ្នកនយោបាយបក្សប្រឆាំងបានចូលរួម បន្ទាប់ពីធ្វើពហិការមិនចូលរួមការបោះឆ្នោតប្រធានាធិបតី និងសភា នៅឆ្នាំ ២០១៨ និង ២០២០។
ក្រុមប្រឹក្សាជាតិរៀបចំការបោះឆ្នោត (CNE) របស់ប្រទេសនេះ បាននិយាយនៅតាមរយៈការបង្ហោះសារមួយនៅលើ បណ្ដាញសង្គម Twitter ថា៖ «ដូចដែលបានចែងក្នុងច្បាប់ តារាងបោះឆ្នោតបានចាប់ផ្ដើមដំណើរការបិទ។ រដ្ឋមន្ត្រីក្រសួងការពារជាតិវេណេស៊ុយអេឡាលោកឧត្ដមសេនីយ៍វ៉្លាឌីមៀរ ប៉ាដ្រីនូ បាននិយាយថា ស្ថានីយបោះឆ្នោតកំពុងត្រូវបានបិទ «លើក លែងតែកន្លែងដែលនៅមានអ្នកបោះឆ្នោត»។
ក្រសួងមហាផ្ទៃ និងក្រសួងយុត្តិធម៌វេណេស៊ុយអេឡា បាននិយាយថា ពួកគេបានជួបប្រទះនឹង «ស្ថានភាពមិនប្រក្រតី» នៅក្នុងរដ្ឋ Zulia ភាគឦសានប្រទេស ដែលបុរសម្នាក់ស្លាប់ និងមនុស្ស២នាក់ផ្សេងទៀតបានរងរបួស។ បើតាមរបាយការណ៍យោធា ឧប្បត្តិហេតុដែលពាក់ព័ន្ធនឹងការប្រើប្រាស់អាវុធ បានកើតឡើង បន្ទាប់ពីពាក់កណ្ដាលអធ្រាត្រនៅជិតស្ថានីយបោះឆ្នោតមួយ៕