ប្រធានាធិបតីបេឡារុស លោក អាឡិចសាន់ឌ័រ លូកាសិនកូ បានលើកឡើងថា ប្រទេសរបស់លោកមិនចង់មានការប្រឈមមុខដាក់គ្នាជាមួយប្រទេសប៉ូឡូញទេ ប៉ុន្តែចង់ឱ្យមហាអំណាចអឺរ៉ុបធ្វើការជាមួយរដ្ឋាភិបាលលោក ដើម្បីជួយដោះស្រាយវិបត្តិជនអន្តោប្រវេសន៍នៅព្រំដែនជាមួយប្រទេសលោក ដោយបន្ថែមទៀតថា ប្រសិនបើវិបត្តិនេះកាន់តែលំបាក «ឆ្ងាយពេក សង្គ្រាមគឺចៀសមិនរួចទេ»។
កាលពីថ្ងៃចន្ទ ទី ២២ វិច្ឆិកា ទីភ្នាក់ងារព័ត៌មានរដ្ឋ BELTA របស់បេឡារុស បានដកស្រង់សម្តីលោកលូកាសិនកូនិយាយថា លោកមិនចង់ឱ្យស្ថានការណ៍កើនឡើង បន្ទាប់ពីភាពតានតឹងនៅតំបន់ព្រំដែន ដែលមានរយៈពេលជាច្រើនសប្ដាហ៍ដល់ចុងសប្ដាហ៍ នេះជាកន្លែងប្រឈមមុខ ដាក់គ្នារវាងកងកម្លាំងឆ្មាំព្រំដែនប៉ូឡូញ និងជនអន្តោប្រវេសន៍រាប់ពាន់នាក់ ដែលចង់ធ្វើដំណើរឆ្លងកាត់ទៅរស់នៅក្នុងសហភាពអឺរ៉ុប។
លោក លូកាសិនកូ និយាយថា៖ «យើងត្រូវបង្ហាញយ៉ាងច្បាស់ទៅកាន់ជនជាតិប៉ូឡូញ ទៅកាន់ជនជាតិប៉ូឡូញទាំងអស់ថា យើងមិនមែនជាមនុស្សតិរច្ឆានទេ ថាយើងមិនចង់បានការប្រឈមមុខដាក់គ្នាទេ។ យើងមិនត្រូវការវាទេ ព្រោះយើងយល់ថា បើយើងទៅឆ្ងាយពេក សង្គ្រាមគឺចៀសមិនរួច»។
លោកបន្តទៀតថា៖ «ហើយវានឹងក្លាយជាមហន្តរាយមួយ។ យើងយល់ច្បាស់អំពីរឿងនេះ។ យើងមិនចង់បានការផ្ទុះឡើងប្រភេទណាមួយទេ»។
ប្រទេសប៉ូឡូញ និងសម្ព័ន្ធមិត្តលោកខាងលិចរបស់ពួកគេបានចោទប្រកាន់លោក លូកាសិនកូ ថា បានរៀបចំឱ្យមានវិបត្តិ។ ពួកគេនិយាយថា រដ្ឋាភិបាលលូកាសិនកូបានដឹកជញ្ជូនជនអន្តោប្រវេសន៍ ដែលភាគច្រើនមកពីមជ្ឈិមបូព៌ា ចូលប្រទេសបេឡារុស ហើយបញ្ជូនពួកគេទៅកាន់សហភាពអឺរ៉ុបតាមរយៈព្រំដែនប្រទេសប៉ូឡូញ លីទុយអានី និងឡេតូនី ជាការសងសឹកនឹងការដាក់ទណ្ឌកម្មរបស់អឺរ៉ុប។
លោក លូកាសិនកូ បានច្រានចោលការចោទប្រកាន់នេះ ហើយនិយាយថា រដ្ឋាភិបាលរបស់លោកមិនអាចជួយដោះស្រាយបញ្ហានេះបានទេ លុះត្រាតែអឺរ៉ុបដកទណ្ឌកម្ម។
កាលពីសប្ដាហ៍មុនលោក លូកាសិនកូ បានធ្វើសំណើផែនការមួយដើម្បីដោះស្រាយវិបត្តិនេះ ដោយសហភាពអឺរ៉ុបនឹងទទួលយកជនអន្តោប្រវេសន៍មួយចំនួន ហើយបេឡារុសនិងធ្វើមាតុភូមិនិវត្តន៍អ្នកសេសសល់។ កាលពីថ្ងៃចន្ទ លោក លូកាសិនកូ បាននិយាយថា ប្រទេសអាល្លឺម៉ង់ ដែលជាគោលដៅចម្បងរបស់ជនអន្តោប្រវេសន៍ភាគច្រើន យ៉ាងហោចណាស់ត្រូវទទួល ២ ០០០ នាក់ ហើយបេឡារុសនឹងធ្វើមាតុភូមិនិវត្តន៍ចំនួន ៥ ០០០ នាក់។
ប៉ុន្តែសំណើនេះត្រូវបានច្រានចោលទាំងស្រុងដោយក្រុងប៊ែរឡាំង និងគណៈកម្មការអឺរ៉ុប។
អ្នកនាំពាក្យរដ្ឋាភិបាលអាល្លឺម៉ង់ ១ រូប បាននិយាយថា៖ «គំនិតនៃការមានច្រករបៀងមនុស្សធម៌ទៅកាន់ប្រទេសអាល្លឺម៉ង់ សម្រាប់ជនចំណាកស្រុកចំនួន ២ ០០០ នាក់ គឺមិនមែនជាដំណោះស្រាយដែលអាចទទួលយកបានសម្រាប់អាល្លឺម៉ង់ឬសហភាពអឺរ៉ុបនោះទេ»។
ទីភ្នាក់ងារមនុស្សធម៌ថា មានមនុស្សយ៉ាងហោចណាស់ ១៣ នាក់បានស្លាប់ នៅតំបន់ព្រំដែន ដែលជាព្រៃមានអាកាសធាតុត្រជាក់ និងសើម ហើយមានកង្វះអាហារ និងទឹកស្អាត។ ដោយសារការលំបាកក្នុងការចូលសង្កេតក្នុងតំបន់នេះ គេគិតថា តួលេខការស្លាប់ជាក់ស្ដែងអាចខ្ពស់ជាងនេះទៅទៀត។
ប្រទេសប៉ូឡូញ បានចោទប្រកាន់បេឡារុសថា នៅបន្តដឹកជញ្ជូនជនអន្តោប្រវេសន៍ និងជនភៀសខ្លួនមកកាន់ព្រំដែនសហភាពអឺរ៉ុប បើទោះបីជាបេឡារុសបានធ្វើប្រតិបត្តិការរុះរើ និងបោសសម្អាតជំរំនៅទីនោះកាលពីសប្ដាហ៍មុនក៏ដោយ។ បន្ទាប់ពីប្រតិបត្តិការបោសសម្អាតជនអន្តោប្រវេសន៍ និងជនភៀសខ្លួនភាគច្រើន ដែលបានបោះជំរំនៅព្រំដែន ត្រូវបានផ្លាស់ទៅឃ្លាំងមួយកន្លែងក្នុងប្រទេសបេឡារុស ហើយខ្លះទៀតបានធ្វើមាតុភូមិនិវត្តន៍នៅលើជើងហោះហើរទី១៕
វីដេអូ៖