សហរដ្ឋអាមេរិកត្រូវបានដាក់បញ្ចូលក្នុងបញ្ជីលទ្ធិប្រជាធិបតេយ្យ «ដើរថយក្រោយ» របស់អង្គការក្រៅរដ្ឋាភិបាល «វិទ្យាស្ថានអន្តរជាតិសម្រាប់លទ្ធិប្រជាធិបតេយ្យ និងជំនួយការបោះឆ្នោត» (IDEA) ដោយសំដៅទៅលើ«ការពុកផុយដែលអាចមើលឃើញ» ចាប់ផ្ដើមពីឆ្នាំ ២០១៩ កន្លងមក។
អង្គការដែលមានមូលដ្ឋាននៅក្រុងស្តុកហូម ប្រទេសស៊ុយអែត បានធ្វើការវាយតម្លៃរបស់ពួកគេតាមរយៈសូចនាករប្រជាធិបតេយ្យពី៥០ឆ្នាំចុងក្រោយនេះ។ ពួកគេបានបែងចែកចំនួនប្រទេសជាង ១៦០ នៅជុំវិញពិភពលោកជា៣ប្រភេទគឺ៖ លទ្ធិប្រជាធិបតេយ្យ «ដើរថយក្រោយ» រដ្ឋាភិបាល «កូនកាត់» និងរបបផ្ដាច់ការ។
របាយការណ៍របស់ IDEA ដែលមានចំណងជើងថា «ស្ថានភាពសកលនៃប្រជាធិបតេយ្យឆ្នាំ ២០២១» បានសរសេរថា៖ «ឆ្នាំនេះយើងបានសរសេរកូដថាសហរដ្ឋអាមេរិក កំពុងដើរថយក្រោយជាលើកដំបូង ប៉ុន្តែទិន្នន័យរបស់យើងបានបង្ហាញថាការថយក្រោយបានចាប់ផ្តើមយ៉ាងហោចណាស់ចាប់តាំងពីឆ្នាំ ២០១៩»។
របាយការណ៍នេះបន្តទៀតថា៖ «របត់ប្រវត្តិសាស្ត្រមួយបានកើតឡើងនៅឆ្នាំ ២០២០-២១ នៅពេលដែលអតីតប្រធានាធិបតី ដូណាល់ ត្រាំ បានចោទសួរពីភាពស្របច្បាប់នៃលទ្ធផលការបោះឆ្នោតឆ្នាំ ២០២០ នៅសហរដ្ឋអាមេរិក»។ ពួកគេក៏បានកត់សម្គាល់ថាការប្រកាន់បក្សពួកគឺកំពុងកើនឡើង ក៏ដូចជាការកើនឡើងនៃច្បាប់បោះឆ្នោតនៅតាមរដ្ឋនីមួយៗ ដែល «ប៉ះពាល់ដល់ជនជាតិភាគតិចក្នុងលក្ខណៈអវិជ្ជមានដោយមិនសមាមាត្រ»។
របាយការណ៍បាននិយាយថាចំនួននៃលទ្ធិប្រជាធិបតេយ្យដែលថយក្រោយនៅលើពិភពលោកបានកើនឡើងទ្វេដងក្នុងទសវត្សរ៍កន្លងមក។ បន្ថែមពីលើសហរដ្ឋអាមេរិក បញ្ជីនេះក៏រួមមានសមាជិកសហភាពអឺរ៉ុបហុងគ្រី ប៉ូឡូញ និងស្លូវេនីផងដែរ។ ប្រទេសចំនួន ២ ដែលមាននៅក្នុងបញ្ជីកាលពីឆ្នាំមុន គឺអ៊ុយក្រែន និងម៉ាសេដូនីខាងជើង ត្រូវបានដកចេញពីបញ្ជីនៅឆ្នាំនេះ បន្ទាប់ពីស្ថានភាពរបស់ពួកគេមានភាពប្រសើរឡើង៕