ប៉ុន្មានសប្ដាហ៍បន្ទាប់ពីរួមគ្នាបើកក្រុមនាវាឆ្លងកាត់ប្រជុំកោះជប៉ុន យោធាចិន និងរុស្ស៊ី បានបញ្ជូនយន្តហោះទម្លាក់គ្រាប់បែកចូលដែនអាកាសរបស់ជប៉ុន និងកូរ៉េខាងត្បូង ធ្វើឱ្យទីក្រុងសេអ៊ូលបញ្ជូនយន្តហោះចម្បាំងទៅធ្វើការឆ្លើយតប។
នៅទីក្រុងតូក្យូកាលពីថ្ងៃអង្គារ ទី ២៣ វិច្ឆិកា រដ្ឋមន្ត្រីក្រសួងការពារជាតិជប៉ុនលោក គីស៊ី ណូប៊ូអូ បានសម្តែង «ការព្រួយបារម្ភយ៉ាងខ្លាំង» ចំពោះសមយុទ្ធយោធាទាំង ២ នេះ ដែលបានកើតឡើងកាលពីសប្ដាហ៍មុន ដោយនិយាយថា សកម្មភាពរបស់ក្រុងប៉េកាំង និងក្រុងម៉ូស្គូបង្ហាញយ៉ាងច្បាស់ថា «ស្ថានភាពសន្តិសុខជុំវិញប្រទេសជប៉ុន កាន់តែធ្ងន់ធ្ងរទៅៗ»។
ខណៈពេលដែលលោកណូប៊ូអូនិយាយបែបនេះ រដ្ឋមន្ត្រីក្រសួងការពារជាតិរុស្ស៊ី និងចិន គឺលោក សឺហ្គេ ស៊ូហ្គូ និងលោក វៃ ហ្វឹងហឺ គឺកំពុងធ្វើជំនួបពិភាក្សាពីចម្ងាយ ដោយក្នុងនោះពួកគេបានសរសើរសមយុទ្ធដែនអាកាស និងទឹករបស់ពួកគេថាជា «ព្រឹត្តិការណ៍សំខាន់» ហើយបានចុះហត្ថលេខាលើកិច្ចព្រមព្រៀងថ្មីមួយ ដើម្បីបង្កើនទំនាក់ទំនងការពារជាតិឱ្យកាន់តែស៊ីជម្រៅ។
ផែនទីបង្ហាញផ្លូវ ដែលបានព្រមព្រៀងដោយភាគីទាំង ២ បានកើនឡើងនៅចំណុចកំពូលនៃការរីកចម្រើនកិច្ចសហប្រតិបត្តិការយោធាមិនធ្លាប់ពីមុនមកនៅឆ្នាំនេះ ដែលរួមទាំងការចូលរួមរបស់រុស្ស៊ី ជាលើកដំបូងក្នុងការសមយុទ្ធនីងស៊ារបស់ចិនកាលខែសីហា ក៏ដូចជាប្រកាសធ្វើការអភិវឌ្ឍរួមគ្នាលើឧទ្ធម្ភាគចក្រយោធា ប្រព័ន្ធប្រឆាំងមីស៊ីល និងស្ថានីយស្រាវជ្រាវលើព្រះចន្ទ។
អ្នកវិភាគមួយចំនួនបាននិយាយថា ទំនាក់ទំនងចិនរុស្សីនៅពេលបច្ចុប្បន្នគឺទំនាក់ទំនងដ៏រឹងមាំបំផុត ជិតស្និទ្ធបំផុត និងល្អបំផុតដែលមិនធ្លាប់មាន ដោយគេកត់សម្គាល់ថា ទំនាក់ទំនងជាប្រវត្តិសាស្ត្រ គឺពោរពេញទៅដោយការមិនទុកចិត្តទៅវិញទៅមករួមទាំងជម្លោះព្រំដែនក្នុងទសវត្សរ៍ឆ្នាំ ១៩៦០ ដែលកាលនោះ ជិតឈានដល់សង្គ្រាមនុយក្លេអ៊ែរ។
ប៉ុន្តែវាមិនត្រឹមតែលើការការពារទេដែលអ្នកទាំង ២ បានខិតទៅជិតគ្នា។
ជុំវិញគោលនយោបាយការបរទេស ទីក្រុងប៉េកាំង និងម៉ូស្គូបានចែករំលែកទស្សនៈស្រដៀងគ្នាទៅជុំវិញបញ្ហាប្រទេសអ៊ីរ៉ង់ ស៊ីរី និងវេណេស៊ុយអេឡា ហើយថ្មីៗនេះ បានស្តារឡើងវិញនូវការជំរុញមួយដើម្បីដកទណ្ឌកម្មរបស់អង្គការសហប្រជាជាតិលើកូរ៉េខាងជើង។
លោកប្រធានាធិបតី ស៊ី ជីនភីង និង វ្ល៉ាឌីមៀរ ពូទីន គឺមានទំនាក់ទំនងផ្ទាល់ខ្លួន ហើយបានធ្វើជំនួបពិភាក្សាផ្លូវការជាង ៣០ ដង ចាប់តាំងពីឆ្នាំ ២០១៣ មក។ មេដឹកនាំចិនថែមទាំងហៅមេដឹកនាំរុស្ស៊ីថា «មិត្តល្អ» របស់លោក។
សម្រាប់ប្រទេសចិន រុស្ស៊ី គឺជាអ្នកផ្គត់ផ្គង់អាវុធដ៏ធំបំផុតរបស់ខ្លួន និងជាប្រភពផ្គត់ផ្គង់ប្រេងធំជាងគេទី២។ ហើយសម្រាប់ប្រទេសរុស្ស៊ី ប្រទេសចិន គឺជាដៃគូពាណិជ្ជកម្មធំរបស់ខ្លួន និងជាប្រភពដ៏សំខាន់នៃការវិនិយោគនៅក្នុងគម្រោងថាមពលរបស់ខ្លួនដូចជារោងចក្រចម្រាញ់ឧស្ម័នធម្មជាតិនៅតំបន់អាក់ទិច និងគម្រោងបំពង់បង្ហូរនៅតំបន់ស៊ីបេរី ដែលជាគម្រោងធំជាងគេក្នុងប្រវត្តិសាស្ត្ររុស្ស៊ីមានតម្លៃ ៥៥ ពាន់លានដុល្លារ។
ការធ្វើឱ្យទំនាក់ទំនងកាន់តែស៊ីជម្រៅ បានធ្វើឱ្យលោកខាងលិចព្រួយបារម្ភ ដោយការវាយតម្លៃចារកម្មរបស់អាមេរិក បាននិយាយថា ការត្រួតស៊ីរវាងចិន និងរុស្ស៊ី គឺជាការគំរាមកំហែងសន្តិសុខដ៏ធំបំផុតចំពោះសហរដ្ឋអាមេរិក និងអង្គការណាតូ។ លោកខាងលិចឥឡូវនេះកាន់តែចាត់វិធានការដើម្បីប្រឆាំងនឹងប្រទេសទាំង ២។
ប៉ុន្តែអ្នកវិភាគមួយចំនួននិយាយថាដើមឡើយការរីកចម្រើនទំនាក់ទំនងប្រទេសទាំង ២ គឺមិនមែនដើម្បីប្រឆាំងលោកខាងលិចទេ។ ទំនាក់ទំនងរវាងចិននឹងរុស្ស៊ី បានរីកចម្រើនដោយសារនៅពេលបច្ចុប្បន្នប្រទេសទាំង ២ កាន់តែមានផលប្រយោជន៍រួមគ្នា។ ពួកគេក៏មានតម្រូវជួយបំពេញបន្ថែមចន្លោះបច្ចេកវិទ្យាទៅវិញទៅមក ខណៈពេលដែលលោកខាងលិចមិនមានឆន្ទៈចែករំលែក។ ការគាំទ្រគ្នាទៅវិញទៅមកក៏នឹងជួយពង្រឹងភាពស្របច្បាប់ និងស្ថិរភាពនៃរបបកាន់អំណាចរៀងៗខ្លួន។
បន្ថែមពីលើកត្តាទាំងនេះសម្ពាធពីលោកខាងលិច ជាពិសេសអាមេរិក បានជួយពន្លឿនការរីកចម្រើនទំនាក់ទំនងចិន-រុស្សី។ សកម្មភាពអាមេរិកក្នុងបរិបទនេះរួមមានចាត់ទុកប្រទេសទាំង ២ ថា ជាការគំរាមកំហែងសន្តិសុខជាតិដ៏ធំបំផុតរបស់ខ្លួន ការដាក់ទណ្ឌកម្មលើការរំលោភសិទ្ធិមនុស្សក៏ដូចជាការកសាងដែលទីក្រុងប៉េកាំង និងទីក្រុងម៉ូស្គូ ចាត់ទុកជាសម្ព័ន្ធមិត្តប្រឆាំងរុស្ស៊ី-ចិន៕
វីដេអូ៖