ជាលើកដំបូងក្នុងរយៈពេល ១៦ ឆ្នាំ ប្រទេសអាល្លឺម៉ង់ នឹងមានរដ្ឋាភិបាលកណ្ដាល-ឆ្វេងនិយម និងអធិការបតីថ្មី គឺលោក អូឡាហ្វ សូល នៃគណបក្សប្រជាធិបតេយ្យសង្គម (SDP) ដោយលោកនឹងស្នងតំណែងពីលោកស្រី អេនជេឡា មឺកែល ដែលជាមេដឹកនាំជើងចាស់មួយដែលបានធ្វើឱ្យអាល្លឺម៉ង់មិនអាចខ្វះបានក្នុងភូមិសាស្ត្រនយោបាយអឺរ៉ុប។
បន្ទាប់ពីការទន្ទឹមរងចាំយ៉ាងយូរ លោក សូល និងដៃគូសម្ព័ន្ធភាពកាន់អំណាចមកពីគណបក្សបៃតង (Green) ដែលមាននិន្នាការឆ្វេងនិយម និងគណបក្សប្រជាធិបតេយ្យសេរី (FDP) ដែលមាននិន្នាការកណ្ដាលនិយមបានឈានជើងពីមុខកាមេរ៉ា កាលពីថ្ងៃពុធ ទី ២៤ វិច្ឆិកា ដើម្បីប្រកាសកិច្ចព្រមព្រៀងចែករំលែកអំណាចប្រវែង ១៧៧ ទំព័រ ដែលពួកគេបានចរចាក្រោមការសម្ងាត់ ចាប់តាំងពីជ័យជម្នះការបោះឆ្នោតថ្ងៃទី ២៦ កញ្ញា។
លោក សូល ដែលកាលពីអាណត្តិមុនបានដើរតួជារដ្ឋមន្ត្រីក្រសួងហិរញ្ញវត្ថុក្នុងរដ្ឋាភិបាលចម្រុះរបស់លោកស្រី មឺកែល ត្រូវបានគេរំពឹងថា នឹងធ្វើសម្បថចូលកាន់តំណែងនៅដើមខែក្រោយ។ ភ្លាមៗ លោកនឹងប្រឈមមុខនឹងបញ្ហាជាច្រើន រួមមានការកើនឡើងយ៉ាងរហ័សនៃជំងឺកូវីដ ១៩ និងវិបត្តិព្រំដែននៅបេឡារុស និងអ៊ុយក្រែន។
គេរំពឹងថា សហប្រធានគណបក្សបៃតងលោក រ៉ូប៊ឺត ហាបេក នឹងកាន់តំណែងជាអនុអធិការបតី និងជារដ្ឋមន្ត្រីក្រសួងដ៏ធំថ្មីមួយ ដែលនឹងរួមបញ្ចូលមុខងារសេដ្ឋកិច្ច និងអាកាសធាតុ ហើយលោកស្រីសហប្រធាន អាណាលេណា ប៊ែរបុកនឹងកាន់តំណែងជារដ្ឋមន្ត្រីក្រសួងការបរទេស ខណៈពេលដែលប្រធានគណបក្ស FDP លោកគ្រីស្ទាន លីន្តនឺរ នឹងកាន់តំណែងជាអនុអធិការបតីទី២ និងជារដ្ឋមន្ត្រីក្រសួងហិរញ្ញវត្ថុ។
លើបញ្ហាជាច្រើនចាប់ពីអឺរ៉ុប រហូតដល់គោលនយោបាយពាណិជ្ជកម្ម និងការបរទេស អ្នកវិភាគភាគច្រើនរំពឹងថា រដ្ឋាភិបាលថ្មីនឹងបន្តដំណើរ តាមផ្លូវដែលកំណត់ដោយអ្នកកាន់តំណែងមុន។ ប៉ុន្តែលើបញ្ហាមួយចំនួន ជាពិសេសជុំវិញការចូលរួមជាមួយអាមេរិកក្នុងការដាក់សម្ពាធលើចិន និងរុស្ស៊ី ដៃគូរទាំង ២ នេះអាចបង្ខំឱ្យលោកសូលកែប្រែគោលនយោបាយចាស់ៗ៕
វីដេអូ៖