អាជ្ញាធរអ៊ីរ៉ង់ បានចាប់ខ្លួនបាតុករចំនួន៦៧នាក់ បន្ទាប់ពីប៉ះទង្គិចគ្នាជាមួយកងកម្លាំងសន្តិសុខនៅក្នុងទីក្រុង Isfahan ភាគកណ្ដាលនៃប្រទេសកាលពីថ្ងៃសុក្រ ជុំវិញការតវ៉ាប្រឆាំងនឹងបញ្ហាកង្វះទឹក។
កសិករដែលចេញមកតវ៉ាប្រឆាំងនឹងការរីងស្ងួតនៃទន្លេ ZayandehRud ដែលហូរកាត់កណ្ដាលក្រុង ទាមទារឱ្យរដ្ឋាភិបាលអ៊ីរ៉ង់ស្តារលំហូរទឹកទន្លេ ដើម្បីជួយស្រោចស្រពដីស្រែចម្ការដែលបាត់បង់ពីការគ្រប់គ្រងធនធានទឹកខុសអស់រយៈពេលរាប់ឆ្នាំ។ ប៉ូលិសអ៊ីរ៉ង់ ប្រើគ្រាប់ផ្លោងទៅលើអាកាស និងដំបងបាញ់ឧស្ម័នបង្ហូរទឹកភ្នែក ដើម្បីបំបែកហ្វូងមនុស្សក្នុងការតវ៉ាដែលមានមនុស្សប្រមាណជាង ៣ ០០០ នាក់ចូលរួម។
បាតុករម្នាក់ឈ្មោះ Hassan Tavakoli អាយុ ៤៧ ឆ្នាំមកពីក្រុង Isfahan និយាយប្រាប់កាសែតញូវយ៉កថែមស៍ថា៖ «ខ្ញុំមិនដែលរំពឹងថាគេធ្វើបែបនេះដាក់យើង វាយយើង បាញ់មកលើយើង និងធ្វើឱ្យកសិកររងរបួសទេ»។ កសិករដែលមានដីធ្វើកសិកម្ម៣ហិកតាគ្មានទឹកស្រោចស្រពដំណាំជាង ១ ឆ្នាំរូបនេះបន្តថា៖ «យើងគ្មានសល់អ្វីនៅលើដីទេ យើងគ្រាន់តែសុំសិទ្ធិប្រើប្រាស់ទឹករបស់យើងប៉ុណ្ណោះ»។
អ៊ីរ៉ង់បន្ទោសគ្រោះរាំងស្ងួតដ៏អាក្រក់បំផុតរបស់ខ្លួនក្នុងរយៈពេល ៥០ ឆ្នាំជុំវិញកង្វះខាតទឹក ខណៈដែលអ្នករិះគន់ចង្អុលបង្ហាញពីការគ្រប់គ្រងទឹកមិនត្រឹមត្រូវថាជាកត្តារួមចំណែក។ សម្រាប់ក្រុង Isfahan ទឹកត្រូវបានបង្វែរតាមបំពង់ក្រោមដីឆ្ងាយពីដីស្រែចម្ការឆ្ពោះទៅតំបន់ឧស្សាហកម្មក្នុងខេត្តវាលខ្សាច់ Yazd ជាដើម។
អ្នកជំនាញលើបញ្ហាកង្វះទឹកអ៊ីរ៉ង់និយាយថា ការប្រែប្រួលអាកាសធាតុ និងការថយចុះនៃទឹកភ្លៀងធ្វើឱ្យកាន់តែធ្ងន់ធ្ងរដល់ភាពរាំងស្ងួតដែលបណ្តាលមកពីការគ្រប់គ្រងមិនត្រឹមត្រូវ។
លោក Kaveh Madani អ្នកជំនាញទឹកដ៏ល្បីល្បាញលើពិភពលោក និងជាអតីតអនុប្រធានទីភ្នាក់ងារបរិស្ថានអ៊ីរ៉ង់និយាយថា៖ «នេះគឺជាការក្ស័យធនទឹក មានអ្នកកាន់កាប់ទឹកជាច្រើន ប៉ុន្តែមិនគ្រប់គ្រាន់សម្រាប់ប្រើប្រាស់។ ប្រជាជននៅផ្នែកខាងលើ និងផ្នែកខាងក្រោមនៃទន្លេ ZayandehRud កំពុងសុំទឹកឱ្យបានប្រើប្រាស់ទាំងអស់គ្នា។ ប៉ុន្តែនេះជាបេសកកម្មមិនអាចទៅរួច»។
ឧតុនិយមអ៊ីរ៉ង់ប៉ាន់ប្រមាណថា ប្រហែល ៩៧ ភាគរយនៃប្រទេសកំពុងប្រឈមមុខនឹងគ្រោះរាំងស្ងួតក្នុងកម្រិតខុសគ្នា។ អតីតរដ្ឋមន្ត្រីថាមពលរបស់ប្រទេសនេះព្រមានកាលពីខែឧសភាថា អ៊ីរ៉ង់នឹងជួបរដូវក្តៅដ៏ស្ងួតបំផុតក្នុងរយៈពេល ៥០ ឆ្នាំ ហើយសីតុណ្ហភាពនឹងឡើងដល់ ៥០ អង្សាសេ ដែលនឹងនាំឱ្យមានការកាត់ផ្តាច់ថាមពលអគ្គិសនី និងកង្វះខាតទឹក។
កាលពីខែកក្កដា ការតវ៉ាផ្ទុះឡើងជុំវិញការខ្វះខាតទឹកនៅភាគនិរតីនៃប្រទេសដែលជាកន្លែងផលិតប្រេង ដោយប្រធានសិទ្ធិមនុស្សរបស់អង្គការសហប្រជាជាតិ រិះគន់ជុំវិញការបាញ់សម្លាប់អ្នកតវ៉ា។ ទោះជាយ៉ាងណា រដ្ឋាភិបាលក្រុងតេអេរ៉ង់ច្រានចោលការរិះគន់នេះ៕
ហួន ឌីណា