រដ្ឋាភិបាលបារាំងកំពុងពិចារណាផ្តល់ស្វ័យភាពមួយចំនួនដល់តំបន់ប្រជុំកោះ Guadeloupe បន្ទាប់ពីកុបកម្ម និងការតវ៉ាធំៗប្រឆាំងនឹងការរឹតបន្តឹង ដើម្បីទប់ស្កាត់ការរាលដាលនៃវីរុសកូរ៉ូណា ដែលធ្វើឱ្យសេដ្ឋកិច្ចរអាក់រអួល កើតឡើងលើកោះលើសមុទ្រការ៉ាអ៊ីបមួយនេះ។
រដ្ឋមន្ត្រីបារាំងទទួលបន្ទុកកិច្ចការបរទេសលោក Sebastien Lecornu និយាយក្នុងអំឡុងពេលថ្លែងសុន្ទរកថាតាមទូរទស្សន៍កាលពីយប់ថ្ងៃសុក្រថា រដ្ឋាភិបាលត្រៀមខ្លួនរួចជាស្រេច ដើម្បីនិយាយអំពីស្វ័យភាពសម្រាប់កោះនេះ។
លោកថា៖ «មន្ត្រីជាប់ឆ្នោតមួយចំនួនសួរសំណួរអំពីស្វ័យភាព។ យោងទៅតាមពួកគេបណ្ដុំកោះ Guadeloupe អាចគ្រប់គ្រងខ្លួនឯងប្រសើរជាង។ ពួកគេចង់បានសមភាពតិចជាមួយបារាំង និងសេរីភាពក្នុងការសម្រេចចិត្តដោយមន្ត្រីជាប់ឆ្នោតក្នុងតំបន់ច្រើន»។
កុបកម្មនៅ Guadeloupe ដែលជាប្រជុំកោះចំនួន ៧ ក្រោមការគ្រប់គ្រងរបស់បារាំង តាំងពីឆ្នាំ ១៦៧៤ និងកោះ Martinique ដែលគ្រប់គ្រងដោយរដ្ឋាភិបាលបារាំងដូចគ្នា ផ្ទុះឡើងជាច្រើនថ្ងៃមកហើយ ដើម្បីប្រឆាំងនឹងវិធានការកាតព្វកិច្ចចាក់វ៉ាក់សាំងដែលរដ្ឋាភិបាលបារាំងដាក់ចេញ។ ពលរដ្ឋក៏មានការខឹងសម្បាផងដែរចំពោះភាពអត់ការងារធ្វើខ្ពស់ និងបណ្ណសុខភាពដែលតម្រូវឱ្យខ្លួនបង្ហាញពីតេស្តអវិជ្ជមាននៃវីរុសកូរ៉ូណា ឬភ័ស្តុតាងនៃការចាក់វ៉ាក់សាំងមុននឹងចូលទៅក្នុងទីសាធារណៈ។
ការប្រកាសរបស់លោក Lecornu កាលពីថ្ងៃសុក្រត្រូវបានអ្នកនយោបាយនាំមុខគេមួយចំនួននៅបារាំងធ្វើការរិះគន់។ លោក Xavier Bertrand ដែលជាអ្នកនយោបាយអភិរក្សនិយមត្រៀមខ្លួនប្រកួតប្រជែងនឹងតំណែងប្រធានាធិបតីសរសេរលើបណ្ដាញសង្គមធ្វីធើររបស់លោកថា ប្រជាជនរស់នៅប្រជុំកោះ Guadeloupe និងកោះ Martinique មិនចង់ឱ្យបារាំងគ្រប់គ្រងតិចជាងនេះទេ ផ្ទុយទៅវិញពួកគេចង់ឱ្យបារាំងឈរនៅខាងពួកគេ និងធ្វើការទទួលខុសត្រូវ។
លោក Lecornu និយាយថា ការបើកកិច្ចសន្ទនាជាមួយប្រជាពលរដ្ឋនឹងជាផលប្រយោជន៍ដ៏ល្អបំផុតរបស់ភាគីទាំងអស់។ លោកបន្ដថា៖ «កញែកអាក្រក់ទេ។ ដរាបណាការជជែកដេញដោលទាំងនេះបម្រើ ដើម្បីដោះស្រាយបញ្ហាពិតប្រាកដរបស់ប្រជាជនរស់នៅប្រជុំកោះ Guadeloupe»៕
ហួន ឌីណា