វ៉ារ្យ៉ង់អូមីក្រុន (omicron) បានលេចឡើងនៅក្នុងបណ្តាប្រទេសអ៊ឺរ៉ុបកាន់តែច្រើនកាលពីថ្ងៃសៅរ៍សប្ដាហ៌មុន ពោលគឺត្រឹមតែប៉ុន្មានថ្ងៃបន្ទាប់ពីគេបានកំណត់អត្តសញ្ញាណវ៉ារ៉្យង់ប្រភេទនេះ នៅប្រទេសអាហ្វ្រិកខាងត្បូង ខណៈរដ្ឋាភិបាលជុំវិញពិភពលោក កំពុងបង្កើនការប្រុងប្រយ័ត្ន។ នេះបើតាមការឱ្យដឹងពីសារព័ត៌មាន AP News។
កាលពីថ្ងៃសៅរ៍ ចក្រភពអង់គ្លេស បានរឹតបន្តឹងច្បាប់របស់ខ្លួនលើវិធានពាក់ម៉ាស់ ក៏ដូចជាការធ្វើតេស្តលើអ្នកដំណើរអន្តរជាតិ បន្ទាប់ពីបានរកឃើញករណីវ៉ារ៉្យង់អូមីក្រុនចំនួន ២ ករណី។ កាលពីចុងសប្ដាហ៌ កន្លងទៅ ករណីវ៉ារ៉្យង់អូមីក្រុន ត្រូវបានគេរកឃើញនៅប្រទេសអាល្លឺម៉ង់ និងអ៊ីតាលី បែលហ្ស៊ិក អ៊ីស្រាអែល និងហុងកុងផងដែរ។
លោកវេជ្ជបណ្ឌិត Anthony Fauciជាអ្នកជំនាញជំងឺឆ្លងកំពូលរបស់រដ្ឋាភិបាលសហរដ្ឋអាមេរិក ថ្លែងថា៖«ខ្ញុំមិនភ្ញាក់ផ្អើលទេ ប្រសិនបើវ៉ារ្យ៉ង់អូមីក្រុនមានវត្តមាននៅក្នុងសហរដ្ឋអាមេរិករួចហើយនោះ»។
លោក Fauci បាននិយាយនៅលើកញ្ចក់ទូរទស្សន៍ NBC ថា៖«យើងមិនទាន់បានរកឃើញករណីវ៉ារ៉្យង់នេះនៅឡើយទេ ប៉ុន្តែប្រសិនជាមានវ៉ារ៉្យង់ថ្មី ដែលកំពុងឆ្លងមែននោះ ខ្ញុំគិតថា វាប្រាកដជាឆ្លងពាសពេញហ្នឹងមិនខាន យើងពិបាកនឹងគ្រប់គ្រងវាណាស់»។
ភាពភ័យខ្លាចដោយថាវ៉ារ្យ៉ង់ថ្មី អាចធន់នឹងវ៉ាក់សាំង ប្រទេសនានាបានបង្កើនការប្រុងប្រយ័ត្ន ដោយមានទាំងការរឹតបន្តឹងគម្លាតសារធារណៈ ក៏ដូចជា វិធានការបិទខ្ទប់មុនផងដែរ។ មនុស្សជាច្រើន បានដាក់កំហិតការធ្វើដំណើររួចហើយលើជើងហោះហើរពីអាហ្វ្រិកខាងត្បូងខណៈពួកគេកំពុងវាយតម្លៃថា តើវ៉ារ្យ៉ង់អូមីក្រុនមានភាពកាចសាហាវជាងវ៉ារ៉្យង់ដែលតា ឬ យ៉ាងណា?
ប្រទេសជាច្រើន បានរឹតបន្តឹងការធ្វើដំណើរលើបណ្តាប្រទេសអាហ្វ្រិកខាងត្បូងជាច្រើនក្នុងរយៈពេលប៉ុន្មានថ្ងៃកន្លងមកនេះ រួមទាំងប្រទេសអូស្ត្រាលី ប្រេស៊ីល កាណាដា សហភាពអឺរ៉ុប អ៊ីរ៉ង់ ជប៉ុន នូវែលសេឡង់ ថៃ និងសហរដ្ឋអាមេរិក ដើម្បីទប់ស្កាត់ការឆ្លងនៃវ៉ារ្យ៉ង់ថ្មីនេះ បើទោះបីជាផ្ទុយទៅនឹងការណែនាំរបស់អង្គការសុខភាពពិភពលោក ដែលព្រមានមិនឱ្យមានការប្រតិកម្មហួសហេតុណាមួយ មុនពេលវ៉ារ្យ៉ង់ថ្មីត្រូវបានសិក្សាយ៉ាងហ្មត់ចត់ជាដើម។
ទោះបីជា មានការហាមឃាត់ការហោះហើរក៏ដោយ ក៏មានការបារម្ភកាន់តែខ្លាំងឡើងដែលថា វ៉ារ្យ៉ង់នេះ អាចនឹងរីករាលដាលយ៉ាងទូលំទូលាយនៅជុំវិញពិភពលោក។ ប្រទេសអ៊ីតាលី និងអាល្លឺម៉ង់ គឺជាប្រទេសចុងក្រោយគេដែលរាយការណ៍ករណីវ៉ារ្យ៉ង់អូមីក្រុននេះ។
វិទ្យាស្ថានសុខភាពសាធារណៈរបស់ប្រទេសហូឡង់បាននិយាយថា វ៉ារ្យ៉ង់អូមីក្រុន ទំនងជារកឃើញនៅក្នុងអ្នកធ្វើតេស្តមួយចំនួន ដែលត្រូវបានដាក់ឱ្យនៅដាច់ដោយឡែក បន្ទាប់ពីបានមកដល់ទីក្រុង Amsterdam កាលពីថ្ងៃ សុក្រ តាមជើងហោះហើរ២ពីអាហ្វ្រិកខាងត្បូង។
វិទ្យាស្ថានដដែល បាននិយាយនៅក្នុងសេចក្តីថ្លែងការណ៍មួយថា ការវិភាគបន្តបន្ទាប់គ្នាកំពុងដំណើរការលើមនុស្ស ៦១ នាក់ ដើម្បីកំណត់ឱ្យប្រាកដថា វា គឺជាវ៉ារ្យ៉ង់ថ្មី ឬ យ៉ាងណា? ហើយលទ្ធផលនៃការវិភាគអាចនឹងបញ្ចប់នៅអាទិត្យ។
នៅអ៊ីស្រាអែលទៀតសោតក៏បានរកឃើញមេរោគថ្មីនៅក្នុងអ្នកដំណើរ ដែលបានត្រឡប់មកពីប្រទេស ម៉ាឡាវី ហើយក៏កំពុងតាមដានអ្នកធ្វើដំណើរចំនួន ៨០០ នាក់ ដែលទើបតែត្រឡប់មកពីបណ្តាប្រទេសអាហ្វ្រិកខាងត្បូងនាពេលថ្មីៗនេះ។ ហើយអូស្ត្រាលីបាននិយាយកាលពីព្រឹកថ្ងៃអាទិត្យថា អ្នកវិទ្យាសាស្ត្ររបស់ខ្លួនកំពុងធ្វើការដើម្បីតាមដានលើមនុស្ស ២ នាក់ ដែលបានធ្វើតេស្តវិជ្ជមានវ៉ារ៉្យង់អូមីក្រុន បន្ទាប់ពីបានមកដល់អាហ្វ្រិកខាងត្បូងវិញ។
ទោះយ៉ាងណា ក្រុមហ៊ុនឱសថមួយចំនួន រួមទាំងក្រុមហ៊ុន AstraZeneca ក្រុមហ៊ុន Moderna ក្រុមហ៊ុន Novavax និងក្រុមហ៊ុន Pfizer បាននិយាយថា ពួកគេមានផែនការដើម្បីបង្កើនប្រសិទ្ធភាពវ៉ាក់សាំងរបស់ពួកគេ ដើម្បីទប់ទល់នឹងឥទ្ធិពលនៃវ៉ារ៉្យង់អូមីក្រុននេះ។ ក្រុមហ៊ុន Pfizer និងដៃគូរបស់ខ្លួន គឺក្រុមហ៊ុន BioNTech បាននិយាយថា ពួកគេរំពឹងថា នឹងអាចបង្កើនប្រសិទ្ធភាពវ៉ាក់សាំងរបស់ពួកគេក្នុងរយៈពេលប្រហែល ១០០ ថ្ងៃ។
សាស្ត្រាចារ្យ Andrew Pollard នាយកក្រុមបង្កើតវ៉ាក់សាំង Oxford Vaccine Group ដែលបានបង្កើតវ៉ាក់សាំង AstraZeneca បានបង្ហាញសុទិដ្ឋិនិយមថា វ៉ាក់សាំងដែលមានស្រាប់អាចមានប្រសិទ្ធភាពក្នុងការការពារករណីធ្ងន់ធ្ងរ ដែលបណ្ដាលមកពីវ៉ារ៉្យង់អូមីក្រុន។
អ្នកជំនាញខ្លះ ក៏លើកថា ការលេចឡើងនៃវ៉ារ្យ៉ង់នេះ គឺជាលទ្ធផលមកពីការស្តុកទុកវ៉ាក់សាំងរបស់ប្រទេសអ្នកមាន ដែលបានបង្កឱ្យមានការគំរាមកំហែង និងភាពអូសបន្លាយជំងឺរាតត្បាតទូទាំងប្រទេស។តួយ៉ាង ប្រទេសតិចជាង ៦ ភាគរយនៃប្រជាជននៅទ្វីបអាហ្រ្វិក ទទួលបានវ៉ាក់សាំងពេញលេញ ខណៈបុគ្គលិកសុខាភិបាលរាប់លាននាក់ និងប្រជាជនដែលងាយរងគ្រោះមិនទាន់បានទទួលវ៉ាក់សាំងនៅឡើយទេ។
លក្ខខណ្ឌទាំងនោះ អាចជាកត្តាមួយក្នុងការបង្កើនល្បឿននៃការរីករាលដាលនៃមេរោគដោយផ្តល់ឱកាសដល់មេរោគក្នុងការវិវត្តនៃជំងឺ និងគ្រោះថ្នាក់កាន់តែច្រើន។
លោកសាស្ត្រាចារ្យ PeterOpenshaw វេជ្ជសាស្ត្រពិសោធន៍នៅសាលា Imperial College London ប្រចាំទីក្រុងឡុង៍និយាយថា៖ «កត្តាសំខាន់មួយក្នុងការលេចឡើងនៃវ៉ារ្យ៉ង់ អាចបណ្ដាលមកពីអត្រានៃការចាក់វ៉ាក់សាំងទាបនៅក្នុងផ្នែកខ្លះនៃពិភពលោក ដូចដែលការព្រមានរបស់អង្គការសុខភាពពិភពលោក ថាគ្មាននរណាម្នាក់មានសុវត្ថិភាពឡើយ លុះត្រាប្រទេសទាំងអស់មានសុវត្ថិភាព»៕