រដ្ឋាភិបាលចក្រភពអង់គ្លេសលើកឡើងថា ពួកគេចង់បានកិច្ចពិភាក្សា «បន្ទាន់» ជាមួយរដ្ឋមន្ត្រីបណ្ដាប្រទេសអឺរ៉ុបនៅសប្ដាហ៍នេះ ជុំវិញវិបត្តិជនអន្តោប្រវេសន៍នៅច្រកសមុទ្រអង់គ្លេស បន្ទាប់ពីត្រូវបដិសេធមិនឱ្យចូលរួមក្នុងកិច្ចប្រជុំនៅប្រទេសបារាំង។
រដ្ឋមន្ត្រីក្រសួងមហាផ្ទៃរបស់ប្រទេសបែលហ្ស៊ិក បារាំង អាល្លឺម៉ង់ និងហូឡង់ រួមជាមួយនិងមន្ត្រីមកពីសហភាពអឺរ៉ុប ទីភ្នាក់ងារព្រំដែនសហភាពអឺរ៉ុប Frontex និងទីភ្នាក់ងារប៉ូលិស Europol នឹងធ្វើកិច្ចប្រជុំនៅថ្ងៃអាទិត្យខាងមុខនេះ នៅទីក្រុងកាលីស ប្រទេសបារាំង បន្ទាប់ពីជនអន្តោប្រវេសន៍ខុសច្បាប់ចំនួន ២៧ នាក់ បានលង់ទឹកស្លាប់នៅច្រកសមុទ្រអង់គ្លេសកាលពីថ្ងៃពុធសប្ដាហ៍មុន ខណៈពេលដែលពួកគេ កំពុងព្យាយាមឆ្លងកាត់ពីបារាំងទៅអង់គ្លេស។
ការអញ្ជើញរដ្ឋមន្ត្រីក្រសួងមហាផ្ទៃអង់គ្លេសលោកស្រី ព្រីត ប៉ាតេល ឱ្យចូលរួមក្នុងកិច្ចប្រជុំនេះត្រូវបានលុបចោល បន្ទាប់នាយករដ្ឋមន្ត្រីអង់គ្លេសលោក បូរីស ចនសុន បានធ្វើការចុះផ្សាយលិខិតមួយ ដែលលោកបានផ្ញើជូនប្រធានាធិបតីបារាំង លោក អេម៉ានុយអែល ម៉ាក្រុង ដែលក្នុងនោះលោកបានកំណត់ការទាមទាររបស់ទីក្រុងឡុងដ៍ សម្រាប់សកម្មភាពរួមគ្នាលើបញ្ហាជនភៀសខ្លួន។
បើទោះជាយ៉ាងនេះក៏ដោយលោកស្រី ប៉ាតេល បាននិយាយថាលោកស្រីនឹងនៅតែជួបជាមួយមន្ត្រីអឺរ៉ុបនៅសប្ដាហ៍នេះ ប៉ុន្តែក្រសួងមហាផ្ទៃអង់គ្លេសនៅមិនទាន់បញ្ជាក់ថា នរណានឹងចូលរួមកិច្ចប្រជុំនេះ ហើយនឹងធ្វើឡើងនៅពេលណា និងនៅទីណា។
ចំនួនជនអន្តោប្រវេសន៍ខុសច្បាប់ធ្វើដំណើរឆ្លងកាត់ច្រកសមុទ្រអង់គ្លេសតាមរយៈទូកតូចៗរបស់អ្នករត់ពន្ធមនុស្ស បានកើនឡើងយ៉ាងខ្លាំងនៅឆ្នាំនេះ ខណៈពេលដែលមានការដាក់កម្រិតលើវិស័យអាកាសចរណ៍។ បើទោះជាយ៉ាងនេះក៏ដោយ ចំនួនជនអន្តោប្រវេសន៍ធ្វើដំណើរទៅកាន់ចក្រភពអង់គ្លេសគឺទាប បើប្រៀបទៅនឹងបណ្ដាប្រទេសនៅទ្វីបអឺរ៉ុប៕